Ad Advertisement Ad Advertisement

Visa Mastercard JPMorgan Data Leak 2026: अमेरिकेत व्हिसा, मास्टरकार्ड आणि जेपी मॉर्गनच्या व्हेंडर्सचा डेटा लीक

पेमेंट नेटवर्क आणि कार्ड व्यवहार सुरक्षित असल्याचे कंपन्यांचे स्पष्टीकरण

वॉशिंग्टन : Visa Mastercard JPMorgan Data Leak जेपी मॉर्गन चेस, व्हिसा आणि मास्टरकार्ड या कंपन्यांनी त्यांच्या बाह्य सेवा पुरवठादारांशी (व्हेंडर्स) संबंधित सायबर सुरक्षा उल्लंघनाची माहिती दिली आहे. या घटनांमध्ये काही ग्राहकांची माहिती लीक झाली आहे किंवा त्यामध्ये अनधिकृत प्रवेश केला गेल्याची शक्यता आहे. मात्र, या घटनेचा त्यांच्या सेवांवर आणि पेमेंट नेटवर्कवर कोणताही परिणाम झालेला नाही, असे या कंपन्यांनी स्पष्ट केले आहे. आशिया-पॅसिफिक प्रदेशाचा उल्लेख असला तरी यामध्ये भारतीय कार्डधारक प्रभावित झाले आहेत की नाही, याची पुष्टी झालेली नाही. कंपन्यांनी दिलेल्या निवेदनांमध्ये भारताशी संबंधित कोणतीही आकडेवारी किंवा भारतीय ग्राहकांना दिलेल्या सूचनेचा उल्लेख नाही.

हे खुलासे मार्केटिंगशी संबंधित माहिती आणि एका कार्डधारक लाभ कार्यक्रमाशी निगडित आहेत. मीडिया रिपोर्ट्सनुसार, व्हिसाने स्पष्ट केले आहे की कार्ड क्रमांकासह पेमेंटशी संबंधित कोणताही डेटा प्रभावित झालेला नाही, तर मास्टरकार्डने सांगितले की लीक झालेल्या माहितीत केवळ ईमेल पत्त्यांचा समावेश आहे, ज्याचा पेमेंटशी कोणताही संबंध नाही.

जेपी मॉर्गन चेसचे स्पष्टीकरण

जेपी मॉर्गनने म्हटले आहे की, त्यांच्या तपासात हल्लेखोरांनी सेवा पुरवठादारांकडे असलेल्या मार्केटिंग डेटामध्ये प्रवेश केल्याचे संकेत मिळाले आहेत. यामध्ये काही ग्राहकांची नावे आणि ईमेल पत्ते असू शकतात. बँकेने या सायबर हल्ल्याचा आठवड्याच्या सुरुवातीला सॉफ्टवेअर बगमुळे आलेल्या तांत्रिक अडचणींशी काहीही संबंध नसल्याचे स्पष्ट केले आहे. जिथे आवश्यक असेल, तिथे आम्ही प्रभावित ग्राहकांशी थेट संपर्क साधू आणि त्यांना मदत उपलब्ध करून देऊ. यामध्ये विनाशुल्क क्रेडिट मॉनिटरिंग सुविधेचाही समावेश असेल. सायबर हल्ल्यामुळे बँकेच्या सेवांमध्ये कोणताही व्यत्यय आलेला नाही, असेही बँकेने नमूद केले आहे.

मास्टरकार्ड आणि व्हिसाची भूमिका

मास्टरकार्ड : ही घटना एका विशेष लाभ कार्यक्रमाशी जोडलेल्या कार्डधारकांच्या एका लहान गटापुरती मर्यादित असल्याचे मास्टरकार्डने म्हटले आहे. कंपनीचे वरिष्ठ उपाध्यक्ष सेठ आयझेन यांनी सांगितले की, डेटा उघड होण्याची घटना नियंत्रणात आणली गेली असून कंपनी प्रभावित ग्राहकांच्या मदतीसाठी सेवा पुरवठादारासोबत काम करत आहे. मास्टरकार्डच्या पेमेंट नेटवर्कवर किंवा कार्डच्या वापरावर याचा कोणताही परिणाम झालेला नाही.

व्हिसा : व्हिसाने आपल्या ग्राहकांशी संबंधित दावे आशिया-पॅसिफिक प्रदेशातील एका सेवा पुरवठादाराशी जोडले आहेत. कंपनीने सांगितले की, त्यांची स्वत:ची यंत्रणा या घटनेत सामील नव्हती आणि ती प्रभावितही झालेली नाही. कार्ड क्रमांकासारखी पेमेंटविषयक माहिती पूर्णपणे सुरक्षित आहे.

Read About : San Francisco AI Supply Chain Declaration : भारत-अमेरिकेसह 10 देशांची एआय सुरक्षेसाठी एकजूट; चीनवरील अवलंबित्व कमी करण्याचे प्रयत्न?
E-Paper : Punyanagari E-Paper

Comments

Comments will appear here.

Comments are submitted for administrator moderation before appearing publicly.