Mirzapur movie controversy : भाजप नेत्याची गाणे हटवण्याची मागणी
जयपूर : Mirzapur The Movie Shoorveer song controversy : ‘मिर्झापूर द मूव्ही’ रिलीज होण्यापूर्वीच एका गाण्यावरून वाद सुरू झाला आहे. राजस्थानचे भाजप नेते राजेंद्र राठोड यांनी चित्रपटातील ‘शूरवीर’ या गाण्यावर आक्षेप घेतला आहे. हे गाणे महाराणा प्रताप यांना समर्पित आहे. मात्र, चित्रपटात हे गाणे गँगस्टर आणि गुन्हेगारी पात्रांच्या दृश्यांसोबत दाखवण्यात आल्याचा दावा राठोड यांनी केला आहे.
गाणे हटवण्याची मागणी
राजेंद्र राठोड यांनी या प्रकरणी केंद्रीय चित्रपट प्रमाणन मंडळाच्या अध्यक्षांना पत्र लिहिले आहे. चित्रपटातून ‘शूरवीर’ गाणे हटवावे, अशी मागणी त्यांनी केली आहे. हे पत्र त्यांनी सोशल मीडियावरही शेअर केले आहे. भविष्यात ऐतिहासिक व्यक्तींशी संबंधित गाणी, प्रतीके किंवा संदर्भांचा चुकीच्या पद्धतीने वापर होणार नाही, याची काळजी घ्यावी, असेही त्यांनी म्हटले आहे.
‘लोकांच्या भावना दुखावू शकतात’
राठोड यांच्या म्हणण्यानुसार, राजस्थानी गायक रैपरिया बालम यांच्या ‘शूरवीर’ गाण्याचा वापर चित्रपटातील गँगस्टर आणि गुन्हेगारी पात्राच्या दृश्यांमध्ये करण्यात आला आहे. हा प्रकार योग्य नसून त्यामुळे लोकांच्या भावना दुखावू शकतात, असे त्यांनी म्हटले आहे. त्यांच्या मते, अशा प्रकारे गाणे दाखवल्यामुळे महाराणा प्रताप यांच्या सन्मानाला आणि त्यांच्या ऐतिहासिक वारशाला धक्का बसू शकतो.
‘वीरता आणि गुन्हेगारी एकसारखी नाही’
राठोड यांनी म्हटले आहे की, महाराणा प्रताप यांच्याशी जोडलेली वीरता, त्याग आणि स्वाभिमान यांचा गुन्हेगारीशी संबंध जोडणे योग्य नाही. वीरता आणि गँगस्टर संस्कृतीमध्ये मोठा फरक आहे, असे त्यांनी स्पष्ट केले. त्यामुळे ‘मिर्झापूर द मूव्ही’मधून ‘शूरवीर’ गाणे काढून टाकावे, अशी मागणी त्यांनी केली आहे. दरम्यान, या प्रकरणावर ‘मिर्झापूर द मूव्ही’चे निर्माते किंवा कलाकारांकडून अद्याप कोणतीही अधिकृत प्रतिक्रिया आलेली नाही.