EPFO WhatsApp Services – खुशखबर.. ईपीएफओच्या सेवा आता व्हॉट्सॲपवर!

निष्क्रिय खात्यांसाठी स्वयंचलित सेटलमेंट सुविधासुद्धा सुरू

EPFO WhatsApp Services : नवी दिल्ली : कर्मचारी भविष्य निधी संघटनेच्या (ईपीएफओ) सेवा व्हॉट्सॲपद्वारे उपलब्ध करून देण्याची सुविधा रविवारपासून सुरू झाली आहे. केंद्रीय कामगार आणि रोजगार मंत्री मनसुख मांडविया यांनी या सेवेचे उद्घाटन केले.
कामगार मंत्रालयाने दिलेल्या माहितीनुसार, या सुविधेअंतर्गत, कर्मचारी भविष्य निधी (ईपीएफ) सदस्य ईपीएफओच्या सत्यापित

व्हॉट्सॲप सेवेद्वारे त्यांच्या पीएफ खात्यातील शिल्लक रक्कम, शेवटचे पाच व्यवहार आणि पासबुकचा तपशील पाहू शकतील. याव्यतिरिक्त, त्यांना प्रधानमंत्री विकसित भारत रोजगार योजनेशी (पीएमव्हीबीआरवाय) संबंधित औपचारिकता पूर्ण करण्यासाठी वैयक्तिक मार्गदर्शन आणि सहाय्य मिळेल. यामुळे दैनंदिन सेवा मोबाईल फोनवर सहज उपलब्ध होतील आणि लोकांना ईपीएफओ कार्यालयात जाण्याची गरज फारशी भासणार नाही.

बँक खाते पडताळणी

ईपीएफओच्या ७४ व्या स्थापना दिनानिमित्त आयोजित सोहळ्यात मंत्र्यांनी निष्क्रिय ईपीएफ खात्यांच्या पात्र प्रकरणांच्या स्वयंचलित सेटलमेंटची सुविधा देखील सुरू केली. याअंतर्गत, ज्या सदस्यांची आधार-सत्यापित निष्क्रिय ईपीएफ खाती आहेत आणि ज्यात १,००० रुपयांपर्यंतची ठेव आहे, त्यांना स्वतंत्र दावा अर्ज सादर करण्याची आवश्यकता भासणार नाही. ईपीएफओ विहित ओळख आणि बँक खाते पडताळणी पूर्ण केल्यानंतर पात्र खात्यांची सेटलमेंट आपोआप सुरू होईल. त्यामुळे पात्र लाभार्थ्यांना त्यांची देय रक्कम हस्तांतरित करणे शक्य होईल. या सुविधेमुळे अंदाजे एक लाख खात्यांना फायदा होण्याची अपेक्षा आहे. यात एकूण पाच कोटींच्या ठेवी आहेत.

या प्रसंगी सात प्रकाशनेही प्रसिद्ध करण्यात आली. ही प्रकाशने ज्ञाननिर्मिती, संस्थात्मक शिक्षण, कायदेशीर जागरूकता आणि संवेदनशील प्रशासनाप्रती ईपीएफओची वचनबद्धता दर्शवतात.

३२ लाख कोटी रुपयांचा निधी जमा

आपल्या ७४ वर्षांच्या प्रवासात ईपीएफओ देशातील कामगारांसाठी एक विश्वासार्ह संस्था म्हणून उदयास आली आहे. आठ कोटींहून अधिक सदस्यांच्या योगदानातून संस्थेने ३२ लाख कोटी रुपयांचा निधी जमा केला आहे. यावरून संस्थेवरील जनतेचा विश्वास स्पष्ट दिसतो. हे ईपीएफओ कर्मचाऱ्यांचे समर्पण, कठोर परिश्रम आणि वचनबद्धतेमुळे शक्य झाले आहे. अधिकाऱ्यांनी ईपीएफओ आपल्या ७५ व्या वर्षात पदार्पण करण्यापूर्वी कामगारांच्या गरजा लक्षात घेऊन विविध क्षेत्रांमध्ये नवीन उपक्रम सुरू करावेत. त्यांनी बदलत्या काळाशी जुळवून घ्यावे.

• मनसुख मांडविया, केंद्रीय कामगार मंत्री

Read About : Lek Ladki Yojana online application- ‘लेक लाडकी’ योजनेचा अर्ज आता घरबसल्या करा

E-Paper: Punyanagari E-Paper