Floating Titanium – गंभीर नुकसान झाले तरी पाण्यावर तरंगणारे टायटॅनियम विकसित

ऑस्ट्रेलियातील RMIT विद्यापीठाच्या संशोधकांची ऐतिहासिक कामगिरी

मेलबर्न (ऑस्ट्रेलिया) : Floating Titanium ऑस्ट्रेलियन अभियंत्यांनी एक अत्यंत मजबूत आणि हलके टायटॅनियमचे धातू-मिश्रण विकसित केले आहे, जे गंभीर स्वरूपाचे तडे गेल्यानंतर किंवा मोठे नुकसान झाल्यानंतरही पाण्यावर तरंगत राहते. आरएमआयटी युनिव्हर्सिटीच्या संशोधकांनी तयार केलेले हे जगातील पहिले फ्लोटिंग मेटल-हायब्रिड साहित्य असून, सागरी पायाभूत सुविधांसाठी हा एक महत्त्वाचा शोध मानला जात आहे.

सागरी यंत्रणा बुडण्याच्या समस्येवर मात

समुद्रातील तरंगणारे सेन्सर्स किंवा ब्युईस पाण्यावर राहण्यासाठी अंतर्गत पोकळीवर अवलंबून असतात. त्यात तडा गेल्यास पाणी आत शिरून अख्खी यंत्रणा बुडते. टायटॅनियमचे धातूचे जाळे वजनाने पाण्याच्या घनतेपेक्षा १० पटीने हलके असू शकते, पण त्याच्या उघड्या रचनेमुळे त्यात पाणी शिरून ते बुडत असे. यावर शास्त्रज्ञांनी एक अनोखा मार्ग शोधला आहे. या संशोधनाचे नेतृत्व प्राध्यापक मा कियान यांनी केले.

पॉलीयुरेथेन फोमचे अंतर्गत जाळे

संशोधकांनी ३डी प्रिंटिंग तंत्रज्ञानाचा वापर करून टायटॅनियमच्या पोकळ नळ्यांचे एक जाळे तयार केले आणि या नळ्यांच्या आत पॉलीयुरेथेन फोम भरला. या रचनेमुळे नळ्यांच्या बाहेरील भागातून पाणी मुक्तपणे वाहू शकते, मात्र नळ्यांच्या आत असलेल्या फोममधील अतिसूक्ष्म बंद कप्पे गॅस किंवा हवा कोंडून ठेवतात आणि पाणी आत शिरू देत नाहीत. त्यामुळे बाहेरील थर पूर्णपणे तुटला किंवा चिरडला, तरीही हा धातू तरंगतच राहतो. प्रयोगादरम्यान हे साचे सलग दोन महिने गोड्या पाण्यात तरंगत राहिले.

स्टील आणि प्लास्टिकपेक्षा ७० टक्के अधिक मजबूत

नेहमीच्या वजनाचा विचार केला, तर हे नवीन टायटॅनियमचे जाळे सध्या समुद्रात वापरल्या जाणाऱ्या स्टेनलेस स्टील किंवा हाय-डेन्सिटी पॉलिथिलिन पेक्षा तब्बल ७० टक्के जास्त मजबूत आहे. समुद्राच्या खाऱ्या पाण्याचाही यावर कोणताही परिणाम होत नाही. मेलबर्नच्या पोर्ट फिलिप बे मधील खाऱ्या पाण्यात दोन आठवडे बुडवून ठेवल्यानंतरही या धातूचे वजन केवळ ०.१५ टक्के कमी झाले, तर त्याची ताकद १ टक्क्यापेक्षाही कमी घटली.

तरंगण्याचे मोजमाप करण्यासाठी स्केलेटल डेंसिटी नियम

या खुल्या संरचनेच्या तरंगण्याच्या क्षमतेचा अंदाज घेण्यासाठी शास्त्रज्ञांनी स्केलेटल डेंसिटी नावाचा एक नवीन नियम तयार केला आहे. हा नियम वाळू किंवा पाणी आत जाऊ शकणारी मोकळी जागा न मोजता, केवळ पाणी रोखणाऱ्या अंतर्गत भिंतींची घनता मोजतो. जर ही घनता आजूबाजूच्या पाण्याच्या घनतेपेक्षा कमी असेल, तर ती रचना पाण्यात हमखास तरंगणार, असा हा सोपा नियम आहे.

Read About : OpenAI Mathematical Breakthrough – ‘ओपनएआय’चा गणित, भौतिकशास्त्रात पराक्रम!
E-Paper : Punyanagari E-Paper