Children’s Day 2026 – बालदिनानिमित्त राष्ट्रपती द्रौपदी मुर्मू यांनी साधला विद्यार्थ्यांशी संवाद

राष्ट्रपती भवनात विविध शाळांतील मुलांची भेट; स्वप्नपूर्तीसाठी जिद्द, समर्पण आणि चिकाटीने प्रयत्न करण्याचे आवाहन

नवी दिल्ली : Children’s Day 2026 बालदिनानिमित्त राष्ट्रपती द्रौपदी मुर्मू यांनी शनिवारी राष्ट्रपती भवनातील सांस्कृतिक केंद्रात विविध शाळा आणि संस्थांमधील विद्यार्थ्यांशी संवाद साधला. यावेळी त्यांनी मुलांना आपल्या स्वप्नांचा पाठपुरावा करण्यासाठी समर्पण, जिद्द आणि चिकाटीने प्रयत्न करण्याचे आवाहन केले.

राष्ट्रपती भवनाच्या अधिकृत ‘एक्स’ खात्यावरून या भेटीची माहिती देण्यात आली. विविध शाळा आणि संस्थांमधील मुलांची भेट घेऊन राष्ट्रपतींनी त्यांच्याशी संवाद साधला. विद्यार्थ्यांनी आपली स्वप्ने पूर्ण करण्यासाठी सातत्याने प्रयत्न करावेत, असा संदेश त्यांनी दिला.

विकसित भारताच्या उभारणीत मुलांची महत्त्वाची भूमिका

परराष्ट्र व्यवहार राज्यमंत्री कीर्ती वर्धन सिंह यांनीही बालदिनानिमित्त देशातील मुलांना शुभेच्छा दिल्या. विकसित भारताच्या उभारणीत आजची मुले महत्त्वाची भूमिका बजावणार असल्याचे त्यांनी म्हटले. ‘एक्स’वरील संदेशात त्यांनी मुलांमधील जिज्ञासा वाढवणे, त्यांना दर्जेदार शिक्षण उपलब्ध करून देणे आणि मोठी स्वप्ने पाहण्यासाठी आवश्यक संधी देणे ही देशाची जबाबदारी असल्याचे नमूद केले. मुलांना भविष्यात देशाचे नेतृत्व करण्यासाठी सक्षम बनवण्याचा संकल्प करण्याचे आवाहनही त्यांनी केले.

पंडित जवाहरलाल नेहरू यांच्या जयंतीनिमित्त बालदिन

भारतात दरवर्षी १४ नोव्हेंबर हा दिवस बालदिन म्हणून साजरा केला जातो. देशाचे पहिले पंतप्रधान पंडित जवाहरलाल नेहरू यांच्या जयंतीनिमित्त हा दिवस पाळला जातो. मुलांवरील प्रेमामुळे नेहरू यांना ‘चाचा नेहरू’ या नावाने ओळखले जात होते. पंडित जवाहरलाल नेहरू यांचा जन्म १४ नोव्हेंबर १८८९ रोजी उत्तर प्रदेशातील प्रयागराज येथे झाला. देशाच्या स्वातंत्र्यलढ्यात सक्रिय सहभाग घेतल्यानंतर १५ ऑगस्ट १९४७ रोजी त्यांनी पंतप्रधानपदाची जबाबदारी स्वीकारली. २७ मे १९६४ रोजी त्यांचे निधन झाले.

शाळांमध्ये विविध उपक्रमांचे आयोजन

बालदिनानिमित्त देशभरातील शाळांमध्ये विद्यार्थ्यांसाठी खेळ, स्पर्धा आणि सांस्कृतिक कार्यक्रमांचे आयोजन केले जाते. मुलांच्या कलागुणांना वाव देण्यासोबतच त्यांच्यातील आत्मविश्वास आणि सर्जनशीलता वाढवण्यावर या उपक्रमांमधून भर दिला जातो. संयुक्त राष्ट्रांनी १९५४ मध्ये २० नोव्हेंबर हा दिवस जागतिक बालदिन म्हणून घोषित केला होता. भारतातही सुरुवातीला २० नोव्हेंबर रोजी बालदिन साजरा केला जात असे. मात्र, पंडित जवाहरलाल नेहरू यांच्या निधनानंतर त्यांच्या जन्मदिवशी म्हणजेच १४ नोव्हेंबर रोजी राष्ट्रीय बालदिन साजरा करण्याची परंपरा सुरू झाली.

Read About : Rahul Gandhi Phone Tapping Allegations – मोदींकडून माझे फोन टॅपिंग – राहुल गांधी
E-Paper: Punyanagari E-Paper