Farah Khan paparazzi video – ‘सलमानने सांगितलं होतं ना…?’,- फराह

फराह खानने पापाराझींना सुनावले, व्हिडीओ व्हायरल

मुंबई : Farah Khan paparazzi video – अभिनेत्री आणि दिग्दर्शिका फराह खानचा एक व्हिडीओ सध्या सोशल मीडियावर मोठ्या प्रमाणात व्हायरल होत आहे. या व्हिडीओमध्ये फराह खान पापाराझींना मागून फोटो काढू नका, असे स्पष्टपणे सांगताना दिसत आहे. यावेळी तिने अभिनेता सलमान खानच्या नुकत्याच केलेल्या वक्तव्याचीही आठवण करून दिली. फराह खानच्या या भूमिकेला सोशल मीडिया युजर्सकडून चांगला भरभरून प्रतिसाद मिळत आहे. अनेकांनी तिच्या स्पष्ट बोलण्याचे कौतुक केले आहे.

पापाराझींना फराह खानने काय सांगितले?

व्हायरल झालेल्या व्हिडीओमध्ये फराह खान एका ठिकाणाहून बाहेर पडून आपल्या कारकडे जाताना दिसत आहे. त्यावेळी काही पापाराझी तिचे फोटो आणि व्हिडीओ शूट करत होते. फराह कारच्या दिशेने जात असताना पापाराझी तिचे मागून फोटो काढण्याचा प्रयत्न करतात. हे लक्षात येताच फराह थांबते आणि त्यांना तसे न करण्यास सांगते.
यावेळी फराह म्हणते, ”सलमानने सांगितलं होतं ना की मागून फोटो काढायचे नाहीत. टर्न करा… टर्न करा लवकर.”
फराहने पापाराझींना थेट आणि स्पष्ट शब्दांत ही सूचना दिली. त्यानंतर ती पुढे निघून जाते. तिचा हा व्हिडीओ सोशल मीडियावर शेअर झाल्यानंतर त्यावर मोठ्या प्रमाणात प्रतिक्रिया येत आहेत.

सलमान खाननेही पापाराझींना फटकारले होते

काही दिवसांपूर्वी ‘बिग बॉस २०’च्या ‘वीकेंड का वार’मध्ये सलमान खानने पापाराझींच्या फोटोग्राफीच्या पद्धतीवर नाराजी व्यक्त केली होती.
सेलिब्रिटींचे चुकीच्या किंवा अस्वस्थ करणाऱ्या अँगलमधून फोटो आणि व्हिडीओ काढण्याबाबत सलमानने पापाराझींना सुनावले होते. आपल्या सहकाऱ्यांचे तसेच बहिणींचेही अशा प्रकारे फोटो काढले जात असल्याचा मुद्दा त्याने मांडला होता.
सलमानने अभिनेत्रींनाही अशा प्रकारे फोटो काढले जात असतील, तर त्याला विरोध करण्यास सांगितले होते. त्याच्या या वक्तव्याचीच आठवण फराह खानने पापाराझींना करून दिली.

सोशल मीडियावर फराहचे कौतुक

फराह खानचा हा व्हिडीओ समोर आल्यानंतर सोशल मीडिया युजर्सनी तिच्या भूमिकेवर प्रतिक्रिया दिल्या आहेत. अनेकांनी तिचे समर्थन केले आहे. एका युजरने ‘वेल डन’ अशी प्रतिक्रिया दिली. तर दुसऱ्या युजरने ‘बहुत अच्छे’ असे म्हटले. काही युजर्सनी सलमान खानने याआधी मांडलेल्या भूमिकेचाही उल्लेख केला. यामुळे सेलिब्रिटींचे फोटो काढताना पापाराझींनी कोणत्या मर्यादा पाळाव्यात, यावर सोशल मीडियावर पुन्हा चर्चा सुरू झाली आहे.

फराह खान ‘लॉक अप’च्या दुसऱ्या सीझनमध्ये

दरम्यान, फराह खान सध्या आणखी एका कारणामुळे चर्चेत आहे. रिॲलिटी शो ‘लॉक अप: सच या सजा’ दुसऱ्या सीझनसह प्रेक्षकांच्या भेटीला येणार आहे. या सीझनमध्ये रितेश देशमुख आणि फराह खान पुन्हा जेलरच्या भूमिकेत दिसणार आहेत. हा शो नेटफ्लिक्सवर स्ट्रीम होणार असल्याची माहिती आहे.
मात्र, शोच्या दुसऱ्या सीझनमधील स्पर्धकांची अधिकृत यादी आणि प्रीमियरची तारीख अद्याप जाहीर करण्यात आलेली नाही. दरम्यान, फराह खानचा पापाराझींना सुनावतानाचा व्हिडीओ सोशल मीडियावर चर्चेत असून, तिच्या स्पष्ट भूमिकेवर युजर्सकडून विविध प्रतिक्रिया पाहायला मिळत आहेत.

Read About : Koffee With Karan Final Season – करण जोहरचा शो अखेर निरोप घेणार; 14 ऑक्टोबरपासून शेवटचा सीझन
E-Paper: Punyanagari E-Paper