Yeh Prem Mol Liya overseas distribution – बडजात्यांच्या ‘ये प्रेम मोल लिया’ला यशराजकडे

आयुष्मान खुराना-शर्वरीचा चित्रपट २७ नोव्हेंबरला होणार प्रदर्शित

मुंबई: Yeh Prem Mol Liya overseas distribution – सूरज बडजात्या…नाव ऐकताच डोळ्यांसमोर येतात प्रेम, कुटुंब, नाती आणि भावनांनी भरलेल्या कथा, आता त्यांच्या आगामी ‘ये प्रेम मोल लिया’ या चित्रपटाची उत्सुकता आणखी वाढली आहे. कारण या चित्रपटाच्या परदेशातील प्रदर्शनाची जबाबदारी आता यशराज फिल्म्सने स्वीकारली आहे. यशराज फिल्म्सने चित्रपटाचे परदेशातील वितरण हक्क मिळवले असून, त्यामुळे आंतरराष्ट्रीय बाजारपेठेत चित्रपटाला मोठ्या प्रमाणावर प्रदर्शित करण्याचा मार्ग मोकळा झाला आहे.

रॉयल ऑपेरा हाऊसमधून सुरू झाली चर्चा

२० सप्टेंबर रोजी मुंबईतील प्रसिद्ध रॉयल ऑपेरा हाऊस येथे ‘ये प्रेम मोल लिया’च्या शीर्षक गीताचे दिमाखदार प्रकाशन झाले. या कार्यक्रमामुळे चित्रपटाची चर्चा चांगलीच रंगली होती. आता परदेशातील वितरण हक्क यशराज फिल्म्सकडे गेल्याने चित्रपटाच्या प्रदर्शनाबाबत आणखी एक महत्त्वाची घडामोड समोर आली आहे.

परदेशातील प्रदर्शनासाठी यशराजचे मजबूत जाळे

यशराज फिल्म्सचे आंतरराष्ट्रीय बाजारपेठांमध्ये मजबूत वितरण जाळे आहे. त्यामुळे ‘ये प्रेम मोल लिया’ला प्रमुख परदेशी बाजारपेठांमध्ये चांगली चित्रपटगृहे मिळण्याची शक्यता आहे. चित्रपटाच्या निर्मितीशी संबंधित सूत्रांच्या माहितीनुसार, यशराजच्या सहभागामुळे परदेशातील प्रदर्शन अधिक व्यापक होण्याची अपेक्षा आहे.

राजश्री आणि यशराजची पुन्हा एकदा साथ

‘ये प्रेम मोल लिया’च्या निमित्तान राजश्री प्रॉडक्शन्स आणि यशराज फिल्म्स यांची चौथ्यांदा साथ होत आहे. या दोन्ही संस्थांचे नाते २००३ मधील ‘मैं प्रेम की दीवानी हंू’ या चित्रपटापासून सुरू झाले. या चित्रपटाचे परदेशातील वितरण यशराज फिल्म्सने केले होते.
यानंतर सूरज बडजात्या यांच्या ‘उंचाई’ या २०२२ मधील चित्रपटाचे भारतासह जगभरातील वितरणही यशराज फिल्म्सने केले. २०२३ मध्ये सूरज बडजात्यांचा मुलगा अवनीश एस. बडजात्या यांच्या दिग्दर्शनातील ‘दोनो’ या चित्रपटाचे भारतातील वितरणही यशराज फिल्म्सने केले होते.

भारतातील वितरण कोण करणार?

परदेशातील वितरणाची जबाबदारी निश्चित झाली असली, तरी भारतामध्ये ‘ये प्रेम मोल लिया’ कोणत्या कंपनीमार्फत प्रदर्शित होणार, याची अधिकृत माहिती अद्याप समोर आलेली नाही. राजश्रीची लोकप्रियता, सूरज बडजात्यांची कौटुंबिक चित्रपटांची ओळख आणि चित्रपटातील प्रमुख कलाकार यामुळे भारतातील वितरण हक्कांबाबतही चित्रपट क्षेत्रात उत्सुकता निर्माण झाली आहे.

आयुष्मान-शर्वरीमुळे यशराज कनेक्शन आणखी खास

या चित्रपटाचा यशराज फिल्म्सशी आणखी एक खास संबंध आहे. चित्रपटातील प्रमुख कलाकार आयुष्मान खुराना आणि शर्वरी हे यशराजच्या कलाकार व्यवस्थापनाशी जोडलेले आहेत. त्यामुळे चित्रपटाच्या पडद्यामागे आणि पडद्यावरही यशराजशी असलेले नाते लक्षवेधी ठरले आहे.

२७ नोव्हेंबरला प्रेमकहाणी मोठ्या पडद्यावर

परदेशातील वितरणाची जबाबदारी निश्चित झाल्यानंतर आता प्रेक्षकांचे लक्ष भारतातील वितरण आणि चित्रपटाच्या पुढील प्रचाराकडे लागले आहे. प्रेम, कुटुंब आणि नात्यांची कथा घेऊन येणारा ‘ये प्रेम मोल लिया’ २७ नोव्हेंबर २०२६ रोजी चित्रपटगृहात प्रदर्शित होणार आहे.
परदेशात यशराजचा हात मिळाल्यानंतर आता सूरज बडजात्यांचे हे ‘प्रेम’ जगभरातील प्रेक्षकांच्या मनात किती जागा निर्माण करते, याची उत्सुकता वाढली आहे.

Read About : Rakul Greece Vacation 2026 : रकुल प्रीतचा ग्रीसमध्ये जलवा
E-Paper: Punyanagari E-Paper