आर्किमिडीजच्या स्क्रू तत्त्वावर आधारित सूक्ष्म मोटर थेट विजेवर चालणार
लंडन (ब्रिटन) : Molecular Motor शास्त्रज्ञांच्या एका आंतरराष्ट्रीय गटाने जगातील सर्वात लहान मॉलिक्युलर मोटर (रेणूच्या आकाराची मोटर) विकसित करण्यात यश मिळवले आहे. ही मोटर केवळ एका रेणूच्या आकाराची असून ती थेट विजेवर चालते. या सूक्ष्म मोटरच्या शोधामुळे भविष्यातील इलेक्ट्रॉनिक उपकरणांची कार्यक्षमता आणि वेग अभूतपूर्व पद्धतीने वाढवण्यासाठी मदत मिळू शकते.
आर्किमिडीजच्या तत्त्वावर आधारित रचना
या सर्वात लहान मोटरची रचना प्राचीन ग्रीक शास्त्रज्ञ आर्किमिडीज यांच्या प्रसिद्ध स्क्रू तत्त्वावर आधारित आहे. प्राचीन काळात ज्याप्रमाणे पाण्याचा प्रवाह वर चढवण्यासाठी स्क्रू यंत्रणेचा वापर केला जात असे, त्याच संकल्पनेचा वापर करून शास्त्रज्ञांनी रेणूच्या पातळीवर इलेक्ट्रॉनचा प्रवाह नियंत्रित केला आहे. ही मोटर पूर्णपणे नियंत्रित असून ती गरजेनुसार घड्याळाच्या दिशेने आणि उलट दिशेने अशा दोन्ही बाजूंनी फिरू शकते.
वाहकतामध्ये होऊ शकते १०० पटीने वाढ
या छोट्या मोटरचा सर्वात मोठा फायदा इलेक्ट्रॉनिक्स क्षेत्रात होणार आहे. शास्त्रज्ञांनी दावा केला आहे की, या मॉलिक्युलर मोटरच्या साहाय्याने इलेक्ट्रॉनिक उपकरणांची वाहकता तब्बल १०० पटीने वाढवता येऊ शकते. यामुळे डेटा ट्रान्सफरचा वेग प्रचंड वाढेल आणि उपकरणांचा आकार लहान करूनही त्यांची कार्यक्षमता कैक पटीने वाढवता येईल. तसेच, विजेचा वापर कमी होऊन ऊर्जा बचतीसाठी हे महत्त्वाचे राहिल.
भविष्यातील तंत्रज्ञानाचे प्रवेशद्वार
या तंत्रज्ञानाचा वापर भविष्यात नॅनो-रोबॉट्स बनवण्यासाठी, मानवी शरीरात अचूक जागी औषध पोहोचवण्यासाठी, आणि सध्याच्या सिलिकॉन चिप्सपेक्षा अधिक वेगवान नॅनो-कॉम्प्युटर्स तयार करण्यासाठी केला जाऊ शकतो. विज्ञानाच्या इतिहासात ही मॉलिक्युलर मोटर सूक्ष्म उपकरणांच्या निर्मितीसाठी एक नवीन बदल घडवून आणणार, असा विश्वास शास्त्रज्ञांनी व्यक्त केला आहे.
Read About : Mercury to Gold Conversion – प्राचीन भारतीय रसायनविद्येच्या मदतीने पाऱ्याचे सोन्यात रूपांतर?, MNIT करणार पडताळणी
E-Paper : Punyanagari E-Paper
Comments
Comments will appear here.
Comments are submitted for administrator moderation before appearing publicly.