Janhvi Kapoor Sreeleela new thriller – एकाच तरुणाच्या प्रेमात पडणार दोन अभिनेत्री?

जान्हवी-श्रीलीलाच्या नव्या थ्रिलरची चर्चा, सिद्धार्थही महत्त्वाच्या भूमिकेत, चित्रिकरण सुरू

मुंबई : Janhvi Kapoor Sreeleela new thriller – एक तरुण आणि त्याच्या प्रेमात पडलेल्या दोन महिला, या प्रेमकथेत पुढे काय घडणार? प्रेम, संशय आणि रहस्याने भरलेली अशीच एक कथा लवकरच मोठ्यापडद्यावर पाहायला मिळू शकते. अभिनेत्री जान्हवी कपूर, श्रीलीला आणि अभिनेता सिद्धार्थ गुप्ता एका नव्या थ्रिलर चित्रपटासाठी एकत्र आले आहेत. दिग्दर्शक उमेश बिष्ट यांच्या या चित्रपटाच्या चित्रिकरणाला नैनितालमध्ये सुरुवात झाली आहे.

दोन महिला, एक तरुण आणि प्रेमाचा त्रिकोण

समोर आलेल्या वृत्तांनुसार, या चित्रपटाची कथा एकाच पुरुषाच्या प्रेमात पडलेल्या दोन महिलांभोवती फिरणार आहे. या दोघींच्या नात्यात पुढे काय घडणार, त्यांच्यात संघर्ष होणार का आणि या प्रेमकथेला कोणतं वळण मिळणार, हे अद्याप स्पष्ट झालेलं नाही. जान्हवी कपूर आणि श्रीलीला पहिल्यांदाच या चित्रपटात एकत्र दिसणार असल्याने चाहत्यांमध्ये उत्सुकता आहे. सिद्धार्थ गुप्ता या दोघींसोबत कोणती भूमिका साकारणार, याचीही चर्चा सुरू आहे.

नैनितालमध्ये चित्रिकरणाला सुरुवात

या चित्रपटाच्या पहिल्या चित्रिकरणाच्या शेड्यूलला नैनितालमध्ये सुरुवात झाली आहे. चित्रपटाच्या टीमने काम सुरू केलं असून, सध्या चित्रीकरणावर लक्ष केंद्रीत करण्यात आलं आहे. या चित्रपटाची निर्मिती एकता कपूर आणि गुनीत मोंगा कपूर करत आहेत. मात्र, चित्रपटाचं नाव, इतर कलाकार आणि कथेबद्दलची अधिक माहिती अद्याप जाहीर करण्यात आलेली नाही.

जान्हवी आणि श्रीलीलाचे आगामी प्रोजेक्ट

जान्हवी कपूर अलीकडेच सनी संस्कारी की तुलसी कुमारी या चित्रपटात दिसली होती. तिच्या आगामी प्रोजेक्टमध्ये पेड्डीचाही समावेश आहे.
श्रीलीला धमाका आणि गुंटुंर कारम या चित्रपटांमुळे चर्चेत आली आहे. तसेच, ‘पुष्पा २ : द रूल’ मधील ‘किसिक’ या गाण्यातूनही तिने प्रेक्षकांचं लक्ष वेधलं होतं. सिद्धार्थ गुप्ता ‘कृष्णावतारम पार्ट १ : द हार्ट’ या चित्रपटात भगवान श्रीकृष्णाची भूमिका साकारत आहे.

दिग्दर्शक उमेश बिष्ट यांचा नवा प्रयोग

या चित्रपटाचं दिग्दर्शन उमेश बिष्ट करत आहेत. त्यांनी यापूर्वी ‘पगलैट’, ‘द ट्रायल सीझन २’ आणि ‘ग्यारह ग्यारह’ यांसारख्या प्रोजेक्टवर काम केलं आहे. आता ते प्रेम आणि रहस्य यांची सांगड घालणारी कथा प्रेक्षकांसमोर आणणार आहेत.

चित्रपटाबद्दल उत्सुकता वाढली

जान्हवी कपूर, श्रीलीला आणि सिद्धार्थ गुप्ता यांची ही नवी जोडी प्रेक्षकांना किती आवडते, हे चित्रपट प्रदर्शित झाल्यानंतरच समजेल. मात्र, एकाच तरुणाच्या प्रेमात पडलेल्या दोन महिलांची कथा नेमकं कोणतं वळण घेणार, हा प्रश्न चाहत्यांची उत्सुकता वाढवत आहे. चित्रपटाचं नाव आणि इतर तपशील जाहीर झाल्यानंतर या कथेबद्दल अधिक माहिती समोर येईल.

Read About: The Royals Season 2 : ‘द रॉयल्स २’ मध्ये नवा लव्ह ट्रँगल ( Love Triangle)https://epunyanagari.com/the-royals-season-2-love-triangle/

E-Paper: Punyanagari E-Paper