NMMS Scholarship Deadline Extension – एनएमएमएस शिष्यवृत्तीच्या अर्जासाठी मुदतवाढ

१५ नोव्हेंबरपर्यंत अर्ज करण्याची संधी | संस्था व जिल्हास्तरीय पडताळणीसाठीही निश्चित केल्या मुदती

छत्रपती संभाजीनगर : NMMS Scholarship Deadline Extension – आर्थिकदृष्ट्या दुर्बळ घटकांतील गुणवंत विद्यार्थ्यांना शिक्षणासाठी आर्थिक मदत मिळावी आणि आर्थिक अडचणींमुळे त्यांचे शिक्षण अर्धवट राहू नये, या उद्देशाने केंद्र सरकारकडून राबविण्यात येणाऱ्या राष्ट्रीय गुणवत्ता-सह-मान्यता शिष्यवृत्ती योजनेच्या (एनएमएमएस) २०२६-२७ या शैक्षणिक वर्षातील अर्ज प्रक्रियेला मुदतवाढ देण्यात आली आहे. केंद्रीय शिक्षण मंत्रालयाने शिष्यवृत्तीसाठी अर्ज सादर करण्याची अंतिम मुदत १५ नोव्हेंबर २०२६ पर्यंत वाढवली असून, निर्धारित वेळेत अर्ज करू न शकलेल्या विद्यार्थ्यांना यामुळे मोठा दिलासा मिळाला आहे.

मंत्रालयाने दिलेल्या सुधारित वेळापत्रकानुसार, पात्र विद्यार्थ्यांना आता १५ नोव्हेंबरपर्यंत राष्ट्रीय शिष्यवृत्ती पोर्टलवर (एनएसपी) ऑनलाइन अर्ज सादर करता येणार आहेत. त्यामुळे शिष्यवृत्तीचा लाभ घेण्यास इच्छुक असलेल्या विद्यार्थ्यांनी शेवटच्या तारखेची वाट न पाहता आवश्यक कागदपत्रांसह अर्ज प्रक्रिया पूर्ण करावी, असे आवाहन करण्यात आले आहे. शिष्यवृत्तीसाठी अर्ज सादर केल्यानंतर त्यांची पडताळणी होणेही तितकेच महत्त्वाचे आहे. सुधारित वेळापत्रकानुसार, संबंधित शैक्षणिक संस्थांच्या नोडल अधिकाऱ्यांकडून (एल१) अर्जांची पडताळणी ३० नोव्हेंबर २०२६ पर्यंत पूर्ण करणे आवश्यक आहे. त्यानंतर जिल्हा नोडल अधिकाऱ्यांकडून (एल२) अर्जांची पडताळणी १५ डिसेंबर २०२६ पर्यंत पूर्ण केली जाणार आहे.

ज्या विद्यार्थ्यांनी यापूर्वीच ऑनलाइन अर्ज सादर केले आहेत, त्यांनीही आपल्या अर्जाची पडताळणी संबंधित संस्थेकडून वेळेत झाली आहे की नाही, याची खात्री करून घेणे आवश्यक आहे. अर्ज भरल्यानंतर केवळ प्रक्रिया पूर्ण झाली असे न समजता पडताळणीची स्थिती नियमित तपासावी, असेही सूचित करण्यात आले आहे.

अर्ज करण्यापूर्वी विद्यार्थ्यांना एक-वेळ नोंदणी बंधनकारक

राष्ट्रीय शिष्यवृत्ती पोर्टल १ जून २०२६ पासून विद्यार्थ्यांच्या अर्जांसाठी खुले करण्यात आले आहे. अर्ज करण्यापूर्वी विद्यार्थ्यांना एक-वेळ नोंदणी (ओटीआर) पूर्ण करणे बंधनकारक आहे. ओटीआर प्रक्रिया पूर्ण केल्यानंतरच शिष्यवृत्तीसाठी ऑनलाइन अर्ज करता येतो. ३० ऑक्टोबर २०२६ पर्यंत या योजनेसाठी ९० हजार ४८३ नवीन अर्ज, तर १ लाख ९९ हजार ५३१ नूतनीकरणाचे अर्ज प्राप्त झाले होते. ऑनलाइन अर्ज भरताना विद्यार्थ्यांनी वैयक्तिक माहिती, शैक्षणिक तपशील आणि बँक खात्याची माहिती अचूक भरावी. तसेच आवश्यक प्रमाणपत्रे व इतर कागदपत्रे योग्य स्वरूपात अपलोड करावीत. अर्जातील त्रुटींमुळे किंवा अपूर्ण कागदपत्रांमुळे पडताळणी प्रक्रियेत अडथळे निर्माण होऊ शकतात.

शिष्यवृत्तीसाठी पात्रतेचे निकष काय?

एनएमएमएस शिष्यवृत्ती योजनेचा लाभ घेण्यासाठी विद्यार्थ्यांना काही शैक्षणिक आणि आर्थिक निकष पूर्ण करणे आवश्यक आहे. इयत्ता सातवीमध्ये किमान ५५ टक्के गुण किंवा समकक्ष श्रेणी मिळवणे आवश्यक आहे. मात्र, अनुसूचित जाती आणि अनुसूचित जमाती प्रवर्गातील विद्यार्थ्यांना गुणांच्या अटीत पाच टक्क्यांची सवलत देण्यात आली आहे. याशिवाय विद्यार्थ्यांच्या पालकांचे वार्षिक उत्पन्न ३ लाख ५० हजार रुपयांपेक्षा अधिक नसावे. पात्र विद्यार्थ्यांची निवड संबंधित राज्य सरकार किंवा केंद्रशासित प्रदेश प्रशासनामार्फत आयोजित करण्यात येणाऱ्या निवड परीक्षेच्या माध्यमातून केली जाते.

निवड झालेल्या विद्यार्थ्यांना दरवर्षी १२ हजार रुपयांची मदत

या योजनेअंतर्गत निवड झालेल्या विद्यार्थ्यांना इयत्ता नववीपासून दरवर्षी १२ हजार रुपये शिष्यवृत्ती दिली जाते. विद्यार्थ्यांनी निर्धारित शैक्षणिक अटी पूर्ण केल्यास या शिष्यवृत्तीचे इयत्ता दहावी, अकरावी आणि बारावीपर्यंत नूतनीकरण करता येते. त्यामुळे पात्र विद्यार्थ्यांना माध्यमिक तसेच उच्च माध्यमिक शिक्षण पूर्ण करण्यासाठी आर्थिक आधार मिळतो. आर्थिक परिस्थितीमुळे गुणवंत विद्यार्थ्यांचे शिक्षण थांबू नये, त्यांना शाळा सोडण्याची वेळ येऊ नये आणि शिक्षणाची संधी सातत्याने उपलब्ध व्हावी, हा या योजनेमागील मुख्य उद्देश आहे. विशेषत: आर्थिकदृष्ट्या दुर्बळ घटकांतील विद्यार्थ्यांना शिक्षणाच्या प्रवाहात टिकवून ठेवण्यासाठी ही योजना महत्त्वपूर्ण ठरत आहे.

Read About : GMCH Medical Students – वैद्यकीय विद्यार्थ्यांसाठी घाटीत संधींची नवी कवाडे उघडणार !
E-Paper: Punyanagari E-Paper