Autonomous Electric Bus – चालकाविना धावणार बस, बीवायडी-मोगॉक्सची स्वयंचलित इलेक्ट्रिक बस सादर

सिंगापूरमध्ये ८.५ मीटरच्या स्वयंचलित बसचे अनावरण, उजव्या बाजूला स्टेअरिंगसह जागतिक पदार्पण

सिंगापूर : Autonomous Electric Bus – वाहतुकीच्या गर्दीतून स्वत:च मार्ग काढणारी, सिग्नल ओळखणारी आणि बसथांब्यावर अचूक थांबणारी बस आता प्रत्यक्षात येत आहे. इलेक्ट्रिक वाहन क्षेत्रातील आघाडीची कंपनी बीवायडी आणि स्वयंचलित वाहन तंत्रज्ञान क्षेत्रातील मोगॉक्स (बीवायडी) यांनी सिंगापूरमध्ये ‘बी-९०’ (बी९०) या ८.५ मीटर लांबीच्या स्वयंचलित इलेक्ट्रिक बसचे अनावरण केले. ‘सिंगापूर नागरी वाहतूक सप्ताह २०२६’मध्ये या बसचे जागतिक पदार्पण झाले. विशेष म्हणजे, उजव्या बाजूला स्टेअरिंग असलेले हे प्रारूप आंतरराष्ट्रीय बाजारपेठेतील सार्वजनिक वाहतुकीसाठी तयार करण्यात आले आहे.

कॅमेरे अन लेझर संवेदकांची नजर

बीवायडीच्या इलेक्ट्रिक बसच्या पायाभूत रचनेवर तयार केलेल्या या बसमध्ये मोगॉक्सची ‘मोगो ऑटोपायलट’ ही स्वयंचलित वाहन प्रणाली वापरण्यात आली आहे. कॅमेरे आणि लेझर आधारित लिडार संवेदकांच्या मदतीने ही बस रस्त्यांवरील वाहतूक, चौक आणि बसथांबे ओळखून मार्गक्रमण करू शकते. विविध देशांतील वाहतुकीचे नियम, रस्त्यांची स्थिती आणि हवामानानुसार या तंत्रज्ञानात बदल करता येणार आहेत.

ज्येष्ठ आणि दिव्यांग प्रवाशांसाठीही सोयीस्कर

बसची कमी उंचीची रचना आणि मागील बाजूचा कमी विस्तार यामुळे अरुंद रस्त्यांवर वळणे घेणे सोपे होणार आहे. तसेच ज्येष्ठ नागरिक आणि दिव्यांग प्रवाशांना बसमध्ये चढणे-उतरणे अधिक सुलभ होईल. दीर्घकाळ कार्यरत राहण्यासाठी बसची यंत्रणा आणि संवेदकांची रचनाही विशेष पद्धतीने विकसित करण्यात आली आहे.

२० हून अधिक शहरांत तंत्रज्ञानाचा विस्तार

मोगॉक्सने सिंगापूरच्या पहिल्या अधिकृत चौथ्या स्तरावरील स्वयंचलित बस प्रकल्पाचे कंत्राट मिळवले असून, भूमी परिवहन प्राधिकरणाची पहिल्या टप्प्यातील चाचणीही यशस्वी केली आहे. कम्फर्टडेलग्रो बससोबत कंपनीने स्थानिक प्रशिक्षण आणि स्वयंचलित वाहतुकीसाठी भागीदारी केली आहे. लक्झेंबर्ग आणि दक्षिण कोरियातही तिचे प्रकल्प सुरू आहेत. चीनमधील २० हून अधिक शहरांत मोगॉक्सच्या स्वयंचलित बस पर्यटन, सार्वजनिक वाहतूक आणि प्रवासी वाहतूक सेवांसाठी कार्यरत आहेत. चालकाविना धावणाऱ्या बसमुळे सार्वजनिक वाहतुकीचे भविष्य बदलण्याची शक्यता निर्माण झाली आहे. सुरक्षितता, विश्वासार्हता आणि कार्यक्षमतेची कसोटी पार केल्यास ही तंत्रज्ञानक्रांती प्रवाशांच्या दैनंदिन प्रवासाला नवी दिशा देऊ शकते.

Read About: Cultivated Meat – प्रयोगशाळेत तयार होणारे मांस पशुपालनाची जागा घेणार?
E-Paper : Punyanagari E-Paper