Nashik Viral Video : नाशिकरोड कारागृहाच्या सुरक्षेवर पुन्हा प्रश्नचिन्ह; MD ड्रग्ज प्रकरणातील कैद्याचा व्हिडिओ व्हायरल

सनी पगारेचा आणखी एक कथित व्हिडिओ सोशल मीडियावर व्हायरल; कारागृहात मोबाईल पोहोचल्याचा संशय, प्रशासनाकडून चौकशी सुरू

नाशिक : Nashik Viral Video अत्यंत कडक सुरक्षा असलेल्या नाशिकरोड मध्यवर्ती कारागृहातून एमडी ड्रग्ज तस्करी प्रकरणातील मुख्य संशयित कैदी सनी पगारे याचा आणखी एक कथित व्हिडिओ सोशल मीडियावर तुफान व्हायरल झाला आहे. गेल्या काही दिवसांतील पगारेचा हा दुसरा व्हिडिओ असल्याचे बोलले जात आहे.

सुरक्षा यंत्रणा भेदून मोबाईल आत कसा पोहोचला?

नाशिकरोड मध्यवर्ती कारागृहामध्ये कैद्यांवर लक्ष ठेवण्यासाठी सीसीटीव्ही कॅमेरे, सुरक्षा रक्षक आणि कडक तपासणी असतानाही, एका आंतरराष्ट्रीय ड्रग्ज रॅकेटशी संबंधित कैद्यापर्यंत अँड्रॉइड मोबाईल फोन कसा पोहोचला, असा गंभीर प्रश्न उपस्थित केला जात आहे. व्हायरल झालेल्या कथित व्हिडिओमध्ये सनी पगारे हा कारागृहाच्या आवारात अत्यंत उजळ माथ्याने फिरताना आणि इतरांशी संवाद साधताना दिसत असल्याचा दावा केला जात आहे. एका पाठोपाठ एक असे दोन व्हिडिओ बाहेर आल्यामुळे कारागृहातील काही कर्मचाऱ्यांचेच कैद्यांना छुपं सहकार्य लाभत आहे का, असा संशय बळावला आहे.

प्रशासनाकडून चौकशी सुरू

दरम्यान, या व्हिडिओची सत्यता, तो नेमका कधी आणि कारागृहातील कोणत्या बॅरेकजवळ शूट करण्यात आला, याची स्वतंत्र पुष्टी अद्याप झालेली नाही. यापूर्वीच्या पहिल्या व्हिडिओची दखल घेऊन वरिष्ठ कारागृह प्रशासनाने अंतर्गत चौकशीचे आदेश दिले होते, मात्र तो तपास सुरू असतानाच हा दुसरा व्हिडिओ समोर आला आहे. ड्रग्ज तस्करीसारख्या गंभीर गुन्ह्यातील आरोपी कारागृहातूनच आपले नेटवर्क चालवत आहेत की काय, अशी भीती व्यक्त केली जात आहे.

या गंभीर सुरक्षेच्या त्रुटीबाबत गृह विभाग आणि कारागृह उपमहानिरीक्षक स्तरावर वरिष्ठ अधिकाऱ्यांची बैठक बोलावण्यात आली असून, दोषी कर्मचाऱ्यांवर निलंबनाची कारवाई होण्याची शक्यता वर्तवली जात आहे. कारागृह प्रशासनाचा अधिकृत तपास अहवाल समोर आल्यानंतरच या प्रकरणाचा सविस्तर खुलासा होऊ शकेल.

Read About : Marine Drive Police Attack 2026 – ऑन-ड्युटी पोलिस कर्मचाऱ्याशी वाद; हल्ल्याचा व्हिडिओ व्हायरल
E-Paper: Punyanagari E-Paper