पंतप्रधान मोदींनीही केले देशी ॲव्होकॅडो शेतीचे कौतुक
नवी दिल्ली : एककाळी भारतीय घरांमध्ये फारसा परिचित नसलेला ॲव्होकॅडो हा फळप्रकार आता केवळ कॅफेपुरता मर्यादित न राहता, भारतातील शहरी भागातील ‘जनरेशन झेड’ तरुणांच्या दैनंदिन नाश्त्याचा एक महत्त्वाचा भाग बनला आहे. सुपरमार्केटच्या रॅकपासून ते हॉटेलच्या मेनूपर्यंत ॲव्होकॅडो टोस्टचा दबदबा दिवसेंदिवस वाढत चालला आहे.
भारताच्या खाद्यसंस्कृतीत होत असलेल्या या शांत पण मोठ्या बदलाची नोंद थेट पंतप्रधान नरेंद्र मोदी यांनी घेतली आहे. त्यांनी आपल्या सोशल मीडिया रीलच्या माध्यमातून, भारतातच उगवल्या जाणाऱ्या देशी ॲव्होकॅडोच्या वाढत्या लोकप्रियतेवर प्रकाश टाकला आहे. पूर्वी दुर्मिळ असणारे हे फळ आता देशातील घराघरांत आणि उपहारगृहांमध्ये नियमित दिसू लागले आहे, याकडे त्यांनी लक्ष वेधले.
आंध्र प्रदेशातील शेतकऱ्याची यशस्वी यशोगाथा
पंतप्रधानांनी आंध्र प्रदेशातील कर्पा वरदराज या शेतकऱ्याच्या यशाची खास गोष्ट सांगत त्यांचे कौतुक केले. मित्राच्या शेतात ॲव्होकॅडो पाहिल्यानंतर आणि यु-ट्यूबवरून या पिकाबद्दल अधिक माहिती घेतल्यानंतर वरदराज यांनी आपल्या शेतात ॲव्होकॅडोची लागवड सुरू केली. आज ते दरवर्षी तब्बल चार टन ॲव्होकॅडोचे उत्पन्न घेत असून, ते थेट स्थानिक दुकानांमध्ये आणि बाजारात विकत आहेत. गेल्या काही वर्षांत आरोग्याविषयी वाढलेली जागरूकता आणि शेतीतील नवनवीन प्रयोगांमुळे भारतातील कृषी क्षेत्रात व खाण्यापिण्याच्या सवयींमध्ये एक सकारात्मक बदल घडताना दिसत आहे.