भारतीय, विशेषतः कन्नड चित्रपटसृष्टीतील प्रदीर्घ योगदानाची दखल; 72व्या राष्ट्रीय चित्रपट पुरस्कार सोहळ्यात होणार सन्मान
नवी दिल्ली : Dadasaheb Phalke Award: ज्येष्ठ अभिनेते अनंत नाग यांची भारतीय चित्रपटसृष्टीतील योगदानासाठी दादासाहेब फाळके पुरस्कारासाठी निवड करण्यात आली आहे. माहिती आणि प्रसारण मंत्रालयाच्या वतीने बुधवारी याबाबतची घोषणा करण्यात आली. दीर्घकाळ चित्रपटसृष्टीत केलेल्या उल्लेखनीय कामगिरीसाठी, विशेषतः कन्नड चित्रपटसृष्टीतील योगदानाची दखल घेत त्यांना हा सन्मान देण्यात येणार आहे. पंतप्रधान नरेंद्र मोदी यांनीही अनंत नाग यांचे या सन्मानाबद्दल अभिनंदन केले. समाजमाध्यमावरील पोस्टद्वारे त्यांनी अनंत नाग यांच्या अभिनयातील सहजता, विविध भूमिका साकारण्याची क्षमता आणि प्रभावी अभिनयाचे कौतुक केले.
पंतप्रधान मोदी यांनी म्हटले की, अनेक दशकांपासून अनंत नाग यांनी आपल्या अभिनयातून भारतीय चित्रपटसृष्टीवर ठसा उमटवला आहे. विशेषतः कन्नड चित्रपटसृष्टीत त्यांनी साकारलेल्या विविध भूमिकांना खोली आणि वास्तवतेची जोड दिली. त्यांना मिळालेला हा सन्मान योग्य असल्याचेही पंतप्रधानांनी नमूद केले. अनंत नाग यांना हा पुरस्कार २२ सप्टेंबर २०२६ रोजी गुजरातमधील एकता नगर, केवडिया येथे होणाऱ्या ७२व्या राष्ट्रीय चित्रपट पुरस्कार सोहळ्यात प्रदान करण्यात येणार आहे.
अनंत नाग यांचा जन्म ४ सप्टेंबर १९४८ रोजी अनंत नागरकट्टे या नावाने झाला. कन्नड चित्रपटसृष्टीतील परिचित नाव असलेल्या अनंत नाग यांनी आतापर्यंत ३०० हून अधिक चित्रपटांमध्ये काम केले आहे. यामध्ये २५० हून अधिक कन्नड चित्रपटांचा समावेश आहे. कन्नडसोबतच त्यांनी हिंदी, तेलुगू, तमिळ, मराठी, मल्याळम आणि इंग्रजी भाषेतील चित्रपटांमध्येही भूमिका साकारल्या आहेत. विविध भाषांमधील चित्रपटांमधून त्यांनी आपल्या अभिनयाची वेगळी ओळख निर्माण केली. चित्रपटांसोबतच अनंत नाग यांनी दूरदर्शन मालिकांमध्येही काम केले आहे. आर. के. नारायण यांच्या साहित्यावर आधारित लोकप्रिय ‘मालगुडी डेज’ या दूरदर्शन मालिकेतही ते सहभागी होते.
अनंत नाग यांच्या प्रदीर्घ कारकिर्दीत त्यांना पाच कर्नाटक राज्य चित्रपट पुरस्कार मिळाले आहेत. २०२५ मध्ये भारत सरकारने त्यांना देशातील तिसरा सर्वोच्च नागरी सन्मान ‘पद्मभूषण’ देऊन गौरवले. दादासाहेब फाळके पुरस्कार हा भारतीय चित्रपटसृष्टीतील योगदानासाठी भारत सरकारकडून दिला जाणारा सर्वोच्च सन्मान आहे. हा पुरस्कार राष्ट्रीय चित्रपट पुरस्कार सोहळ्याचा एक भाग म्हणून प्रदान केला जातो.
अनंत नाग यांची कारकीर्द
अनंत नाग यांनी ३०० हून अधिक चित्रपटांमध्ये काम केले असून, त्यापैकी २५० हून अधिक चित्रपट कन्नड भाषेतील आहेत. हिंदीसह तेलुगू, तमिळ, मराठी, मल्याळम आणि इंग्रजी चित्रपटांमध्येही त्यांनी भूमिका साकारल्या आहेत.
पुरस्कार आणि सन्मान
अनंत नाग यांना पाच कर्नाटक राज्य चित्रपट पुरस्कार मिळाले आहेत. २०२५ मध्ये त्यांना पद्मभूषण पुरस्काराने सन्मानित करण्यात आले. आता दादासाहेब फाळके पुरस्काराने त्यांच्या प्रदीर्घ चित्रपट कारकिर्दीचा गौरव होणार आहे.
Read About : Ganesh Chaturthi 2026
E-Paper: Punyanagari E-Paper
You need an account to post comments.