सायबेरियाच्या केमेरोवो प्रदेशातील दुर्घटना : हवेतच इंजिनने घेतला होता पेट
मॉस्को : Russian Military Plane Crash – रशियाचे एक लष्करी मालवाहू विमान हवेतच आग लागल्यानंतर जमिनीवर कोसळले. सायबेरिया भागात घडलेल्या या दुर्घटनेत विमानातील सर्व १७ जणांचा मृत्यू झाल्याचे वृत्त आहे.
सोव्हियत काळातील अंतोनोव्ह एएन-१२ हे मालवाहू विमान रशियाच्या केमेरोवो प्रदेशातील यागुनोव्हो गावाजवळ कोसळले. व्हिडिओत विमान आकाशातून वेगाने खाली येताना आणि त्यानंतर जमिनीवर कोसळून त्याचा जोरदार स्फोट झाल्याचे दिसते.
विमान हवेत असताना त्याच्या एका इंजिनला आग लागली होती. त्यामुळे ते कोसळले. ‘ते दगडाप्रमाणे खाली पडले,’ असे एका साक्षीदाराने सांगितले. ‘मी तेव्हा खिडकीतून बाहेर पाहत होते. विमान आगीत आकाशात उडत होते, नंतर ते अचानक खाली कोसळले आणि स्फोट झाला,’ असे आणखी एका महिलेने सांगितले.
जुन्या काळातील हे विमान रात्रीच्या अंधारात कोसळले. तेव्हा सायबेरियातील जमिनीवर बर्फ होता आणि तापमान सुमारे उणे ५ अंश सेल्सिअस होते. ‘मी अपघातस्थळी जात आहे. आपत्कालीन सेवा तिथे काम करत आहेत. प्रदेशाकडून आवश्यक मदत दिली जात आहे,’ असे केमेरोवो प्रदेशाचे राज्यपाल इल्या सेरेद्युक यांनी सांगितले. क्रेमलिनसमर्थक ‘रीडोव्का’ वृत्तसंस्थेनुसार, अपघाताच्या वेळी विमानात सहा वैमानिक, कर्मचारी आणि बारा प्रवासी होते. सर्व १७ जणांचा मृत्यू झाल्याची शक्यता आहे.
विमान कुठून कुठे जात होते?
विमान कोसळल्यानंतर त्याच्या मोहिमेबद्दल सुरुवातीला कोणतीही माहिती देण्यात आली नाही. हे विमान युक्रेनमधील युद्धभूमीपासून सुमारे २,१०० मैल अंतरावर कोसळले. अपघाताचे स्थान मॉस्कोपासून १,८५० मैल पूर्वेस आहे. विमान सायबेरियाची अनौपचारिक राजधानी म्हणून ओळखल्या जाणाऱ्या नोवोसिबिर्स्कपासून क्रास्नोयार्स्क प्रदेशातील कान्सकडे जात होते, असे वृत्त आहे. दोन्ही शहरांमधील अंतर सुमारे ५०५ मैल आहे.
आगीवर नियंत्रण
कान्स येथे कान्स-दाल्नी नावाचे मोठे लष्करी विमानतळ आहे. तेथे मिग-३१ प्रकारची लढाऊ विमाने असतात; हीच विमाने व्लादिमीर पुतिन यांच्या युक्रेनविरुद्धच्या युद्धात वापरली जातात. अपघातानंतर लागलेली आग आता विझवण्यात आली आहे. अपघाताचे स्थान दुर्गम यागुनोव्हो गावाजवळ आहे. विमानाचे वय सुमारे ५३ ते ६९ वर्षांचे असावे, असा अंदाज वृत्तांमध्ये व्यक्त केला आहे.
Read About : Assam Train Accident Emergency Brake Failure Video – ‘इमर्जन्सी ब्रेक काम करत नाहीये…’ आसाम रेल्वे अपघातापूर्वीचा धक्कादायक व्हिडिओ समोर!
E-Paper: Punyanagari E-Paper


Comments
Comments will appear here.
Comments are submitted for administrator moderation before appearing publicly.