Stock Market Rally – सेन्सेक्स 1,225 अंकांनी वधारला; निफ्टीची 1.58 टक्क्यांची झेप

परकीय गुंतवणूकदारांच्या खरेदीचा बाजाराला आधार; कच्च्या तेलाच्या दरातील घसरणीमुळे सकारात्मक वातावरण, एफएमसीजी क्षेत्राची दमदार कामगिरी

मुंबई : Stock Market Rally भारतीय शेअर बाजारात मंगळवारी (३ नोव्हेंबर) जोरदार तेजी पाहायला मिळाली. मुंबई शेअर बाजाराचा सेन्सेक्स तब्बल १,२२५.०७ अंकांनी वधारून ७६,९१७.८५ अंकांवर बंद झाला. तर राष्ट्रीय शेअर बाजाराचा निफ्टी ५० निर्देशांक ३७०.०५ अंकांची वाढ नोंदवत २३,८१०.८५ अंकांवर स्थिरावला. दोन्ही प्रमुख निर्देशांकांमध्ये दीड टक्क्यांहून अधिक वाढ झाली.

कच्च्या तेलाच्या किमतीतील घसरण, परदेशी संस्थात्मक गुंतवणूकदारांकडून (एफआयआय) पुन्हा सुरू झालेली खरेदी आणि बहुतांश क्षेत्रांमध्ये दिसलेली सकारात्मक हालचाल यामुळे बाजाराला बळ मिळाले.

परदेशी गुंतवणूकदारांच्या खरेदीचा आधार

जिओजित इन्व्हेस्टमेंट्सचे संशोधन प्रमुख विनोद नायर यांच्या मते, कच्च्या तेलाच्या किमतीतील मोठी घसरण, अमेरिकेतील सरकारी रोख्यांवरील परताव्यातील घट आणि परदेशी संस्थात्मक गुंतवणूकदारांचा वाढता सहभाग यामुळे भारतीय शेअर बाजारातील तेजीला चालना मिळाली. दुसऱ्या तिमाहीतील कंपन्यांचे समाधानकारक आर्थिक निकाल आणि परदेशी गुंतवणूकदारांचे बाजारात पुन्हा झालेले आगमन यामुळे गुंतवणूकदारांचा विश्वास वाढल्याचे त्यांनी सांगितले. विशेषतः वित्तीय सेवा आणि ग्राहकाभिमुख क्षेत्रांतील समभागांमध्ये खरेदीचा जोर दिसून आला. मात्र, ही तेजी कायम राहण्यासाठी कंपन्यांचे आर्थिक निकाल, परदेशी गुंतवणुकीचा ओघ आणि कच्च्या तेलाच्या किमतीतील घसरण पुढेही टिकणे महत्त्वाचे ठरणार आहे.

एफएमसीजी क्षेत्र आघाडीवर; या क्षेत्रांतही वाढ

राष्ट्रीय शेअर बाजारातील क्षेत्रनिहाय निर्देशांकांमध्ये निफ्टी एफएमसीजीने सर्वाधिक ३.१८ टक्क्यांची वाढ नोंदवली. त्यापाठोपाठ निफ्टी रिअल्टी २.१० टक्के, निफ्टी प्रायव्हेट बँक १.७७ टक्के आणि निफ्टी ऑटो १.४७ टक्क्यांनी वधारला. निफ्टी मीडिया निर्देशांकातही ०.४९ टक्क्यांची वाढ झाली. मात्र, काही क्षेत्रांमध्ये घसरण कायम होती. निफ्टी पीएसयू बँक १.३७ टक्के, निफ्टी मेटल ०.४० टक्के आणि निफ्टी आयटी ०.१५ टक्क्यांनी घसरला.

या कंपन्यांच्या समभागांत तेजी

निफ्टी ५० मधील बीएसई, नेस्ले इंडिया, टाटा कन्झ्युमर आणि एशियन पेंट्स या कंपन्यांचे समभाग आघाडीवर राहिले. दुसरीकडे पॉवरग्रिड, एसबीआय, ओएनजीसी, अदानी एंटरप्रायझेस, टाटा स्टील आणि एनटीपीसी यांच्या समभागांत घसरण झाली.

सोने-चांदीच्या दरात घसरण

शेअर बाजारात तेजी असतानाच मौल्यवान धातूंच्या किमतीत मात्र घसरण झाली. २४ कॅरेट सोन्याचा दर १.२६ टक्क्यांनी कमी होऊन प्रति १० ग्रॅम १ लाख ३८ हजार ४२० रुपयांवर आला. तर चांदीचा दर ३.५९ टक्क्यांनी घसरून प्रति किलो १ लाख ७७ हजार १२० रुपयांवर पोहोचला. दरम्यान, आंतरराष्ट्रीय बाजारात ब्रेंट क्रूड तेलाचा दर प्रति बॅरल १०५.७१ डॉलर होता.

रुपयाला कच्च्या तेलाच्या घसरणीचा दिलासा

अमेरिकी डॉलरच्या तुलनेत भारतीय रुपयातही सुधारणा झाली. मंगळवारी रुपया सुमारे ९४.८० च्या पातळीवर व्यवहार करत होता. मागील तुलनेत त्यात १२ ते २४ पैशांची वाढ झाल्याचे वृत्त आहे. ब्रिकवर्क रेटिंग्जचे संशोधन प्रमुख राजीव शरण यांच्या मते, कच्च्या तेलाच्या किमतीतील घसरणीमुळे चलन बाजाराला तातडीचा दिलासा मिळाला. मात्र, अमेरिकी डॉलरमधील मजबुती आणि अमेरिकेतील मध्यावधी निवडणुकांपूर्वीची सावध भूमिका यामुळे रुपयातील वाढ मर्यादित राहिली.

आशियाई बाजारांत संमिश्र स्थिती

भारतीय बाजारात तेजी असताना आशियातील बहुतांश प्रमुख बाजारांत घसरण दिसून आली. जपानचा निक्केई २२५ निर्देशांक ०.३३ टक्के, तैवानचा निर्देशांक ३.७२ टक्के आणि दक्षिण कोरियाचा कोस्पी ३.७२ टक्क्यांनी घसरला. सिंगापूरचा स्ट्रेट्स टाइम्स ०.६६ टक्क्यांनी खाली आला. मात्र, हाँगकाँगचा हँग सेंग निर्देशांक ०.३९ टक्क्यांनी वधारला. एकूणच, परदेशी गुंतवणूकदारांची खरेदी आणि कच्च्या तेलाच्या किमतीतील घसरण यामुळे भारतीय शेअर बाजाराला मोठा आधार मिळाला. मात्र, जागतिक घडामोडी, अमेरिकी फेडरल रिझर्व्हचे धोरण आणि कंपन्यांचे आगामी आर्थिक निकाल यावर बाजाराची पुढील दिशा अवलंबून राहणार आहे.

Read About : Jio Platforms Stock Market Debut- जिओ प्लॅटफॉर्म्सची शेअर बाजारात जोरदार धडक
E-Paper: Punyanagari E-Paper