Bangkok Car Accident – भरधाव कार प्रार्थनास्थळात घुसली; बँकाकमध्ये ३ जण जखमी

चायनाटाउनमधील ६८ वर्षे जुन्या माता गुआनयिन प्रार्थनास्थळात अपघात; दोघांची प्रकृती गंभीर, मूर्ती सुरक्षित

बँकॉक : Bangkok Car Accident : थायलंडची राजधानी बँकॉकमधील चायनाटाउन परिसरात भरधाव इलेक्ट्रिक कार प्रार्थनास्थळात घुसल्याने तीन जण जखमी झाले. गुरुवारी दुपारी सुमारे एक वाजण्याच्या सुमारास ही घटना घडली. कारचालकाला अचानक चक्कर आल्याने त्याचे वाहनावरील नियंत्रण सुटले आणि कार थेट माता गुआनयिन प्रार्थनास्थळात घुसल्याची प्राथमिक माहिती आहे.

‘फ्लॅपला चाय २’ पोलीस ठाण्याचे उपप्रमुख पोलीस लेफ्टनंट कर्नल अथापोल दारोक यांनी या अपघाताची माहिती दिली. प्रत्यक्षदर्शींनी दिलेल्या माहितीनुसार, रक्तदाबाचा त्रास असलेली एक ज्येष्ठ व्यक्ती कार चालवत होती. वाहन चालवताना चालकाला चक्कर आल्याने चुकून अ‍ॅक्सिलरेटर दाबले गेले आणि कार वेगाने प्रार्थनास्थळात घुसली.

दोघांची दुखापत गंभीर

प्राथमिक वृत्तानुसार, या अपघातात तीन जण जखमी झाले असून त्यापैकी दोघांना गंभीर दुखापत झाली आहे. जखमींना तातडीने रुग्णालयात दाखल करण्यात आले असून त्यांच्यावर उपचार सुरू आहेत.

कारच्या धडकेमुळे सुमारे ६८ वर्षे जुन्या प्रार्थनास्थळाच्या इमारतीचे आणि आतील काही साहित्याचे नुकसान झाले. मात्र, माता गुआनयिन यांच्या मूर्तीला कोणतीही हानी झाली नसल्याचे सांगण्यात आले.

अपघातानंतर परिसरात काही काळ गोंधळाचे वातावरण निर्माण झाले. चालकाला चक्कर आल्याने अपघात घडल्याची प्राथमिक माहिती समोर आली असली, तरी घटनेची नेमकी परिस्थिती तपासातून स्पष्ट होणार आहे.

Read About : Mumbai Howrah Duronto Express : दुरंतो एक्स्प्रेसच्या पॅन्ट्री कारमधून धूर; ट्रेनला 12 तासांचा विलंब
E-Paper: Punyanagari E-Paper