Teacher Suspended : बुलंदशहरमध्ये दारुड्या शिक्षकाकडून विद्यार्थ्याला पंख्याला लटकवण्याचा प्रयत्न

व्हिडिओ व्हायरल झाल्यानंतर कारवाई; पालकांच्या तक्रारीवरून शिक्षकाविरोधात गुन्हा दाखल

बुलंदशहर : Teacher Suspended उत्तर प्रदेशातील बुलंदशहर जिल्ह्यातील उंचागाव ब्लॉक अंतर्गत येणाऱ्या मऊखेडा प्राथमिक विद्यालयात धक्कादायक आणि संतापजनक घटना समोर आली आहे. शाळेत दारू पिऊन येऊन एका विद्यार्थ्याला मारहाण करत त्याला थेट छताच्या पंख्याला लटकवण्याचा प्रयत्न करणाऱ्या शिक्षकावर प्रशासनाने निलंबनाची कारवाई केली आहे.

ही संतापजनक घटना ५ ऑक्टोबर २०२६ रोजी सोशल मीडियावर एक व्हिडिओ व्हायरल झाल्यानंतर व्यापक रूपात लोकांसमोर आली. मऊखेडा प्राथमिक विद्यालयातील शिक्षक कपिल कुमार हा मद्यधुंद अवस्थेत शाळेत आला होता. त्याने वर्गातील एका लहान विद्यार्थ्याला आधी बेदम मारहाण केली आणि त्यानंतर क्रूरतेची सीमा ओलांडत त्याला वर्गातील छताच्या पंख्याला लटकवण्याचा अघोरी प्रयत्न केला. या प्रकारामुळे वर्गातील इतर मुलेही प्रचंड भयभीत झाली होती.

हा व्हिडिओ इंटरनेटवर व्हायरल होऊन सर्व स्तरांतून तीव्र संताप व्यक्त झाल्यानंतर प्रशासनाने वेगाने पावले उचलली. पीडित विद्यार्थ्याच्या पालकांनी दिलेल्या तक्रारीवरून नरसेना पोलीस ठाण्यात आरोपी शिक्षक कपिल कुमारविरुद्ध गंभीर कलमांखाली गुन्हा दाखल करण्यात आला आहे.

तसेच, या प्रकरणाची गंभीर दखल घेत खंड शिक्षण अधिकाऱ्यांच्या चौकशी अहवालाच्या आधारे, जिल्हा प्राथमिक शिक्षण अधिकारी वीरेंद्र कुमार यांनी ६ ऑक्टोबर रोजी आरोपी शिक्षक कपिल कुमार याला तात्काळ सेवेतून निलंबित केले आहे.

Read About: Earthquake Safety 2026 : भूकंपापासून संरक्षणासाठी हिंगोलीत STABLE तंत्रज्ञानाचा यशस्वी प्रयोग
E-Paper: Punyanagari E-Paper