Maharashtra Ssc Hsc Exam Timetable 2027 – दहावी-बारावीच्या विद्यार्थ्यांसाठी महत्त्वाची बातमी!

बारावीची लेखी परीक्षा ८ फेब्रुवारीपासून, तर दहावीची परीक्षा १५ फेब्रुवारीपासून सुरू होणार

छत्रपती संभाजीनगर : Maharashtra Ssc Hsc Exam Timetable 2027 – महाराष्ट्र राज्य माध्यमिक व उच्च माध्यमिक शिक्षण मंडळाने फेब्रुवारी-मार्च २०२७ मध्ये होणाऱ्या इयत्ता दहावी आणि बारावीच्या परीक्षांसंदर्भात महत्त्वाची घोषणा केली आहे. राज्य मंडळामार्फत घेण्यात येणाऱ्या उच्च माध्यमिक प्रमाणपत्र (इयत्ता बारावी) आणि माध्यमिक शालान्त प्रमाणपत्र (इयत्ता दहावी) परीक्षांचे अंतिम सविस्तर वेळापत्रक जाहीर करण्यात आले आहे. त्यामुळे परीक्षेची तयारी करणाऱ्या राज्यातील लाखो विद्यार्थ्यांना आता अभ्यासाचे नियोजन अधिक निश्चितपणे करता येणार आहे.
मंडळाने प्रसिद्ध केलेल्या सूचनेनुसार, बारावीची लेखी परीक्षा ८ फेब्रुवारी २०२७ पासून सुरू होणार असून १८ मार्च २०२७ पर्यंत चालणार आहे. तर दहावीची लेखी परीक्षा १५ फेब्रुवारी २०२७ पासून सुरू होऊन १५ मार्च २०२७ रोजी संपणार आहे. त्यामुळे दोन्ही वर्गांतील विद्यार्थ्यांसाठी परीक्षेच्या तयारीचा महत्त्वाचा टप्पा आता सुरू झाला आहे. उच्च माध्यमिक प्रमाणपत्र अर्थात इयत्ता बारावीच्या विद्यार्थ्यांची लेखी परीक्षा ८ फेब्रुवारी ते १८ मार्च २०२७ या कालावधीत आयोजित करण्यात येणार आहे. त्यापूर्वी प्रात्यक्षिक, श्रेणी, तोंडी परीक्षा आणि अंतर्गत मूल्यमापनाची प्रक्रिया २० जानेवारी ते ६ फेब्रुवारी २०२७ या कालावधीत पार पडणार आहे. बारावी हा विद्यार्थ्यांच्या शैक्षणिक आयुष्यातील अत्यंत महत्त्वाचा टप्पा मानला जातो. बारावीनंतर अभियांत्रिकी, वैद्यकीय, औषधनिर्माणशास्त्र, व्यवस्थापन तसेच विविध पदवी अभ्यासक्रमांच्या प्रवेशाचा मार्ग खुला होतो. त्यामुळे विद्यार्थ्यांनी लेखी परीक्षेसोबतच प्रात्यक्षिक परीक्षांचेही नियोजन वेळेत करणे आवश्यक आहे.

दहावीची परीक्षा १५ फेब्रुवारीपासून

माध्यमिक शालान्त प्रमाणपत्र अर्थात इयत्ता दहावीची लेखी परीक्षा १५ फेब्रुवारी ते १५ मार्च २०२७ या कालावधीत होणार आहे. दहावीच्या विद्यार्थ्यांच्या प्रात्यक्षिक, श्रेणी, तोंडी परीक्षा आणि अंतर्गत मूल्यमापनासाठी २८ जानेवारी ते १३ फेब्रुवारी २०२७ हा कालावधी निश्चित करण्यात आला आहे. परीक्षेचा कालावधी निश्चित झाल्याने अभ्यासक्रमाची उजळणी, सराव परीक्षा आणि विषयानुसार अभ्यासाचे नियोजन करण्यासाठी विद्यार्थ्यांना पुरेसा आधार मिळणार आहे.

नऊ विभागीय मंडळांमार्फत परीक्षा

महाराष्ट्र राज्य माध्यमिक व उच्च माध्यमिक शिक्षण मंडळाच्या पुणे, नागपूर, छत्रपती संभाजीनगर, मुंबई, कोल्हापूर, अमरावती, नाशिक, लातूर आणि कोकण या नऊ विभागीय मंडळांमार्फत या परीक्षा आयोजित करण्यात येणार आहेत. राज्यातील सर्व संबंधित शाळा, कनिष्ठ महाविद्यालये आणि विद्यार्थ्यांनी जाहीर केलेल्या परीक्षेच्या कालावधीची नोंद घ्यावी, असे मंडळाने स्पष्ट केले आहे. दहावी आणि बारावीच्या परीक्षांचे विषयानुसार दिनांक व सविस्तर वेळापत्रक मंडळाच्या अधिकृत संकेतस्थळावर ६ नोव्हेंबर २०२६ पासून उपलब्ध करून देण्यात आले आहे.

व्हॉट्सॲपवरील वेळापत्रकावर विश्वास ठेवू नका!

परीक्षेच्या वेळापत्रकाबाबत मंडळाने विद्यार्थ्यांना विशेष सूचना दिली आहे. माध्यमिक शाळा, उच्च माध्यमिक शाळा आणि कनिष्ठ महाविद्यालयांना छापील स्वरूपात उपलब्ध करून दिले जाणारे वेळापत्रक अंतिम राहणार आहे. त्यामुळे विद्यार्थ्यांनी परीक्षेच्या तारखांची खात्री संबंधित शाळा किंवा महाविद्यालयाकडून मिळणाऱ्या छापील वेळापत्रकावरूनच करावी. अन्य संकेतस्थळांवरील, इतर यंत्रणांनी छापलेल्या किंवा व्हॉट्सॲप आणि तत्सम सोशल मीडिया माध्यमांवर व्हायरल होणाऱ्या वेळापत्रकांना अधिकृत समजू नये, असे राज्य माध्यमिक व उच्च माध्यमिक शिक्षण मंडळाचे सचिव डॉ. दीपक माळी यांनी स्पष्ट केले आहे.

Read About : GMCH Medical Students – वैद्यकीय विद्यार्थ्यांसाठी घाटीत संधींची नवी कवाडे उघडणार !
E-Paper: Punyanagari E-Paper