Unnati Hooda Asian Games 2026 : उन्नती हुड्डाची दमदार कामगिरी; वोंग लिंग चिंगचा पराभव करत प्री-क्वार्टरमध्ये प्रवेश

मलेशियाच्या वोंगवर 21-14, 20-22, 21-19 असा विजय; पुढील फेरीत इंडोनेशियाच्या पुत्री कुसुमा वारदानीशी सामना

आयची-नागोया (जपान) : Unnati Hooda Asian Games 2026 : आशियाई क्रीडा स्पर्धा 2026 मध्ये भारताची युवा बॅडमिंटनपटू उन्नती हुड्डाने महिला एकेरीत दमदार कामगिरी करत प्री-क्वार्टरफायनलमध्ये प्रवेश केला. उन्नतीने मलेशियाच्या वोंग लिंग चिंग हिचा तीन गेमच्या रंगतदार लढतीत 21-14, 20-22, 21-19 असा पराभव केला. जागतिक क्रमवारीत 25 व्या स्थानावर असलेल्या उन्नतीने सामन्याची सुरुवात आक्रमक पद्धतीने केली. तिने पहिला गेम 21-14 असा सहज जिंकत आघाडी घेतली. मात्र, 38 व्या क्रमांकावरील वोंगने दुसऱ्या गेममध्ये जोरदार पुनरागमन केले. दुसऱ्या गेममध्ये उन्नतीने मध्यंतरापर्यंत चांगली आघाडी घेतली होती. मात्र, कोर्ट बदलल्यानंतर सामन्याचे चित्र बदलले. वोंगने आक्रमक खेळ करत 17-16 अशी आघाडी मिळवली आणि अखेर दुसरा गेम 22-20 असा जिंकत सामना 1-1 असा बरोबरीत आणला.

निर्णायक गेममध्ये उन्नतीचा संयमी खेळ

• निर्णायक गेममध्ये दोन्ही खेळाडूंमध्ये सुरुवातीपासूनच चुरस पाहायला मिळाली. महत्त्वाच्या क्षणी उन्नतीने संयम राखत 20-18 अशी आघाडी घेत दोन मॅच पॉइंट मिळवले.
• वोंगने यातील एक मॅच पॉइंट वाचवला. मात्र, पुढच्याच गुणावर तिचा क्रॉस-कोर्ट फटका बाहेर गेला आणि उन्नतीने निर्णायक गेम 21-19 असा जिंकत सामना आपल्या नावावर केला.
• या विजयासह उन्नतीने महिला एकेरीच्या प्री-क्वार्टरफायनलमध्ये प्रवेश केला आहे. आता तिच्यासमोर इंडोनेशियाची पुत्री कुसुमा वारदानी हिचे आव्हान असेल.

भारताची पदकांचीही दमदार सुरुवात

• दरम्यान, भारताने आशियाई क्रीडा स्पर्धेच्या या दिवशी पदकांची चांगली सुरुवात केली. सावन बरवालने पुरुषांच्या मॅरेथॉनमध्ये 2:11:37 अशी राष्ट्रीय विक्रमी वेळ नोंदवत रौप्यपदक जिंकले.
• नेमबाजीत आशी चौकसे, तिलोत्तमा सेन आणि विदार्सा विनोद यांनी महिलांच्या 50 मीटर रायफल थ्री पोझिशन सांघिक प्रकारात रौप्यपदक मिळवले. तिलोत्तमा आणि विदार्सा यांनी वैयक्तिक अंतिम फेरीसाठीही पात्रता मिळवली.
• स्क्वॉशमध्ये जोशना चिनप्पा आणि वेळावन सेंथिलकुमार यांनी मिश्र दुहेरीत कांस्यपदक मिळवले. उपांत्य फेरीत हाँगकाँगच्या जोडीकडून त्यांना निसटता पराभव पत्करावा लागला.
• बॅडमिंटनमध्ये लक्ष्य सेनचे पुरुष एकेरीतील आव्हान दुसऱ्या फेरीत संपले. त्याला सिंगापूरच्या लो कीन यूकडून पराभव स्वीकारावा लागला.
• तिरंदाजीत महिलांच्या कंपाउंड सांघिक पात्रता फेरीत चिकिता तनीपार्थी, ज्योती सुरेखा वेन्नम आणि पृथिका प्रदीप यांनी दुसरे स्थान मिळवले. पुरुषांच्या रिकर्व सांघिक पात्रता फेरीत धीरज बोम्मदेवरा, नीरज चौहान आणि यशदीप भोगे यांनी तिसरे स्थान मिळवले. धीरजने वैयक्तिक पात्रता फेरीत आशियाई आणि राष्ट्रीय विक्रम नोंदवला.
• अॅथलेटिक्समध्ये तेजस्विन शंकर आणि थॉफीक नुशाद दशक्रीडा स्पर्धेत पदकाच्या शर्यतीत कायम आहेत. अनिमेष कुजूरने 200 मीटर धावण्याच्या पात्रता फेरीत अव्वल स्थान मिळवत उपांत्य फेरी गाठली.
• कॅनो स्प्रिंटमध्ये पार्वती गीता आणि प्रसन्न कुमार यांनी मिश्र कयाक दुहेरी 500 मीटरच्या अंतिम फेरीत प्रवेश केला. तर हर्षवर्धन शक्तावत अंतिम फेरी ‘बी’साठी पात्र ठरला.
• टेबल टेनिसमध्ये यशस्विनी घोरपडे आणि मनुष शाह यांचे एकेरीतील आव्हान संपले. ई-स्पोर्ट्समध्ये पारितोषला प्युयो प्युयो चॅम्पियन्सच्या उपांत्यपूर्व फेरीत पराभव स्वीकारावा लागला.

Read About : Sawan Barwal Asian Games 2026 : सावन बरवालच्या ऐतिहासिक रौप्याचे राष्ट्रपती मुर्मूंकडून कौतुक
E-Paper: Punyanagari E-Paper