Earthquake in Hingoli : हिंगोली जिल्ह्यात 4.5 रिश्टर स्केलचा भूकंप..!

हिंगोली : Earthquake in Hingoli – हिंगोली जिल्ह्यातील वसमत तालुक्यातील पांगरा शिंदे परिसरात शनिवारी २ ऑक्टोबर रोजी सकाळी ९.४३ वाजता ४.५ रिश्टर स्केल तीव्रतेच्या भूकंपाची नोंद झाली. या भूकंपाचे धक्के हिंगोली शहरासह जिल्ह्यातील विविध भागांत जाणवले. प्राथमिक माहितीनुसार, भूकंपाच्या धक्क्यामुळे कोणत्याही प्रकारची जीवित किंवा वित्तहानी झालेली नाही. जिल्हा प्रशासनाकडून परिस्थितीवर लक्ष ठेवण्यात येत आहे. ही माहिती जिल्हा आपत्ती व्यवस्थापन कक्षाकडून देण्यात आली आहे.

भूकंपाच्या पार्श्वभूमीवर हिंगोली प्रशासन सतर्क

हिंगोली जिल्ह्यात शनिवारी सकाळी भूकंपाचे दोन धक्के जाणवले. वसमत तालुक्यातील पांगरा शिंदे परिसरात सकाळी ९.४३ वाजता ४.५ रिश्टर स्केल तीव्रतेच्या भूकंपाची नोंद झाली. यापूर्वी सकाळी ७.४६ वाजता ३.३ रिश्टर स्केल तीव्रतेचा सौम्य धक्का जाणवला. या दोन्ही घटनांमध्ये प्राथमिक माहितीनुसार जिल्ह्यात कोणतीही जीवित अथवा वित्तहानी झालेली नाही. भूकंपाच्या पार्श्वभूमीवर जिल्हा प्रशासनाने परिस्थितीचा आढावा घेतला असून आपत्ती व्यवस्थापन यंत्रणेसह संबंधित सर्व विभागांना सतर्क राहण्याच्या सूचना देण्यात आल्या आहेत.

नागरिकांनी काय करावे

भूकंपाचे धक्के जाणवल्यास नागरिकांनी घाबरून न जाता सुरक्षित ठिकाणी जावे. इमारती, विद्युत खांब आणि इतर धोकादायक ठिकाणांपासून दूर राहावे. तसेच प्रशासनाकडून मिळणाऱ्या अधिकृत सूचनांचे पालन करावे, असे आवाहन जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष राहुल गुप्ता यांनी केले आहे.

अफवांवर विश्वास ठेवू नये

भूकंपाबाबत सोशल मीडिया किंवा अन्य माध्यमांतून प्रसारित होणाऱ्या अफवांवर नागरिकांनी विश्वास ठेवू नये. कोणतीही माहिती मिळाल्यास तिची खात्री अधिकृत शासकीय माध्यमांद्वारे करावी. नागरिकांनी शांतता राखून प्रशासनाला सहकार्य करावे, असेही जिल्हाधिकारी राहुल गुप्ता यांनी आवाहन केले आहे.

प्रत्यक्ष पाहणी करून पंचनामे

भूकंपामुळे कोणत्याही घराचे, इमारतीचे किंवा अन्य मालमत्तेचे नुकसान झाल्याची माहिती प्राप्त झाल्यास संबंधित यंत्रणांनी प्रत्यक्ष पाहणी करून तातडीने पंचनामे करावेत, असे निर्देश जिल्हाधिकारी राहुल गुप्ता यांनी संबंधित अधिकाऱ्यांना दिले आहेत. गावपातळीवरही परिस्थितीवर लक्ष ठेवण्याच्या सूचना संबंधित अधिकाऱ्यांना देण्यात आल्या आहेत, असेही राहुल गुप्ता यांनी सांगितले.

Read About: Earthquake Safety 2026 : भूकंपापासून संरक्षणासाठी हिंगोलीत STABLE तंत्रज्ञानाचा यशस्वी प्रयोग
E-Paper: Punyanagari E-Paper