Navi Mumbai Spa Raid : स्पाच्या आड अनैतिक वेश्याव्यवसाय; 5 महिलांची सुटका, मॅनेजर अटकेत

सीबीडी परिसरातील स्पावर गुन्हे शाखेचा छापा; बनावट ग्राहकाच्या माध्यमातून माहितीची पडताळणी केल्यानंतर कारवाई

नवी मुंबई : Navi Mumbai Spa Raid : स्पाच्या आड वेश्याव्यवसाय सुरू असल्याच्या संशयावरून नवी मुंबई गुन्हे शाखेच्या अनैतिक मानवी वाहतूक प्रतिबंधक कक्षाने सीबीडी परिसरातील एका स्पावर छापा टाकला. या कारवाईत पाच महिलांची सुटका करण्यात आली असून, स्पाच्या मॅनेजर महिलेला पोलिसांनी अटक केली आहे. याप्रकरणी अन्य तीन जणांविरोधातही गुन्हा दाखल करण्यात आला आहे. पोलिसांनी दिलेल्या माहितीनुसार, २४ सप्टेंबर रोजी ‘अथेन्स स्पा’वर ही कारवाई करण्यात आली. स्पामध्ये बेकायदेशीर प्रकार सुरू असल्याची माहिती गुन्हे शाखेला मिळाली होती. त्यानंतर माहितीची खातरजमा करण्यासाठी पोलिसांनी बनावट ग्राहकाच्या माध्यमातून प्राथमिक पडताळणी केली. मिळालेल्या माहितीनंतर पोलिसांनी स्पावर छापा टाकला.

पाच महिलांची सुटका

कारवाईदरम्यान स्पामध्ये पाच महिला आढळून आल्या. पोलिसांच्या माहितीनुसार, या महिलांना वेश्याव्यवसायासाठी प्रवृत्त केल्याचा आरोप आहे. पोलिसांनी पाचही महिलांची सुटका करून त्यांना पुढील कायदेशीर प्रक्रियेसाठी ताब्यात घेतले. या प्रकरणात स्पा मॅनेजर संदिपा सुखलाल राडी (२४) हिला अटक करण्यात आली आहे. तर महेश मोहनन नायर (३६), सुहास नंदकुमार जाधव (३७) आणि वैभव रामचंद्र भास्कर (४२) यांच्याविरोधात गुन्हा दाखल करण्यात आला आहे.

PITA Act अंतर्गत गुन्हा दाखल

याप्रकरणी सीबीडी पोलीस ठाण्यात गुन्हा क्रमांक ३४०/२०२६ दाखल करण्यात आला आहे. भारतीय न्याय संहिता तसेच PITA Act मधील संबंधित कलमांनुसार कारवाई करण्यात आली आहे. प्रकरणाचा पुढील तपास सीबीडी पोलीस ठाण्याचे अधिकारी करीत आहेत. ही कारवाई सहायक पोलीस आयुक्त शैलेशकुमार अंचलवार यांच्या मार्गदर्शनाखाली वरिष्ठ पोलीस निरीक्षक गजानन कदम आणि त्यांच्या पथकाने केली.

गुन्हे शाखेची कारवाई

सीबीडीतील स्पावर छापा; पाच महिलांची सुटका

• ‘अथेन्स स्पा’वर गुन्हे शाखेची कारवाई
• अनैतिक मानवी वाहतूक प्रतिबंधक कक्षाचा सहभाग
• बनावट ग्राहकाच्या माध्यमातून प्राथमिक पडताळणी
• पाच महिलांची सुटका
• स्पा मॅनेजर महिलेला अटक
• अन्य तीन जणांविरोधात गुन्हा दाखल
• भारतीय न्याय संहिता आणि PITA Act अंतर्गत कारवाई

कायदेशीर नोंद : पोलिसांनी केलेले आरोप आणि तपासातील निष्कर्ष न्यायालयीन प्रक्रियेत सिद्ध होणे बाकी आहे. संबंधित व्यक्तींना दोषी ठरवण्याचा अंतिम अधिकार न्यायालयाचा आहे.

Read About : Virar Churchgate Local 2026 : चालत्या लोकलमध्ये मद्यपान; काचेची बाटली बाहेर फेकल्याचा प्रकार
E-Paper: Punyanagari E-Paper