India-Belgium Partnership: पंतप्रधान मोदी आणि बेल्जियमचे पंतप्रधान बार्ट डी वेव्हर यांच्यात शिष्टमंडळस्तरीय चर्चा
नवी दिल्ली : भारत आणि युरोपियन देशांबरोबरचे संबंध अधिक मजबूत करण्याच्या प्रयत्नांना वेग देत पंतप्रधान नरेंद्र मोदी यांनी गुरुवारी बेल्जियमचे पंतप्रधान बार्ट डी वेव्हर यांच्यासोबत नवी दिल्लीत शिष्टमंडळस्तरीय चर्चा केली. या बैठकीत द्विपक्षीय संबंध अधिक दृढ करण्यासह व्यापार, गुंतवणूक, संरक्षण, तंत्रज्ञान आणि कनेक्टिव्हिटी क्षेत्रातील सहकार्य वाढविण्यावर चर्चा करण्यात आली. या बैठकीला राष्ट्रीय सुरक्षा सल्लागार अजित डोवाल, परराष्ट्र सचिव विक्रम मिस्री, सचिव (पश्चिम) सिबी जॉर्ज, परराष्ट्र मंत्रालयाचे प्रवक्ते रणधीर जयस्वाल आणि संरक्षण राज्यमंत्री संजय सेठ यांच्यासह दोन्ही देशांचे वरिष्ठ अधिकारी उपस्थित होते.
बेल्जियमचे पंतप्रधान बार्ट डी वेव्हर हे पंतप्रधान नरेंद्र मोदी यांच्या निमंत्रणावरून तीन दिवसांच्या अधिकृत भारत दौऱ्यावर आले आहेत. त्यांच्यासोबत बेल्जियमचे संरक्षण आणि परकीय व्यापार मंत्री थियो फ्रँकेन तसेच वरिष्ठ अधिकारी आणि उद्योग क्षेत्रातील प्रतिनिधींचे शिष्टमंडळ भारतात आले आहे. या शिष्टमंडळात बेल्जियमच्या संरक्षण उद्योगातील प्रतिनिधींचाही समावेश आहे.
राजघाटावर महात्मा गांधींना अभिवादन
भारत दौऱ्याच्या सुरुवातीला पंतप्रधान डी वेव्हर यांनी राजघाट येथे महात्मा गांधींना अभिवादन केले. परराष्ट्र मंत्रालयाने दिलेल्या माहितीनुसार, यावेळी त्यांनी महात्मा गांधींच्या शांतता, अहिंसा आणि मानवी प्रतिष्ठेच्या विचारांना आदरांजली वाहिली.
20 वर्षांनंतर बेल्जियमच्या पंतप्रधानांचा भारत दौरा
फेब्रुवारी 2025 मध्ये बेल्जियमचे पंतप्रधानपद स्वीकारल्यानंतर डी वेव्हर यांचा हा पहिलाच भारत दौरा आहे. तसेच सुमारे दोन दशकांनंतर बेल्जियमच्या पंतप्रधानांचा भारत दौरा होत असल्याने या भेटीला विशेष महत्त्व प्राप्त झाले आहे. मार्च 2025 मध्ये प्रिन्सेस अॅस्ट्रिड यांच्या नेतृत्वाखाली बेल्जियमच्या आर्थिक मिशनने भारताला भेट दिली होती. या मिशनमध्ये कंपन्या, वाणिज्य मंडळे, शैक्षणिक संस्था आणि सार्वजनिक संस्थांमधील 338 प्रतिनिधी सहभागी झाले होते. या दौऱ्यादरम्यान 38 सामंजस्य करारांवर स्वाक्षऱ्या करण्यात आल्या होत्या.
Defence Cooperation वरही भर
दरम्यान, बेल्जियमचे संरक्षण आणि परकीय व्यापार मंत्री थियो फ्रँकेन यांनी भारताच्या तांत्रिक क्षमतेचे कौतुक करत संरक्षण क्षेत्रातील सहकार्य अधिक मजबूत करण्याची आवश्यकता व्यक्त केली. संरक्षण मंत्री राजनाथ सिंह यांनी गुरुवारी नवी दिल्लीत आपल्या बेल्जियमच्या समकक्षाचे स्वागत करून द्विपक्षीय संरक्षण सहकार्याबाबत व्यापक चर्चा केली. या बैठकीत दोन्ही देशांच्या औद्योगिक आणि उत्पादन क्षमतांमध्ये सहकार्य वाढविण्यावर भर देण्यात आला. भारत आणि बेल्जियम यांच्यातील अलीकडच्या काळातील वाढत्या संपर्कानंतर डी वेव्हर यांचा दौरा महत्त्वाचा मानला जात असून, या भेटीमुळे व्यापार, गुंतवणूक, संरक्षण, तंत्रज्ञान आणि औद्योगिक सहकार्याच्या क्षेत्रात दोन्ही देशांमधील भागीदारीला आणखी गती मिळण्याची अपेक्षा आहे.