एनआयटी राउरकेलाने विकसित केले नवे तंत्रज्ञान, मिळाले पेटंट
नवी दिल्ली : NIT Rourkela EV Charging Technology – देशात इलेक्ट्रिक वाहनांचा वापर वेगाने वाढत आहे. मात्र, एकाच वेळी अनेक वाहने चार्ज केल्यास विजेची मागणी अचानक वाढते. तसेच ढगाळ हवामानामुळे सौरऊर्जेची निर्मिती कमी-जास्त होते. या समस्यांवर उपाय शोधण्यासाठी एनआयटी राउरकेलाच्या संशोधकांनी एक नवीन तंत्रज्ञान विकसित केले आहे. या स्मार्ट वीज व्यवस्थापन प्रणालीला पेटंट मिळाले असून, त्यामुळे इलेक्ट्रिक वाहनांचे चार्जिंग अधिक सोपे, सुरक्षित आणि विश्वासार्ह होण्यास मदत होणार आहे.
सौरऊर्जा आणि बॅटरीचा एकत्रित वापर
एनआयटी राउरकेलाचे प्राध्यापक प्रवत कुमार रे यांच्या मार्गदर्शनाखाली संशोधकांनी सौरऊर्जेवर चालणारी विशेष चार्जिंग व्यवस्था तयार केली आहे. या प्रणालीमध्ये सौर पॅनेल, नियमित वीजपुरवठा, बॅटरी आणि सुपरकॅपॅसिटर यांचा एकत्रित वापर केला जातो. त्यामुळे विजेची मागणी आणि उपलब्ध वीज यांचा समतोल राखता येतो.
बॅटरीचे आयुष्य वाढण्यास मदत
या तंत्रज्ञानात बॅटरी आणि सुपरकॅपॅसिटर वेगवेगळी कामे करतात. चार्जिंग केंद्रावर अचानक विजेची मागणी वाढल्यास सुपरकॅपॅसिटर त्वरित अतिरिक्त वीज पुरवतो, तर बॅटरी दीर्घकाळ वीजपुरवठा सांभाळते. त्यामुळे बॅटरीवर अचानक ताण येत नाही आणि तिचे आयुष्य वाढण्यास मदत होते.
वाहनातील वीज पुन्हा वीज यंत्रणेला देता येणार
या प्रणालीचे आणखी एक वैशिष्ट्य म्हणजे गरज पडल्यास इलेक्ट्रिक वाहनांच्या बॅटरीमधील वीज पुन्हा मुख्य वीज यंत्रणेला देता येणार आहे. या तंत्रज्ञानाला ‘व्हेइकल टू ग्रिड’ म्हणतात. तसेच वाहनाच्या बॅटरीमध्ये किती वीज शिल्लक आहे, यानुसार चार्जिंगसाठी लागणारा वीजपुरवठाही आपोआप नियंत्रित करता येतो.
संशोधकांनी या प्रणालीचे प्रारूप तयार करून सौरऊर्जेतील बदल आणि विजेच्या वाढत्या मागणीच्या परिस्थितीत त्याच्या यशस्वी चाचण्या केल्या आहेत. विद्युत अभियांत्रिकी विभागाचे सहयोगी प्राध्यापक अर्णब घोष यांनी सांगितले की, भविष्यात हे तंत्रज्ञान मोठ्या क्षमतेच्या चार्जिंग केंद्रांसाठी विकसित केले जाणार आहे. त्यासाठी प्रत्यक्ष वापराच्या चाचण्याही करण्यात येणार आहेत.
इलेक्ट्रिक वाहनांचा वापर वाढत असताना चार्जिंगची सुविधाही अधिक चांगली होणे गरजेचे आहे. एनआयटी राउरकेलाचे हे संशोधन भविष्यात स्वच्छ ऊर्जा आणि इलेक्ट्रिक वाहनांच्या क्षेत्रात महत्त्वाचे ठरू शकते.
Read About: Mylar Plastic Insulation – चंद्रावरील घरांसाठी प्लास्टिकचे मजबूत इन्सुलेशन
E-Paper : Punyanagari E-Paper


Comments
Comments will appear here.
Comments are submitted for administrator moderation before appearing publicly.