मध्यपूर्वेतील लष्करी मोहिमेनंतर ५ हजार नौसैनिकांना पाच दिवसांची विश्रांती
लाएम चाबांग : तब्बल २८६ दिवस समुद्रात राहिल्यानंतर अमेरिकेची अणुऊर्जेवर चालणारी विमानवाहू युद्धनौका ‘यूएसएस अब्राहम लिंकन’ बुधवारी थायलंडमधील लाएम चाबांग बंदरात दाखल झाली. मध्यपूर्वेतील दीर्घ लष्करी तैनाती आणि इराणविरोधातील युद्ध कारवायांमध्ये सहभागी झाल्यानंतर नौदलाच्या जवानांना विश्रांती देण्यासाठी ही भेट आयोजित करण्यात आली आहे.
‘अब्राहम लिंकन’वर सुमारे ५ हजार नौसैनिक आणि खलाशी आहेत. डेमोक्रॅटिक खासदारांच्या माहितीनुसार, सलग २८६ दिवस समुद्रात राहणे हा आधुनिक काळातील विक्रम ठरला आहे. साधारणपणे अमेरिकी नौदलाची तैनाती सहा ते नऊ महिन्यांची असते; मात्र युद्धजन्य परिस्थितीत ती वाढवली जाऊ शकते.
विमानवाहू युद्धनौकेसोबत ‘यूएसएस फ्रँक ई. पीटरसन ज्युनियर’ ही क्षेपणास्त्रवाहू विनाशिका देखील थायलंडमध्ये दाखल झाली आहे. ‘अब्राहम लिंकन’च्या डेकवर हेलिकॉप्टर, लढाऊ विमाने आणि अत्याधुनिक एफ-३५ फायटर जेट्स दिसून आले.
जहाजांचा पाच दिवस मुक्काम
थायलंडच्या अधिकाऱ्यांनी दिलेल्या माहितीनुसार, जहाजांचा मुक्काम पाच दिवसांचा असून यामध्ये विश्रांती, पुनर्ताजेतवाने होणे आणि रसद पुरवठा यावर भर असेल. थायलंडने स्पष्ट केले आहे की हा दौरा मध्यपूर्वेतील संघर्षाशी संबंधित नसून नियमित द्विपक्षीय संबंधांचा भाग आहे.
अमेरिका आणि थायलंडचे १९५४ पासून संरक्षणविषयक घनिष्ठ संबंध आहेत. दरम्यान, हजारो अमेरिकी जवानांच्या आगमनामुळे पट्टायातील स्थानिक पर्यटन आणि व्यवसायांना चालना मिळण्याची अपेक्षा आहे. जवानांच्या वाहतुकीसाठी सुमारे ४० बस गाड्यांची व्यवस्था करण्यात आली आहे.