उन्नती हुड्डा उपांत्यपूर्व फेरीत, अभय-अनाहत फायनलमध्ये
Asian Games 2026 : आयची-नागोया (जपान) : आशियाई क्रीडा स्पर्धेत भारतीय खेळाडूंची दमदार कामगिरी सुरूच आहे. बॅडमिंटनमध्ये ट्रीसा जॉली आणि गायत्री गोपीचंद या भारतीय जोडीने जागतिक क्रमवारीतील तिसऱ्या क्रमांकाच्या आणि यजमान जपानच्या मायू मात्सुमोतो-युकी फुकुशिमा जोडीचा 24-22, 21-18 असा पराभव करत महिला दुहेरीच्या उपांत्यपूर्व फेरीत प्रवेश केला. दुसरीकडे उन्नती हुड्डाने महिला एकेरीत जागतिक क्रमवारीतील सहाव्या क्रमांकाच्या इंडोनेशियाच्या पुत्री कुसुमा वारदानीला 21-19, 21-13 असे नमवत उपांत्यपूर्व फेरी गाठली.
ट्रीसा-गायत्रीची जपानी जोडीवर पुन्हा मात
- ट्रीसा आणि गायत्री यांनी याच जपानी जोडीला यापूर्वी सांघिक स्पर्धेतही पराभूत केले होते. त्यामुळे दुसऱ्यांदा झालेल्या या लढतीत दोन्ही बाजूंमध्ये चुरशीची झुंज पाहायला मिळाली.
- पहिल्या गेममध्ये भारतीय जोडीने 24-22 असा विजय मिळवत आघाडी घेतली. दुसऱ्या गेममध्ये जपानी जोडीने 11-8 अशी आघाडी घेतली होती. मात्र, ट्रीसा-गायत्रीने जोरदार पुनरागमन करत सामना 15-15 असा बरोबरीत आणला. त्यानंतर 18-18 अशी स्थिती असताना भारतीय जोडीने आक्रमक खेळ करत 19-18 अशी आघाडी घेतली आणि अखेर सामना 21-18 असा जिंकला.
- या विजयामुळे ट्रीसा-गायत्रीची जोडी पदकाच्या आणखी जवळ पोहोचली आहे. उपांत्यपूर्व फेरीत त्यांचा सामना मलेशियाच्या जागतिक क्रमवारीतील पाचव्या क्रमांकाच्या पर्ली टॅन आणि थिनाह मुरलीधरन जोडीशी होणार आहे.
उन्नती हुड्डाचा मोठा विजय
- महिला एकेरीत 19 वर्षीय उन्नती हुड्डाने जागतिक क्रमवारीतील सहाव्या क्रमांकाच्या इंडोनेशियाच्या पुत्री कुसुमा वारदानी हिच्यावर 21-19, 21-13 असा विजय मिळवला. या विजयासह उन्नतीने उपांत्यपूर्व फेरीत प्रवेश केला आहे.
- आता उपांत्य फेरीतील स्थानासाठी उन्नतीसमोर जपानची जागतिक क्रमवारीतील तिसऱ्या क्रमांकाची खेळाडू अकाने यामागुची हिचे आव्हान असेल.
स्क्वॉशमध्ये अभय-अनाहत अंतिम फेरीत
- स्क्वॉशमध्ये भारतासाठी आणखी एक आनंदाची बातमी आहे. अभय सिंहने पाकिस्तानच्या मुहम्मद इरफानचा 11-3, 12-10, 11-6 असा सरळ गेममध्ये पराभव करत पुरुष एकेरीच्या अंतिम फेरीत प्रवेश केला. सुवर्णपदकासाठी त्याचा सामना पाकिस्तानच्या नूर जमान किंवा मलेशियाच्या एईन योव एनजी यांच्यापैकी एकाशी होणार आहे.
- महिला एकेरीत अनाहत सिंहने जपानच्या सातोमी वातानाबेचा 3-2 असा पराभव करत अंतिम फेरी गाठली. त्यामुळे स्क्वॉशमध्ये भारताच्या पदकाच्या आशा आणखी बळकट झाल्या आहेत.
- दरम्यान, जोशना चिनप्पा आणि वेलावन सेंथिलकुमार या भारतीय मिश्र दुहेरी जोडीने उपांत्य फेरी गाठल्यानंतर पदक निश्चित केले होते. उपांत्य सामन्यात हाँगकाँगच्या टांग मिंग हाँग आणि ली का यी यांच्याकडून पराभव झाल्याने त्यांना कांस्यपदकावर समाधान मानावे लागले.
महिला कबड्डी संघाचे सुवर्ण
- या दिवशी भारतीय महिला कबड्डी संघाने इराणचा 37-34 असा पराभव करत आशियाई क्रीडा स्पर्धेतील आपले विजेतेपद कायम राखले. भारताने या विजयासह आणखी एका सुवर्णपदकाची भर घातली.
- अॅथलेटिक्समध्ये सावन बरवालने पुरुषांच्या मॅरेथॉनमध्ये 2:11:37 वेळेसह रौप्यपदक पटकावले. तसेच आशी चौकसे, तिलोत्तमा सेन आणि विदार्सा विनोद यांनी महिलांच्या 50 मीटर रायफल 3 पोझिशन सांघिक प्रकारात रौप्यपदक मिळवले.
- 26 सप्टेंबरच्या उपलब्ध अपडेटनुसार भारताच्या खात्यात 27 पदके — 3 सुवर्ण, 11 रौप्य आणि 13 कांस्य अशी नोंद होती
Read About : Ritu Negi Asian Games Gold : इराणला 37-34 ने हरवत भारताचे सुवर्णपदक कायम
E-Paper: Punyanagari E-Paper
Comments
Comments will appear here.
Comments are submitted for administrator moderation before appearing publicly.