Asian Games Cricket Gold : भारताने पाकिस्तानला 19 धावांनी हरवत सलग दुसरे सुवर्ण जिंकले

अभिषेक शर्माची ६१ आणि तिलक वर्माची नाबाद ५१ धावांची वादळी खेळी

निशिन : Asian Games Cricket Gold भारतीय क्रिकेट संघाने आशियाई क्रीडा स्पर्धा २०२६ च्या अंतिम सामन्यात कट्टर प्रतिस्पर्धी पाकिस्तानचा १९ धावांनी पराभव करत ऐतिहासिक सुवर्णपदकावर नाव कोरले. कोरोगी स्पोर्ट्स पार्कच्या मैदानावर रंगलेल्या या थरारक सामन्यात भारताने दिलेल्या २१२ धावांच्या आव्हानाचा पाठलाग करताना पाकिस्तानचा संघ २० षटकांत ६ बाद १९२ धावांपर्यंतच मजल मारू शकला. या विजयासह भारताने आशियाई खेळांमध्ये सलग दुसऱ्यांदा सुवर्णपदक जिंकण्याचा पराक्रम केला आहे, तर पाकिस्तानला रौप्यपदकावर समाधान मानावे लागले.

अभिषेक आणि तिलकची वादळी अर्धशतके

यापूर्वी, नाणेफेक गमावून प्रथम फलंदाजी करणाऱ्या भारतीय संघाची सुरुवात खराब झाली होती. सलामीवीर वैभव सूर्यवंशी १५ धावांवर तर संजू सॅमसन अवघ्या २ धावांवर बाद झाले. कर्णधार श्रेयस अय्यर (२४ चेंडूंत २१ धावा) आणि इशान किशन (१८ चेंडूंत २० धावा) मोठी खेळी करू शकले नाहीत. मात्र, दुसऱ्या बाजूने अभिषेक शर्माने मैदानावर चौफेर फटकेबाजी करत अवघ्या २८ चेंडूंत ६१ धावांची धडाकेबाज खेळी केली. यात त्याने ३ चौकार आणि ७ गगनभेदी षटकार ठोकले.

अभिषेक बाद झाल्यानंतर उपकर्णधार तिलक वर्माने डावाची सूत्रे हाती घेतली. तिलकने अवघ्या २२ चेंडूंत ३ चौकार आणि ४ षटकारांच्या मदतीने नाबाद ५१ धावांची वादळी खेळी केली. त्याने शिवम दुबेच्या (२७ धावा) साथीने सहाव्या गड्यासाठी ६२ धावांची भागीदारी करत भारताला २० षटकांत ६ बाद २११ या धावसंख्येपर्यंत पोहोचवले. पाकिस्तानकडून अहमद दानियाल आणि अराफात मिन्हास यांनी प्रत्येकी २ बळी घेतले.

हसन नवाजची ९६ धावांची खेळी

२१२ धावांच्या मोठ्या आव्हानाचा पाठलाग करताना पाकिस्तानची सुरुवात अतिशय खराब झाली. साहिबजादा फरहान (१०) आणि उस्मान खान (३) स्वस्तात परतले, तर माज सदाकत २३ धावांवर बाद झाला. ३९ धावांवर ३ गडी गमावल्यामुळे पाकिस्तान संघ संकटात सापडला होता. यानंतर हसन नवाज आणि सॅम अय्युब (२९) यांनी चौथ्या गड्यासाठी ४८ चेंडूंत ८७ धावांची भागीदारी करत डाव सावरला.
पाकिस्तानचा फलंदाज हसन नवाजने एकाकी झुंज देत अवघ्या ५१ चेंडूंत ५ चौकार आणि ७ षटकारांसह ९६ धावांची झंझावाती खेळी केली. परंतु, तो पाकिस्तानला विजय मिळवून देण्यात अपयशी ठरला. भारताकडून अचूक गोलंदाजी करत अक्षर पटेल, वॉशिंग्टन सुंदर आणि शिवम दुबे यांनी प्रत्येकी २-२ बळी घेत पाकिस्तानच्या धावसंख्येला लगाम घातला.

Read About : Asian Games 2026 – प्रवीण हुड्डाला बॉक्सिंगमध्ये सुवर्ण
E-Paper: Punyanagari E-Paper