Dongarale Murder Case – साडेचार वर्षांच्या बालिकेवरील अत्याचार-हत्या प्रकरणात आरोपीला मृत्युदंड

मालेगाव न्यायालयाचा महत्त्वपूर्ण निकाल; ११ महिन्यांत खटल्याची सुनावणी पूर्ण, २४ साक्षीदारांची साक्ष

मालेगाव : Dongarale Murder Case नाशिक जिल्ह्यातील मालेगाव तालुक्यातील डोंगराळे येथे साडेचार वर्षांच्या बालिकेचे अपहरण, लैंगिक अत्याचार आणि हत्या केल्याच्या प्रकरणात मालेगाव न्यायालयाने आरोपी विजय खैरनार (वय २४, रा. डोंगराळे) याला मृत्युदंडाची शिक्षा सुनावली आहे. शुक्रवारी, १६ ऑक्टोबर रोजी अपर जिल्हा व सत्र न्यायालयात हा निकाल सुनावण्यात आला. जलदगतीने चालविण्यात आलेल्या या खटल्याचा निकाल घटनेनंतर सुमारे ११ महिन्यांत लागला. पीडित कुटुंबाला शासनाच्या मनोधैर्य योजनेंतर्गत १० लाख रुपयांची मदत दिली जाणार असल्याची माहिती विशेष सरकारी वकील ॲड. उज्ज्वल निकम यांनी दिली.

२४ साक्षीदारांची साक्ष ठरली महत्त्वाची

डोंगराळे येथे १६ नोव्हेंबर २०२५ रोजी ही घटना घडली होती. या प्रकरणात आरोपीने बालिकेचे अपहरण करून तिच्यावर लैंगिक अत्याचार केल्यानंतर तिची हत्या केल्याचा आरोप होता. घटनेनंतर राज्यभर संताप व्यक्त करण्यात आला होता. आरोपीला कठोर शिक्षा देण्याची मागणीही करण्यात आली होती.

या प्रकरणाचा खटला जलदगती न्यायालयात चालविण्यात आला. न्यायालयात ४२५ पानांचे दोषारोपपत्र सादर करण्यात आले होते. सुनावणीदरम्यान २४ जणांच्या साक्षी नोंदविण्यात आल्या. त्यामध्ये एका सात वर्षीय बालकाची साक्ष महत्त्वपूर्ण ठरल्याचे वृत्त आहे.

विशेष सरकारी वकिलांचा युक्तिवाद

या खटल्यात विशेष सरकारी वकील ॲड. उज्ज्वल निकम यांनी सरकारच्या वतीने बाजू मांडली. न्यायालयाने पुरावे, साक्षी आणि युक्तिवादाचा विचार करून आरोपीला मृत्युदंडाची शिक्षा सुनावली. निकालाच्या पार्श्वभूमीवर न्यायालय परिसरात पोलिसांचा कडेकोट बंदोबस्त ठेवण्यात आला होता.

पीडित कुटुंबाला १० लाखांची मदत

पीडित कुटुंबाला शासनाच्या मनोधैर्य योजनेंतर्गत १० लाख रुपयांची मदत देण्यात येणार असल्याची माहिती विशेष सरकारी वकिलांनी दिली. या प्रकरणात न्यायालयाने मृत्युदंडाची शिक्षा सुनावली असली, तरी अशा शिक्षेच्या अंमलबजावणीपूर्वी कायद्यानुसार उच्च न्यायालयाची पुष्टी आवश्यक असते. त्यामुळे पुढील कायदेशीर प्रक्रिया महत्त्वाची ठरणार आहे.

Read About : Imran Khan Leave India Notice – अभिनेता इमरान खानच्या अडचणी वाढणार?
E-Paper: Punyanagari E-Paper