ऋषी कपूर यांच्या जयंतीनिमित्त नीतू कपूर आणि रिद्धिमा यांची भावूक आठवण; Throwback Photos शेअर
मुंबई : दिवंगत बॉलिवूड अभिनेते ऋषी कपूर यांच्या जयंतीनिमित्त पत्नी नीतू कपूर आणि कन्या रिद्धिमा कपूर साहनी यांनी सोशल मीडियावर जुन्या आठवणींना उजाळा दिला. दोघींनीही ऋषी कपूर यांच्यासोबतचे खास थ्रोबॅक फोटो शेअर करत त्यांची आठवण काढली.
नीतू कपूर यांनी पती ऋषी कपूर यांच्यासोबतचा एक जुना फोटो शेअर केला. ऋषी कपूर आणि नीतू कपूर यांचा विवाह 22 जानेवारी 1980 रोजी झाला होता. त्यांना रिद्धिमा कपूर साहनी आणि अभिनेता रणबीर कपूर ही दोन अपत्ये आहेत.
1970 आणि 1980 च्या दशकात ऋषी कपूर आणि नीतू कपूर यांनी ‘अमर अकबर अँथनी’, ‘खेल खेल में’, ‘रफू चक्कर’, ‘कभी कभी’ यांसारख्या अनेक चित्रपटांमध्ये एकत्र काम केले. पडद्यावरील आणि वैयक्तिक आयुष्यातील त्यांच्या जोडीला प्रेक्षकांची विशेष पसंती मिळाली होती.
रिद्धिमा कपूर साहनी यांनीही आई-वडिलांसोबतचा एक जुना फोटो शेअर करून वडिलांना जयंतीनिमित्त स्मरण केले.
हिंदी चित्रपटसृष्टीतील प्रदीर्घ कारकीर्द
ऋषी कपूर (Rishi Kapoor Birth) यांचा जन्म 4 सप्टेंबर 1952 रोजी प्रसिद्ध अभिनेते-दिग्दर्शक राज कपूर आणि कृष्णा कपूर यांच्या घरी झाला. त्यांनी बालकलाकार म्हणून ‘मेरा नाम जोकर’ (1970) या चित्रपटात महत्त्वपूर्ण भूमिका साकारली होती. त्यानंतर ‘बॉबी (Bobby)’ (1973) या चित्रपटातून त्यांनी नायक म्हणून पदार्पण केले.
प्रदीर्घ कारकिर्दीत ऋषी कपूर यांनी विविध प्रकारच्या भूमिका साकारल्या. ‘खेल खेल में’, ‘रफू चक्कर’, ‘अमर अकबर अँथनी’, ‘कभी कभी’, ‘कर्ज’, ‘नसीब’, ‘प्रेम रोग’, ‘चांदनी’, ‘सागर’, ‘अग्निपथ’, ‘कपूर अँड सन्स’ यांसह अनेक चित्रपटांमधील त्यांच्या भूमिका विशेष गाजल्या.
सुभाष घई आणि जॅकी श्रॉफ यांच्याकडूनही आठवणी
दिग्दर्शक सुभाष घई यांनीही ऋषी कपूर यांना जयंतीनिमित्त श्रद्धांजली (Rishi Kapoor Birth Anniversary) वाहिली. त्यांनी 1980 मधील ‘कर्ज’ चित्रपटाशी संबंधित ऋषी कपूर यांची एक आठवण सोशल मीडियावर शेअर केली.
अभिनेता जॅकी श्रॉफ यांनीही ऋषी कपूर यांचे स्मरण करत त्यांना श्रद्धांजली अर्पण केली. ऋषी कपूर आणि जॅकी श्रॉफ यांनी ‘आझाद देश के गुलाम’, ‘औरंगजेब’ आणि ‘चॉक एन डस्टर’ यांसारख्या चित्रपटांमध्ये एकत्र काम केले होते.
ऋषी कपूर यांचे 30 एप्रिल 2020 रोजी वयाच्या 67 व्या वर्षी निधन झाले. हिंदी चित्रपटसृष्टीतील त्यांचे योगदान आणि विविध भूमिकांमधून प्रेक्षकांचे केलेले मनोरंजन आजही चाहत्यांच्या स्मरणात आहे.