India vs Sri Lanka – भारताची श्रीलंकेवर 124 धावांनी मात; सुवर्णपदकासाठी पाकिस्तानशी लढत

इशान किशनची नाबाद ८० धावांची खेळी; भारतीय गोलंदाजांनी श्रीलंकेचा डाव ४५ धावांत गुंडाळला

नवी दिल्ली : India vs Sri Lanka आशियाई क्रीडा स्पर्धा २०२६ मध्ये भारतीय क्रिकेट संघाने श्रीलंकेचा १२४ धावांनी पराभव करत अंतिम फेरीत धडक मारली आहे. गुरुवारी झालेल्या उपांत्य सामन्यात भारताने प्रथम फलंदाजी करत ७ बाद १६९ धावा केल्या. प्रत्युत्तरात भारतीय गोलंदाजांच्या भेदक माऱ्यासमोर श्रीलंकेचा संघ अवघ्या ४५ धावांत गारद झाला. आता सुवर्णपदकासाठी शनिवारी भारताचा सामना पाकिस्तानशी होणार आहे.

भारताच्या विजयाचा शिल्पकार इशान किशन ठरला. त्याने ४६ चेंडूंत नाबाद ८० धावांची आक्रमक खेळी केली. त्यात चार चौकार आणि पाच षटकारांचा समावेश होता. सुरुवातीला भारताची फलंदाजी अडखळल्यानंतर किशनने डाव सावरत संघाला आव्हानात्मक धावसंख्येपर्यंत पोहोचवले.

भारताकडून अभिषेक शर्मा आणि १५ वर्षीय वैभव सूर्यवंशी यांनी डावाची सुरुवात केली. अभिषेकने पहिल्याच षटकात षटकार ठोकला; मात्र तो सात धावांवर बाद झाला. संजू सॅमसनही सात धावा करून माघारी परतला. त्यानंतर श्रेयस अय्यर आणि सूर्यवंशी यांनी ३५ धावांची भागीदारी केली. सूर्यवंशीने आक्रमक फलंदाजी करत भारताला पॉवरप्लेमध्ये ५८ धावांपर्यंत पोहोचवले. मात्र, सहाव्या षटकानंतर श्रीलंकेच्या फिरकीपटूंनी धावगतीवर नियंत्रण मिळवले.

अय्यरने १३ चेंडूंत १३ धावा केल्या, तर अक्षर पटेलला १३ चेंडूंत आठ धावाच करता आल्या. तिलक वर्मा आणि शिवम दुबे यांनाही मोठी खेळी करता आली नाही. दुसरीकडे, किशनने नियमितपणे चौकार-षटकार लगावत अर्धशतक पूर्ण केले. अखेरच्या षटकात वॉशिंग्टन सुंदरनेही षटकार ठोकला आणि भारताने १६९ धावांपर्यंत मजल मारली.

भारतीय गोलंदाजांचा भेदक मारा

१७० धावांच्या लक्ष्याचा पाठलाग करताना श्रीलंकेची सुरुवात अत्यंत खराब झाली. जसप्रीत बुमराहने दुसऱ्याच चेंडूवर सिनेत जयवर्धनेला पायचीत केले. त्याच षटकात संजू सॅमसनने सोहन डी लिवेराचा झेल टिपला. लसित क्रुसपुल्ले धावबाद झाल्याने श्रीलंकेची दोन षटके पूर्ण होण्याआधीच तीन बाद अशी अवस्था झाली.

अक्षर पटेलने कर्णधार सहान आराचिगे आणि अशेन बंडारा यांना एकाच षटकात बाद करत श्रीलंकेच्या अडचणीत भर घातली. त्यानंतर नुवानिदू फर्नांडोने दोन षटकार मारण्याचा प्रयत्न केला; मात्र तोही धावबाद झाला. वॉशिंग्टन सुंदरने वानुजा सहानला बाद केले. अभिषेक शर्माने दहाव्या षटकात दोन बळी घेत श्रीलंकेचा डाव संपवला.

भारताकडून बुमराह, अक्षर पटेल आणि अभिषेक शर्मा यांनी प्रत्येकी दोन बळी घेतले, तर सुंदरने एक गडी बाद केला. श्रीलंकेचा संपूर्ण संघ ९.५ षटकांत ४५ धावांवर बाद झाला.

गतविजेत्या भारतासमोर आता सुवर्णपदकासाठी पाकिस्तानचे आव्हान असेल. शनिवारी होणाऱ्या अंतिम सामन्यात दोन्ही संघांमध्ये चुरशीची लढत अपेक्षित आहे.

Read About : Asian Games 2026 : रोहित यादव आणि श्रीलंकेचा रुमेश पाथिराजे यांनी जर्सीची केली अदलाबदल
E-Paper: Punyanagari E-Paper