Asian Games 2026 : गणेश मणि रत्नमला कांस्यपदक; भारताची तिरंदाजीत चार पदकांची कमाई

कंपाउंड तिरंदाजी मोहिमेचा तीन सुवर्ण आणि एका कांस्यपदकासह शेवट; भारताच्या खात्यात एकूण ६३ पदके

नवी दिल्ली : Asian Games 2026 : आशियाई क्रीडा स्पर्धा २०२६ मध्ये भारताच्या गणेश मणि रत्नम थिरुमुरूने पुरुषांच्या कंपाउंड वैयक्तिक तिरंदाजी प्रकारात कांस्यपदक पटकावले. गुरुवारी झालेल्या कांस्यपदकाच्या लढतीत त्याने व्हिएतनामच्या कॉंग डुक डांगचा १४९-१४४ असा पराभव केला. या पदकासह भारताची कंपाउंड तिरंदाजीतील मोहीम तीन सुवर्ण आणि एका कांस्यपदकासह संपली.

गणेशचे आशियाई क्रीडा स्पर्धेतील हे दुसरे पदक ठरले. कांस्यपदकाच्या लढतीत त्याने सुरुवातीपासून अचूक नेम साधत प्रतिस्पर्ध्यावर दबाव कायम ठेवला. व्हिएतनामच्या तिरंदाजाने सुरुवातीलाच आठ गुणांची कमाई केली. मात्र, गणेशने सातत्यपूर्ण कामगिरी करत अखेर १४९-१४४ अशा फरकाने विजय मिळवला.

भारतासाठी पहिल्यांदाच मोठ्या बहुराष्ट्रीय क्रीडा स्पर्धेत सहभागी झालेल्या गणेशने या कामगिरीने लक्ष वेधले. त्याच्या पदकामुळे भारताच्या एकूण पदकसंख्येतही भर पडली.

भारताच्या खात्यात ६३ पदके

आशियाई क्रीडा स्पर्धेत भारताने आतापर्यंत १० सुवर्ण, २२ रौप्य आणि ३१ कांस्य अशी एकूण ६३ पदके जिंकली आहेत. पदकतालिकेत भारत आठव्या स्थानावर आहे. गुरुवारी नौकानयनमध्ये मनू फ्रान्सिस आणि प्रिन्स नोबल या जोडीने पुरुषांच्या स्किफ प्रकारात रौप्यपदक पटकावले. चीननंतर दुसरे स्थान मिळवताना भारतीय जोडीने नऊ शर्यतींमध्ये २३ गुणांची नोंद केली.

महिला सांघिक स्क्वॉशमध्ये भारताला कांस्यपदक मिळाले. उपांत्य फेरीत हाँगकाँगकडून १-२ असा पराभव झाल्यानंतर भारतीय संघाला कांस्यपदकावर समाधान मानावे लागले. कुस्तीमध्ये नितेश सिवाचने पुरुषांच्या ९७ किलो ग्रीको-रोमन प्रकाराच्या अंतिम फेरीत प्रवेश केला. त्याने मंगोलियाच्या गंखुयाग गानबातारचा ९-० असा पराभव केला. दुसरीकडे, महिलांच्या ६२ किलो वजनी गटात मानसीला जपानच्या दोन वेळच्या विश्वविजेत्या नोनोका ओझाकीकडून ०-६ असा पराभव पत्करावा लागला. आता ती कांस्यपदकासाठी लढणार आहे.

सेपकटकरॉमध्ये भारतीय पुरुष संघाने व्हिएतनामचा २-० असा पराभव करत उपांत्य फेरीत स्थान मिळवले. त्यामुळे भारताचे या प्रकारातील पदक निश्चित झाले आहे. नेमबाजीत अनिश भानवालाने पुरुषांच्या २५ मीटर रॅपिड फायर पिस्तूल प्रकाराच्या दुसऱ्या पात्रता फेरीत नववे स्थान मिळवत अंतिम फेरीत प्रवेश केला. कॅनो स्लॅलममध्ये शिखा चौहान महिलांच्या कयाक सिंगल प्रकारात सातव्या स्थानावर राहिली. गोल्फमध्ये प्रणवी उर्स महिलांच्या वैयक्तिक स्ट्रोक प्ले स्पर्धेच्या दुसऱ्या फेरीनंतर दुसऱ्या स्थानावर होती.

दरम्यान, पुरुषांच्या व्हॉलीबॉलमध्ये भारताचे आव्हान उपांत्यपूर्व फेरीत संपुष्टात आले. पाकिस्तानकडून भारताला ०-३ असा पराभव स्वीकारावा लागला. टेनिसमध्ये सुमित नागललाही चीनच्या वू यिबिंगकडून पुरुष एकेरीच्या उपांत्यपूर्व फेरीत सरळ सेटमध्ये पराभव पत्करावा लागला.

Read About : India vs Sri Lanka – भारताची श्रीलंकेवर 124 धावांनी मात; सुवर्णपदकासाठी पाकिस्तानशी लढत
E-Paper: Punyanagari E-Paper