China Armpit Hair Trend 2026 : काखेतील केस रंगवण्याची नवी फॅशन!

सौंदर्याच्या जुन्या चौकटींना छेद, चिनी तरुणींमध्ये सुरु झाला ट्रेण्ड

बीजिंग : China Armpit Hair Trend : चीनमधील तरुण महिलांमध्ये सध्या काखेतील केस विविध रंगीबेरंगी रंगांनी रंगवण्याचा एक अनोखा फॅशन ट्रेंड वेगाने लोकप्रिय होत आहे. एकेकाळी अस्वच्छ किंवा लाजीरवाणी मानल्या गेलेल्या या गोष्टीला आता चिनी तरुणी स्वत:चे फॅशन स्टेटमेंट आणि शारीरिक स्वातंत्र्याची ठाम अभिव्यक्ती म्हणून जगासमोर मांडत आहेत.

चीनचे लोकप्रिय लाइफस्टाइल प्लॅटफॉर्म ‘रेडनोट’ आणि ‘वेइबो’वर तरुणी निळ्या, गुलाबी, पिवळ्या आणि सोनेरी रंगात रंगवलेल्या काखेतील केसांचे फोटो आत्मविश्वासाने शेअर करत आहेत. यासोबतच केस ब्लीच करण्याच्या पद्धती आणि त्वचेची काळजी घेण्याच्या टिप्सही देणारे व्हिडिओ व्हायरल होत आहेत.

२०११ मध्ये प्रसिद्ध पॉप स्टार लेडी गागाने तिचे काखेतील केस हिरव्या रंगाने रंगवून या वेगळ्या प्रयोगाला सुरुवात केली होती. चिनी तरुणींचा हा प्रयत्न जागतिक ‘बॉडी पॉझिटिव्हिटी’ चळवळीशी जोडला जात आहे. सांस्कृतिक अभ्यासकांच्या मते, चीनमध्ये काखेतील केसांची लाज वाटणे हा प्रकार पारंपारिक नसून तो पाश्चात्य संस्कृतीच्या प्रभावातून आला आहे.

ऐतिहासिक संदर्भ

पारंपारिक कन्फ्युशियन विचारसरणीनुसार ‘शरीर ही पालकांकडून मिळालेली भेट आहे, त्यात बदल करू नये’ असे मानले जायचे. सॉंग घराण्याच्या चित्रांमध्ये महिलांचे नैसर्गिक केस स्पष्टपणे दाखवले गेले आहेत. प्रसिद्ध दिग्दर्शक आंग ली यांच्या ‘लस्ट, कॉशन’ या चित्रपटात १९३० च्या दशकातील शांघायमधील नैसर्गिक सौंदर्य दाखवण्यासाठी अभिनेत्री टँग वेईने तब्बल ८ महिने काखेतील केस वाढवले होते.

सौंदर्याच्या व्याख्या बदलल्या

१९८० आणि ९० च्या दशकात पाश्चात्य फॅशन मासिके आणि हेअर रिमूव्हल जाहिरातींमुळे ‘केसमुक्त गुळगुळीत त्वचा’ हीच सौंदर्याची व्याख्या बनली होती. मात्र, आता चिनी तरुणी या पारंपरिक विचारांना आव्हान देत आहेत.

नेटकऱ्यांची प्रतिक्रिया

या ट्रेंडबाबत भाष्य करताना एका चिनी युझरने मांडलेला विचार सध्या चर्चेत आहे:
‘काखेतील केस रंगवणे हे लाज वाटण्याबद्दल नसून स्वातंत्र्य आणि निवडीबद्दल आहे. कोणी ते काढू शकते, कोणी वाढवू शकते, तर कोणी रंगवू शकते. सरतेशेवटी, स्त्रीच्या शरीराचे स्वरूप कसे असावे, हा निर्णय पूर्णपणे तिचाच असायला हवा.

Read About : Yeh Prem Mol Liya overseas distribution – बडजात्यांच्या ‘ये प्रेम मोल लिया’ला यशराजकडे
E-Paper: Punyanagari E-Paper