Micro GPU 2026 – आयआयटी दिल्लीने विकसित केला देशातील पहिला स्वदेशी मायक्रो-जीपीयू

ई-रिक्षा, नेव्हिगेशन आणि औद्योगिक उपकरणांसाठी होणार उपयोग

नवी दिल्ली : Micro GPU भारतीय तंत्रज्ञान संस्था दिल्लीच्या संशोधकांनी देशातील पहिला कार्यक्षम आणि प्रदर्शित करण्याजोगा स्वदेशी मायक्रो-जीपीयू विकसित करण्यात यश मिळवले आहे. आधुनिक कॉम्प्युटर, इलेक्ट्रॉनिक उपकरणे, एआय आणि मशीन लर्निंग तंत्रज्ञानामध्ये जीपीयू हा अत्यंत महत्त्वाचा भाग मानला जातो. आतापर्यंत भारताला यासाठी परदेशी आयातीवर अवलंबून राहावे लागत होते, परंतु आयआयटी दिल्लीच्या विद्युत अभियांत्रिकी विभागाच्या या कामगिरीमुळे आत्मनिर्भरतेच्या दिशेने एक मोठे पाऊल पडले आहे.

या प्रकल्पाचे नेतृत्व एम. टेक. चे विद्यार्थी नम्मी आकाश आणि एम. रवि तेजा यांनी केले असून, त्यांना प्रा. जयदेव आणि प्रा. कौशिक साहा यांचे मार्गदर्शन लाभले. हा मायक्रो-जीपीयू स्पार्टन-७ एफपीजीए प्लॅटफॉर्मवर यशस्वीरित्या लागू करण्यात आला आहे. हे तंत्रज्ञान केवळ महागड्या कॉम्प्युटर्सपुरते मर्यादित न राहता, अनेक छोट्या आणि कमी खर्चाच्या उपकरणांमध्ये ग्राफिक्स आणि डिस्प्ले सुधारण्यासाठी वापरले जाऊ शकते. याचा प्रामुख्याने ई-रिक्षाचे डॅशबोर्ड आणि नेव्हिगेशन सिस्टम, औद्योगिक नियंत्रण डिस्प्ले, लहान मासेमारी नौकांसाठीचे नेव्हिगेशन टर्मिनल्स, शैक्षणिक ई-बुक रीडर आणि कमी खर्चाचे मानवी-मशीन इंटरफेस यांमध्ये वापर करता येईल.

संशोधकांच्या मते, हा एक प्रोग्राम करण्याजोगा ग्राफिक्स प्रोसेसर आराखडा असून, गरजेनुसार विविध उपकरणांमध्ये बसवता येऊ शकतो. असे स्वदेशी हार्डवेअर परवडणारा डिजिटल प्लॅटफॉर्म तयार करून देशातील डिजिटल दरी कमी करण्यास मदत करतील. आयआयटी दिल्लीची टीम आता हे तंत्रज्ञान पुढच्या टप्प्यावर नेण्याच्या तयारीत असून, ८ ते १६ कोर असलेला वेक्टर शैलीतील ग्राफिक्स प्रोसेसर आणि ६५ नैनोमीटर एएसआईसी प्रक्रियेवर आधारित प्रूफ ऑफ कन्सेप्ट विकसित करण्याची योजना आहे. या तंत्रज्ञानाचा व्यावसायिक स्तरावर वापर करण्यासाठी आणि पुढील चिप उत्पादनासाठी आता आर्थिक मदत मिळवण्याचे प्रयत्न सुरू आहेत.

Gold Salts Therapy – सांधेदुखीवर सोन्याच्या क्षारांची थेरपी; सूज आणि सांध्यांची झीज रोखण्यास मदत
E-Paper: Punyanagari E-Paper