Paper Straws Environmental Impact – कागदी स्ट्रॉचा पर्यावरणीय धोका प्लास्टिकपेक्षा 6.33 पट अधिक?

दक्षिण कोरियातील अभ्यासाचा निष्कर्ष; जैवविघटनशील आणि जैवआधारित स्ट्रॉबाबतही चिंता, एकदाच वापरल्या जाणाऱ्या वस्तूंचा वापर कमी करण्याची संशोधकांची शिफारस

सेऊल : Paper Straws Environmental Impact प्लास्टिक स्ट्रॉला पर्यावरणपूरक पर्याय म्हणून कागदी स्ट्रॉचा वापर वाढत असतानाच, एका नव्या संशोधनाने या पर्यायावर प्रश्नचिन्ह उपस्थित केले आहे. दक्षिण कोरियातील अभ्यासानुसार, कागदी स्ट्रॉच्या संपूर्ण जीवनचक्रातील संभाव्य कर्करोगकारक पर्यावरणीय परिणाम पारंपरिक प्लास्टिक स्ट्रॉच्या तुलनेत ६.३३ पट अधिक असल्याचे आढळले. मात्र, हा निष्कर्ष स्ट्रॉ वापरणाऱ्या व्यक्तींना कर्करोग होण्याच्या धोक्याबाबत नसून उत्पादन, वापर आणि विल्हेवाट प्रक्रियेतील उत्सर्जनावर आधारित आहे.

दक्षिण कोरियाच्या हवामान, ऊर्जा आणि पर्यावरण मंत्रालयाच्या वतीने करण्यात आलेल्या अभ्यासात चार प्रकारच्या स्ट्रॉची तुलना करण्यात आली. त्यात पारंपरिक प्लास्टिक, कागदी, जैवविघटनशील प्लास्टिक आणि जैवआधारित पॉलीथिलीन (बायो-पे) यांचा समावेश होता. Paper Straws Environmental Impact

पारंपरिक प्लास्टिकच्या तुलनेत ‘बायो-पे’चा संभाव्य धोका १६.१८ पट, कागदी स्ट्रॉचा ६.३३ पट, तर जैवविघटनशील प्लास्टिकचा ३.३४ पट असल्याचे संशोधनात नमूद करण्यात आले. ‘बायो-पे’ ऊसासारख्या वनस्पतींपासून तयार होत असले तरी ते सामान्य पॉलीथिलीनसारखेच असून जैवविघटनशील नाही. Paper Straws Environmental Impact

विल्हेवाटीचाही विचार

अभ्यासात वापरलेल्या स्ट्रॉपैकी ७३.६ टक्के जाळले जातात, तर २६.४ टक्के कचरा डेपोमध्ये टाकले जातात. स्ट्रॉचा लहान आकार, त्यावरील कोटिंग आणि चिकट पदार्थ यामुळे पुनर्वापरही कठीण ठरतो.

वापर कमी करण्यावर भर

संशोधकांच्या मते, केवळ प्लास्टिक स्ट्रॉवर बंदी घालणे पुरेसे नाही. दुकानदारांनी ग्राहकांना विनंती केल्याशिवाय कोणत्याही प्रकारचा विघटनशील स्ट्रॉ देऊ नये. एकूणच एकदाच वापरल्या जाणाऱ्या वस्तूंचा वापर कमी करणे हाच अधिक प्रभावी पर्याय असल्याचे अभ्यासातून सूचित होते.

Read About : Wildlife Water Scarcity in Marathwada – जंगलातील पाणवठे आटण्याच्या मार्गावर, मानव-वन्यजीव संघर्ष निर्माण होणार ?
E-Paper: Punyanagari E-Paper