नागरिक आणि निवडणूक आयोग यांच्यातील पहिला संपर्क दुवा म्हणजे BLO

मुख्य निवडणूक आयुक्त ज्ञानेश कुमार यांचे प्रतिपादन

पणजी : बूथ लेव्हल ऑफिसर्स (BLO) हे नागरिक आणि भारतीय निवडणूक आयोग यांच्यातील पहिला संपर्क दुवा असल्याचे प्रतिपादन मुख्य निवडणूक आयुक्त ज्ञानेश कुमार यांनी केले. गोव्यात आयोजित संवाद कार्यक्रमात त्यांनी राज्यातील विविध भागांतील एक हजारांहून अधिक BLO शी संवाद साधला.

उद्घाटनपर भाषणात ज्ञानेश कुमार यांनी BLO हे जगातील सर्वात मोठ्या लोकशाही व्यवस्थेचा महत्त्वपूर्ण आणि मूलभूत आधारस्तंभ असल्याचे सांगितले. भारतातील मतदार यादी तयार करण्याची प्रक्रिया आणि निवडणुकांचे आयोजन हे भारतीय संविधान, संबंधित कायदे आणि भारतीय निवडणूक आयोगाच्या निर्देशांनुसार केले जाते, असेही त्यांनी स्पष्ट केले.

गोव्यातील BLO यांनी मतदार यादी तयार करण्याच्या प्रक्रियेत महत्त्वपूर्ण भूमिका बजावली असून, ते सातत्याने ही जबाबदारी पार पाडत असल्याचे कुमार यांनी नमूद केले. मतदार यादीची अचूकता आणि विश्वासार्हता राखण्यासाठी BLO करत असलेल्या कार्याचे त्यांनी कौतुक केले.

मान्यताप्राप्त राजकीय पक्षांकडून नियुक्त करण्यात आलेले बूथ लेव्हल एजंट्स (BLA), तसेच उमेदवारांचे मतदान आणि मतमोजणी प्रतिनिधी यांच्यामार्फत मतदार यादी आणि निवडणूक प्रक्रियेच्या विविध टप्प्यांवर पडताळणीची व्यवस्था असल्याचेही त्यांनी सांगितले.

या कार्यक्रमात BLO यांच्या भूमिकेवर आधारित कोंकणी भाषेतील आणि BLA यांच्या भूमिकेवर आधारित इंग्रजी भाषेतील लघु माहितीपटही प्रदर्शित करण्यात आले. गोव्याच्या समृद्ध परंपरा आणि सांस्कृतिक वारसा दर्शविणारा सांस्कृतिक कार्यक्रमही यावेळी सादर करण्यात आला.

बैठकीदरम्यान BLO यांच्यासाठी प्रश्नोत्तर सत्राचे आयोजन करण्यात आले होते. या संवादातून BLO ना त्यांच्या कामाशी संबंधित प्रश्न आणि शंका थेट मुख्य निवडणूक आयुक्तांसमोर मांडण्याची संधी मिळाली.

यापूर्वी 27 ऑगस्ट रोजी ज्ञानेश कुमार यांनी चेन्नई येथे आयोजित इलेक्टोरल लिटरेसी क्लब्स (ELC 2.0) आणि ECINET अॅप विषयक प्रादेशिक परिषदेदरम्यान तामिळनाडूतील BLO यांच्याशीही संवाद साधला होता. या बैठकीत BLO ना स्थानिक पातळीवरील अनुभव आणि निवडणूक प्रक्रियेशी संबंधित निरीक्षणे मांडण्याची संधी मिळाली.

या परिषदेत निवडणूक साक्षरता वाढविणे, मतदार जागरूकता मजबूत करणे आणि ECINET अॅपच्या भूमिकेबाबत विचारांची देवाणघेवाण करण्यात आली.