बिग बॉस फेम सोनिया बन्सलही झळकणार
मुंबई : बॉलीवूडमध्ये सध्या चर्चेत असलेल्या ‘मालामाल वीकली २’ या आगामी विनोदी चित्रपटाची स्टारकास्ट दिवसेंदिवस मोठी होत आहे. आता या चित्रपटात अभिनेत्री ईशा देओल आणि ‘बिग बॉस १७’ फेम सोनिया बन्सल यांचीही वर्णी लागली आहे. दोघींनी या चित्रपटासाठी होकार दिल्याची माहिती समोर आली आहे.
ईशा देओलने यापूर्वी विविध प्रकारच्या भूमिका साकारल्या आहेत. विशेषत: विनोदी चित्रपटांमधील तिच्या कामाचीही चर्चा झाली होती. काही काळ अभिनयापासून दूर राहिल्यानंतर ईशा पुन्हा रुपेरी पडद्यावर परतण्यासाठी चांगल्या कथेच्या शोधात होती. ‘मालामाल वीकली २’ची कथा आणि तिची भूमिका आवडल्याने तिने या चित्रपटाचा स्वीकार केल्याचे सांगितले जात आहे. त्यामुळे ईशाच्या कमबॅकची चाहत्यांमध्ये उत्सुकता वाढली आहे.
दुसरीकडे, सोनिया बन्सलने ‘बिग बॉस १७’मधून प्रेक्षकांचे लक्ष वेधून घेतले होते. शोमधील तिच्या सहभागामुळे तिला चांगली लोकप्रियता मिळाली. त्यानंतर तिने काही चित्रपट आणि म्यूझिक व्हिडिओंमध्येही काम केले आहे. तिच्या स्क्रीन प्रेझेन्समुळे निर्मात्यांनी तिला चित्रपटातील एका महत्त्वाच्या भूमिकेसाठी निवडल्याचे वृत्त आहे.
‘मालामाल वीकली २’चे दिग्दर्शन अमित जोशी करणार आहेत. या चित्रपटात रवीना टंडन, परिणीती चोप्रा, शिल्पा शिरोडकर, एल्विश यादव, राजपाल यादव, फरदीन खान आणि महेश मांजरेकर यांच्याही भूमिका आहेत.
चित्रपटाची कथा पहिल्या भागापेक्षा वेगळी असेल. मात्र, पैशांचा मोह, अचानक मिळणारी श्रीमंती आणि त्यातून निर्माण होणारा गोंधळ हा विनोदी रंग कायम ठेवण्यात येणार आहे. चित्रपटाचे चित्रीकरण नोव्हेंबर २०२६ मध्ये सुरू होण्याची शक्यता आहे.