Youth Beaten Viral Video : हापूरमध्ये तरुणाला खोलीत कोंडून बेल्टने बेदम मारहाण; ६ जणांवर गुन्हा

शाळकरी मुलांच्या जुन्या वादातून मारहाणीचा प्रकार; आरोपी फरार, पोलीसांकडून शोध सुरू

हापूर : Youth Beaten Viral Video उत्तर प्रदेशातील हापूर जिल्ह्यात एका तरुणाला खोलीत कोंडून बेल्ट आणि लाथा-बुक्क्यांनी अमानुषपणे मारहाण केल्याची अत्यंत धक्कादायक घटना समोर आली आहे. या घटनेचा व्हिडिओ सोशल मीडियावर प्रचंड व्हायरल झाल्यानंतर हापूरच्या बाबूगड पोलीस ठाण्याने मारहाण करणाऱ्या सहा तरुणांविरुद्ध गुन्हा दाखल केला असून त्यांचा शोध सुरू केला आहे.

मिळालेल्या माहितीनुसार, ही घटना २९ सप्टेंबर रोजी बाबूगड पोलीस ठाण्याच्या हद्दीत घडली. शाळकरी मुलांमधील जुन्या वादातून हा संपूर्ण प्रकार घडल्याचा प्राथमिक अंदाज पोलिसांनी वर्तवला आहे. सोशल मीडियावर व्हायरल झालेल्या व्हिडिओमध्ये काही तरुण एका पीडित तरुणाला खोलीत कोंडून त्याला चहूबाजूंनी घेरताना दिसत आहेत. त्यानंतर हे तरुण पीडित मुलाला बेल्टने आणि लाथा-बुक्क्यांनी बेदम मारहाण करत असल्याचे स्पष्ट दिसत आहे. या क्रूर मारहाणीमुळे पीडित तरुण गंभीर जखमी झाला आहे.

पोलिसांनी प्रथम पीडित तरुणाच्या कुटुंबीयांशी आणि नातेवाईकांशी संपर्क साधून त्यांची तक्रार नोंदवून घेतली. या तक्रारीच्या आधारे पोलिसांनी मारहाण करणाऱ्या सहा आरोपींविरुद्ध विविध कलमांखाली गुन्हा दाखल केला आहे.

घटनेनंतर सर्व आरोपी फरार झाले असून पोलीस पथके त्यांचा कसून शोध घेत आहेत. नेमका वाद कशामुळे सुरू झाला आणि घटनेमागे आणखी कोणी सामील आहे का, हे स्पष्ट करण्यासाठी पोलीस सध्या व्हायरल व्हिडिओ आणि इतर तांत्रिक पुराव्यांची सखोल तपासणी करत आहेत. या घटनेमुळे परिसरात तणावाचे वातावरण आहे.

Read About : Marine Drive Police Attack 2026 – ऑन-ड्युटी पोलिस कर्मचाऱ्याशी वाद; हल्ल्याचा व्हिडिओ व्हायरल
E-Paper: Punyanagari E-Paper