North India Weather – उत्तर भारताला थंडीचा तडाखा

हिमाचल अन् काश्मीरमध्ये जोरदार हिमवृष्टी

श्रीनगर : North India Weather उत्तर भारतात हवामानाचा मिजाज अचानक बदलला असून पर्वतीय भागांत हिमवृष्टी आणि मैदानी भागांत पावसाने हजेरी लावली आहे. हिमाचल प्रदेश आणि जम्मू-काश्मीरच्या पर्वतीय भागात गेल्या २४ तासांत मोठ्या प्रमाणावर बर्फवृष्टी झाली आहे. काश्मीर खोऱ्यातील सोनमर्ग आणि गुलमर्ग ही पर्यटन स्थळे बर्फाने झाकून गेली आहेत, तर हिमाचलमधील लाहौल-स्पीती, चंबा, कांगडा आणि कुल्लू येथील उंचावरील भागात १ ते ५ सेमीपर्यंत नवा बर्फ साचला आहे.

श्रीनगरसह मैदानी भागात रात्रभर संततधार पाऊस सुरू होता. दुसरीकडे, प्रसिद्ध पर्यटन स्थळ सोनमर्ग आणि गुलमर्गच्या उंचावरील भागात सलग तिसऱ्या रात्रीही टप्प्याटप्प्याने हिमवृष्टी झाली. येथील डोंगर आणि गवताळ प्रदेश बर्फाने व्यापून गेले आहेत, ज्यामुळे पर्यटकांमध्ये आनंदाचे वातावरण असले तरी स्थानिक जनजीवनावर त्याचा परिणाम झाला आहे. संततधार पाऊस आणि बर्फवृष्टीमुळे दिवसाचे तापमान सामान्यपेक्षा ३ ते ९ अंश सेल्सिअसने खाली घसरले असून थंडीचा कडाका अचानक वाढला आहे.

अनेक महत्त्वाचे रस्ते बर्फ साचल्यामुळे बंद झाले असून रस्ते मोकळे करण्याचे काम युद्धपातळीवर सुरू आहे. येत्या १६ ऑक्टोबरपासून पाऊस आणि हिमवृष्टीचा जोर ओसरेल आणि १८ ऑक्टोबरपासून संपूर्ण भागात आकाश निरभ्र होऊन हवामान कोरडे राहण्याची शक्यता आहे.

केलाँग आणि कोकसरमध्ये बर्फाची चादर

हवामान खात्याच्या माहितीनुसार, हिमाचल प्रदेशातील चंबा, कांगडा, लाहौल-स्पीती, कुल्लू आणि किन्नौर या जिल्ह्यांमधील उंचावरील भागांत हिमवृष्टी झाली आहे. विशेषत: लाहौल-स्पीतीमधील केलाँग येथे सुमारे २ सेंटीमीटर तर कोकसर येथे ५ सेंटीमीटर नवीन बर्फवृष्टी झाली आहे. याशिवाय, भुंतर विमानतळ परिसरातही हिमवृष्टीची नोंद करण्यात आली आहे, तर मंडी, सुंदरनगर आणि बिलासपूरमध्ये विजांच्या कडकडाटासह पाऊस पडला.

काश्मीरमधील हवामान खात्याचा पुढील अंदाज

• गुरुवार (१५ ऑक्टोबर) : मैदानी भागात हलका ते मध्यम पाऊस आणि पर्वतीय भागात हिमवृष्टीसह काही ठिकाणी विजांचा कडकडाट, वादळी वारे व गारा पडण्याची शक्यता आहे.
• शुक्रवार (१६ ऑक्टोबर) : काही तुरळक ठिकाणी हलक्या पावसाची शक्यता असून हवामान हळूहळू सुधारेल.
• १७ ते २४ ऑक्टोबर : पुढील आठवडाभरात हवामान प्रामुख्याने कोरडे राहण्याचा अंदाज वर्तवण्यात आला आहे.

हिमाचल प्रदेशाचा हवामानाचा पुढील अंदाज:

• १६ ऑक्टोबरपासून : संपूर्ण राज्यात हवामानाचा जोर ओसरण्यास सुरुवात होईल. मात्र, चंबा, कांगडा, लाहौल-स्पीती आणि कुल्लूच्या काही भागांत हलकी सरबरीत पर्जन्यवृष्टी आणि उंचावर बर्फवृष्टी सुरूच राहू शकते.
• १८ ऑक्टोबरपासून : राज्याच्या बहुतांश भागात आकाश पुन्हा निरभ्र होऊन हवामान पूर्णपणे पूर्ववत आणि स्थिर होण्याची शक्यता हवामान विभागाने वर्तवली आहे.

Read About : Greenland Glacier Melting – जहाजांना अशक्य ठरलेल्या समुद्रात नार्व्हल माशांनी उलगडले हिमनग वितळण्याचे रहस्य
E-Paper: Punyanagari E-Paper