AI Billionaires Bunkers : एआयच्या विनाशाची भीती की सुरक्षिततेची तयारी? टेक अब्जाधीश उभारताहेत भूमिगत बंकर्स!

एआय तंत्रज्ञानातून अब्जावधींची कमाई करणारे टेक क्षेत्रातील दिग्गज संभाव्य संकटासाठी सुरक्षित आश्रयस्थाने उभारत असल्याचा दावा

कॅल्गरी (कॅनडा) : AI Billionaires Bunkers जगातील सर्वात शक्तिशाली टेक कंपन्यांचे प्रमुख एकीकडे कृत्रिम बुद्धिमत्तेच्या (एआय) माध्यमातून अब्जावधींचा नफा कमवत आहेत, तर दुसरीकडे हीच एआय तंत्रज्ञानाची क्रांती मानवाच्या विनाशाला कारणीभूत ठरू शकते, या भीतीने स्वत:चा बचाव करण्यासाठी सुरक्षित भूमिगत बंकर्स आणि अलिप्त बेटांवर आलिशान सोयीसुविधा उभारण्यात व्यस्त आहेत.

कॅल्गरी विद्यापीठाचे प्राध्यापक डीन करन यांनी प्रसार माध्यमांशी साधलेल्या संवादात या विषयावर मत मांडले. त्यातील प्रमुख मुद्दे असे –

समाजशास्त्रामध्ये ‘रिस्क पोझिशन्स’ ही संकल्पना वापरली जाते. ज्याप्रमाणे समाजात श्रीमंत आणि गरीब असे वर्ग असतात, तसेच धोक्यांबाबतही दोन वर्ग असतात:

• नफा कमवणारा वर्ग: जे तंत्रज्ञान विकसित करून प्रचंड पैसा कमावतात, परंतु त्यापासून होणाऱ्या दुष्परिणामांपासून स्वत:ला दूर ठेवतात.
• तोटा सहन करणारा वर्ग: ज्यांना या तंत्रज्ञानाचा कोणताही मोठा आर्थिक फायदा मिळत नाही, परंतु त्याच्या दुष्परिणामांचा (उदा. नोकऱ्या जाणे, विजेचा तुटवडा, सुरक्षेचा धोका) सर्व भार त्यांच्यावरच पडतो.

हवामान बदल आणि पर्यावरणाचा ऱ्हास करणाऱ्या उद्योगांप्रमाणेच, टेक क्षेत्रातील अब्जाधीशही एआयच्या धोक्यांचा नफा स्वत:कडे ठेवून त्याचा धोका संपूर्ण जगावर ढकलत आहेत.

विनाशाचा इशारा, तरीही शर्यत सुरूच!

प्रगत एआयमुळे मानवजातीचे अस्तित्व धोक्यात येऊ शकते, असा इशारा खुद्द एआय क्षेत्रातील अनेक तज्ज्ञ आणि कर्मचाऱ्यांनी दिला आहे. या मोहिमेची तुलना अणुबॉम्ब बनवणाऱ्या ‘मॅनहॅटन प्रोजेक्ट’ किंवा ‘टर्मिनेटर’ चित्रपटातील तंत्रज्ञानाशी केली जात आहे. असे असले तरी, टेक कंपन्यांमधील एआय वर्चस्व मिळवण्याची स्पर्धा थांबलेली नाही. टेक कंपन्यांचे व्यवसाय मॉडेल हे जास्तीत जास्त डेटा गोळा करणे, लोकांना इंटरनेट व डिजिटल उपकरणांवर पूर्णपणे अवलंबून ठेवण्यावर आधारित आहे. सर्वसामान्य नागरिक डिजिटल नेटवर्कवर जितके जास्त अवलंबून राहतील, तितकाच एआयकडून संभाव्य विनाशाचा धोका वाढेल.

समाजशास्त्रज्ञांचा इशारा

जर्मन समाजशास्त्रज्ञ उलरिच बेक यांनी आधुनिक समाजाचे वर्णन ‘विषारी केकचे वाटप’ असे केले होते. आधुनिक विकासाचे फायदे मोजक्या लोकांना मिळतात, पण त्याचे घातक परिणाम मात्र संपूर्ण समाजाला भोगावे लागतात.

जनता आता शांत बसणार का?

उलरिच बेक यांच्या मते, लोक कायम गप्प बसत नाहीत. जेव्हा त्यांना समजते की त्यांच्या जीवाशी खेळून काही लोक अब्जाधीश होत आहेत, तेव्हा ते एकत्र येतात. सध्या जगभरात याची उदाहरणे दिसू लागली आहेत. अनेक देशांमध्ये प्रचंड वीज आणि पाणी वापरणाऱ्या डेटा सेंटर्सविरोधात नागरिक रस्त्यावर उतरत आहेत. लहान मुलांना सोशल मीडियाच्या धोक्यांपासून वाचवण्यासाठी पालक सरकारकडे कडक कायद्यांची मागणी करत आहेत. सर्वसामान्य नागरिक आता स्वत:वर लादल्या जाणाऱ्या या धोक्यांविरुद्ध आवाज उठवू लागले आहेत. या संघर्षात जिंकणार कोण — सर्वसामान्य जनता, सरकार की टेक जगतातील हे अब्जाधीश? हे येणारा काळच ठरवेल.

Read About : Cyberbullying among students worldwide – जगभरातील दहापैकी 1 विद्यार्थ्याला सायबर बुलिंगचा फटका
E-Paper: Punyanagari E-Paper