“या रंगांसारखे दुसरे काहीच नाही”; श्रीलंकेविरुद्ध ८० धावांची नाबाद खेळी करत इशानने भारताला संकटातून सावरले
आयची-नागोया (जपान) : Ishan Kishan Asian Games Final आशियाई क्रीडा स्पर्धेतील पुरुषांच्या क्रिकेटमध्ये श्रीलंकेचा १२४ धावांनी पराभव करत भारताने अंतिम फेरीत प्रवेश केला. या शानदार विजयानंतर भारतीय यष्टीरक्षक-फलंदाज इशान किशनने सोशल मीडियावर खास पोस्ट करत भारतीय संघाच्या जर्सीबद्दलचा अभिमान व्यक्त केला. इशानने इन्स्टाग्रामवर पोस्ट करत “Nothing like these colours.” असे लिहिले. भारताच्या निळ्या जर्सीचा अभिमान व्यक्त करणाऱ्या या पोस्टला चाहत्यांकडूनही मोठा प्रतिसाद मिळत आहे.
श्रीलंकेविरुद्धच्या उपांत्य सामन्यात भारताची सुरुवात अडखळती झाली होती. कठीण खेळपट्टीवर भारताची अवस्था ४ बाद ८७ अशी झाली होती. अशा परिस्थितीत इशान किशनने जबाबदारी स्वीकारत अवघ्या ४६ चेंडूंत नाबाद ८० धावांची शानदार खेळी केली. त्याच्या या खेळीत चार चौकार आणि पाच षटकारांचा समावेश होता. त्याचा स्ट्राइक रेट १७३.९१ इतका राहिला.
इशानच्या या खेळीच्या जोरावर भारताने २० षटकांत ७ बाद १६९ धावा उभारल्या. श्रीलंकेकडून सहान अराचिगेने २ आणि थारिंदू रत्नायकेने २ बळी घेतले.
यानंतर भारतीय गोलंदाजांनी श्रीलंकेच्या फलंदाजीची अक्षरशः वाताहत केली. श्रीलंकेकडून नुवानिदू फर्नांडोने १५ धावा केल्या. त्याच्याशिवाय एकाही फलंदाजाला दुहेरी आकडा गाठता आला नाही. जसप्रीत बुमराहने २, अक्षर पटेलने ३, अभिषेक शर्माने २ आणि वॉशिंग्टन सुंदरने १ बळी घेत श्रीलंकेला अवघ्या ४५ धावांत गुंडाळले. श्रीलंकेचा डाव ९.५ षटकांत संपुष्टात आला.
इशानची विक्रमी कामगिरी
इशान किशनने यंदाच्या टी-२० आंतरराष्ट्रीय क्रिकेटमध्ये सातत्यपूर्ण कामगिरी केली आहे. श्रीलंकेविरुद्धच्या अर्धशतकासह त्याच्या नावावर यंदा आठ ५०+ धावा जमा झाल्या आहेत. यासह त्याने २०१६ मध्ये विराट कोहलीने केलेल्या सात ५०+ धावांच्या कामगिरीला मागे टाकले.
भारताकडून एका कॅलेंडर वर्षात सर्वाधिक ५०+ धावांचा विक्रम सूर्यकुमार यादवच्या नावावर आहे. २०२२ मध्ये त्याने नऊ वेळा ५० पेक्षा अधिक धावा केल्या होत्या.
यंदा २८ टी-२० आंतरराष्ट्रीय सामन्यांमध्ये इशानने ९८५ धावा केल्या असून त्याची फलंदाजीची सरासरी ३७.८८ आणि स्ट्राइक रेट १७१.३ आहे. त्याच्या नावावर एक शतक आणि सात अर्धशतके आहेत. एका कॅलेंडर वर्षात भारताकडून सर्वाधिक टी-२० आंतरराष्ट्रीय धावा करण्याच्या सूर्यकुमार यादवच्या विक्रमापासून तो आता फक्त ८० धावा दूर आहे.
सूर्यकुमारने २०२२ मध्ये ३१ टी-२० सामन्यांत १,१६४ धावा केल्या होत्या. त्याची सरासरी ४६.५६ आणि स्ट्राइक रेट १८७ पेक्षा अधिक होता.
दरम्यान, एका कॅलेंडर वर्षात टी-२० आंतरराष्ट्रीय क्रिकेटमध्ये सर्वाधिक धावांचा विक्रम पाकिस्तानच्या मोहम्मद रिझवानच्या नावावर आहे. २०२१ मध्ये त्याने २९ सामन्यांमध्ये १,३२६ धावा केल्या होत्या. मात्र, सर्व टी-२० आंतरराष्ट्रीय संघांचा विचार केला तर ऑस्ट्रियाच्या करणबीर सिंगच्या नावावर २०२५ मध्ये १,४८८ धावांचा विक्रम आहे.
भारताने आता आशियाई क्रीडा स्पर्धेच्या क्रिकेटमध्ये अंतिम फेरी गाठली असून सुवर्णपदकासाठी त्यांचा सामना पाकिस्तानविरुद्ध होणार आहे.
Read About : India vs Sri Lanka – भारताची श्रीलंकेवर 124 धावांनी मात; सुवर्णपदकासाठी पाकिस्तानशी लढत
E-Paper: Punyanagari E-Paper
Comments
Comments will appear here.
Comments are submitted for administrator moderation before appearing publicly.