गृहलक्ष्मी योजनेच्या 2 हजार रुपयांसाठी नातवाने आजीची हत्या केल्याचा आरोप; मृतदेह गोणपाटात भरून धरणाच्या पाण्यात फेकला, गुन्हा लपवल्याच्या आरोपाखाली वडिलांनाही अटक.
Hanamavva Sanadi Murder Case : महिन्याला मिळणारे फक्त 2 हजार रुपये… या पैशांसाठी एका 20 वर्षांच्या नातवाने आपल्या 78 वर्षीय आजीची हत्या केल्याची धक्कादायक घटना कर्नाटकातून समोर आली आहे. हत्या केल्यानंतर मृतदेह गोणपाटात भरून त्याला मोठे दगड बांधण्यात आले आणि धरणाच्या पाण्यात फेकून देण्यात आले. या प्रकरणात नातवासोबतच त्याच्या वडिलांनाही पोलिसांनी अटक केली आहे.
या घटनेतील मृत महिलेचे नाव हणमव्वा बालप्पा सनदी (वय 78) असे आहे. तर हत्या केल्याच्या आरोपाखाली अटक करण्यात आलेल्या नातवाचे नाव भीमप्पा रामप्पा सनदी (वय 20) असे आहे. ही घटना कर्नाटकातील बेळगाव जिल्ह्यातील हुक्केरी तालुक्यात असलेल्या अरळीकट्टी गावात घडली.
गृहलक्ष्मी योजनेच्या पैशांवरून आजी-नातवात वाद
कर्नाटक सरकारकडून महिलांसाठी गृहलक्ष्मी योजना राबवली जाते. या योजनेअंतर्गत पात्र कुटुंबप्रमुख महिलांच्या खात्यात दर महिन्याला 2 हजार रुपये जमा केले जातात. हणमव्वा यांनाही या योजनेचा लाभ मिळत होता.
मात्र, याच पैशांवरून आजी आणि नातवामध्ये गेल्या काही काळापासून वाद सुरू होता. भीमप्पाला आजीच्या पैशांमधील काही हिस्सा हवा होता. त्याला स्वतःचा व्यवसाय सुरू करायचा होता. मात्र, आजीने पैसे देण्यास नकार दिल्याने दोघांमध्ये वारंवार वाद होत असल्याची माहिती पोलिसांनी दिली आहे.
याच पैशांच्या वादातून भीमप्पाने आजीची हत्या केल्याचा आरोप आहे.
बाजारात जाण्याच्या बहाण्याने आजीला डोंगर परिसरात नेले
10 नोव्हेंबर रोजी हणमव्वा या पाश्चापूर येथील आठवडी बाजारात जाण्यासाठी घरातून बाहेर पडल्या होत्या. त्यांच्यासोबत 2 हजार 300 रुपयेही होते. मात्र, बाजारात जाण्याऐवजी भीमप्पा त्यांना दुचाकीवरून गवी सिद्धेश्वर डोंगर परिसरात घेऊन गेला.
तिथे पुन्हा गृहलक्ष्मी योजनेच्या पैशांवरून दोघांमध्ये वाद झाला. आजीने पैसे देण्यास नकार दिल्यानंतर भीमप्पाने त्यांना खाली ढकलले. त्यानंतर हाताने आणि दोरीने गळा आवळून त्यांची हत्या केल्याचा आरोप आहे.
मृतदेह गोणपाटात भरून धरणाच्या पाण्यात फेकला
आजीची हत्या केल्यानंतर भीमप्पाने मृतदेहाची विल्हेवाट लावण्याचा प्रयत्न केला. त्यासाठी तो पाश्चापूर येथे गेला आणि तिथून दोन गोणपाट घेऊन आला. आजीजवळ असलेले 2 हजार 300 रुपये घेतल्यानंतर त्याने मृतदेह गोणपाटात भरला.
रात्रीच्या वेळी दुचाकीवरून मृतदेह जिनराळ गावाजवळील घटप्रभा नदीच्या धरणाच्या बॅकवॉटर परिसरात नेण्यात आला. तिथे आजीच्या गळ्यातील दोन सोन्याच्या साखळ्या काढून घेतल्याचा आरोप आहे. त्यानंतर गोणपाटांमध्ये मोठे दगड भरून ते पाण्यात फेकून देण्यात आले.
पाच दिवसांनंतर धरणाच्या पाण्यात आढळला मृतदेह
दरम्यान, हणमव्वा घरी परतल्या नसल्याने कुटुंबीयांनी त्यांचा शोध सुरू केला होता. मात्र, पाच दिवसांनंतर म्हणजेच 15 नोव्हेंबर रोजी जिनराळ गावाजवळील धरणाच्या बॅकवॉटरमध्ये दोन गोणपाटांमध्ये भरलेला त्यांचा मृतदेह आढळून आला.
यानंतर हणमव्वा यांच्या मुलीने पोलिसांकडे तक्रार दाखल केली. तपासादरम्यान भीमप्पा हा हणमव्वा यांना शेवटचा भेटलेला असल्याची माहिती पोलिसांना मिळाली. त्यानंतर त्याची चौकशी करण्यात आली. पोलिसांच्या माहितीनुसार, चौकशीदरम्यान त्याने गुन्ह्याची कबुली दिली.
हत्येची माहिती असूनही वडिलांनी लपवल्याचा आरोप
या प्रकरणाच्या तपासात आणखी एक धक्कादायक बाब समोर आली. भीमप्पाने घरी परतल्यानंतर आपल्या वडिलांना म्हणजेच रामप्पा सनदी यांना हत्येबद्दल सांगितले होते. मात्र, त्यांनी पोलिसांना याची माहिती न देता मुलाला वाचवण्यासाठी हा प्रकार लपवल्याचा आरोप आहे.
त्यामुळे पोलिसांनी भीमप्पासोबतच त्याचे वडील रामप्पा यांनाही अटक केली आहे. या प्रकरणाचा पुढील तपास सुरू आहे.
महिन्याला मिळणाऱ्या 2 हजार रुपयांसाठी एका नातवाने आपल्या 78 वर्षीय आजीची हत्या केल्याच्या या घटनेने संपूर्ण परिसरात खळबळ उडाली आहे. पैशांचा वाद इतक्या टोकाला जाऊ शकतो, याची कल्पनाही या घटनेतून येते.
Read About : Hemant Sapkal Death Case : पैशांचा पाऊस पाडण्यासाठी नरबळी? इंदूरमधील तरुणाच्या मृत्यूने खळबळ!
E-paper : Punyanagari E-Paper


Comments
Comments will appear here.
Comments are submitted for administrator moderation before appearing publicly.