ICC Womens ODI Rankings – वैष्णवी शर्माची 53 स्थानांची मोठी झेप; आयसीसी क्रमवारीत 94व्या स्थानी

झिम्बाब्वेविरुद्धच्या मालिकेत ९ बळी घेण्याची कामगिरी; भारतीय महिला संघाच्या अनेक खेळाडूंना क्रमवारीत फायदा

नवी दिल्ली : ICC Womens ODI Rankings झिम्बाब्वेविरुद्धच्या तीन सामन्यांच्या एकदिवसीय मालिकेत भारतीय महिला संघाने ३-० असा निर्विवाद विजय मिळवला. या दमदार कामगिरीचे प्रतिबिंब आंतरराष्ट्रीय क्रिकेट परिषदेच्या (आयसीसी) ताज्या महिला एकदिवसीय क्रमवारीतही दिसून आले आहे. भारताची युवा डावखुरी फिरकीपटू वैष्णवी शर्मा हिने गोलंदाजी क्रमवारीत तब्बल ५३ स्थानांची झेप घेत ९४वे स्थान पटकावले आहे.

२० वर्षीय वैष्णवीने मालिकेतील शेवटच्या दोन सामन्यांत मिळून ९ बळी घेतले. दुसऱ्या एकदिवसीय सामन्यात तिने चार बळी मिळवले होते. त्यानंतर तिसऱ्या आणि अंतिम सामन्यात अवघ्या ३९ धावा देत पाच बळी घेण्याची उल्लेखनीय कामगिरी केली. एकदिवसीय क्रिकेटमधील केवळ तिसऱ्याच सामन्यात तिने ही कामगिरी केली. या शानदार गोलंदाजीसाठी तिला सामनावीर पुरस्कारही मिळाला.

सायली साठघरे आणि क्रांती गौडलाही फायदा

भारतीय गोलंदाजांच्या क्रमवारीत सायली साठघरे हिनेही १८ स्थानांची प्रगती करत ८५वे स्थान मिळवले. अंतिम सामन्यात तिने सहा षटकांत केवळ ११ धावा देत दोन बळी घेतले. याशिवाय तिच्या गोलंदाजीवर ३० निर्धाव चेंडू टाकण्यात आले. क्रांती गौड हिनेही एका स्थानाची सुधारणा करत २४वे स्थान गाठले. वडोदरा येथे झालेल्या सामन्यात तिने दोन बळी मिळवले होते. झिम्बाब्वेची गोलंदाज नोमवेलो सिबांडा हिनेही दोन स्थानांची प्रगती करत ६०वे स्थान मिळवले. तिने अंतिम सामन्यात पहिल्याच चेंडूवर यास्तिका भाटियाला बाद केले होते.

फलंदाजांच्या क्रमवारीतही भारतीयांची आगेकूच

फलंदाजीच्या क्रमवारीत भारताच्या प्रतिका रावल हिने तीन स्थानांची प्रगती करत १८वे स्थान मिळवले. मालिकेतील तिन्ही सामन्यांत तिने सलग अर्धशतके झळकावली. शेफाली वर्मानेही आठ स्थानांची झेप घेत संयुक्तरीत्या ६५वे स्थान मिळवले. अंतिम सामन्यात तिने आक्रमक फलंदाजी करत ५१ धावांची खेळी केली होती. झिम्बाब्वेच्या फलंदाजांनाही क्रमवारीत फायदा झाला. मालिकेच्या अंतिम सामन्यात ३७ धावा करणारी सलामीवीर मॉडेस्टर मुपाचिक्वा तीन स्थानांनी वर चढत ३६व्या स्थानी पोहोचली. तर संघाची कर्णधार जोसेफिन न्कोमो हिने दोन स्थानांची प्रगती करत ४९वे स्थान मिळवले. झिम्बाब्वेविरुद्धच्या मालिकेत भारतीय महिला संघाने केलेल्या एकतर्फी कामगिरीमुळे अनेक खेळाडूंना आयसीसी क्रमवारीत फायदा झाला आहे. विशेषतः वैष्णवी शर्माच्या प्रभावी गोलंदाजीमुळे तिने क्रमवारीत मोठी झेप घेतली आहे.

India vs New Zealand ODI series- एकदिवसीय मालिका बरोबरीत सुटणार
E-Paper: Punyanagari E-Paper