India investment opportunities in AI and semiconductors – भारतात गुंतवणुकीची नवी लाट येणार?

एआय, सेमीकंडक्टर आणि संरक्षण क्षेत्रात १६ लाख कोटींची संधी

नवी दिल्ली : India investment opportunities in AI and semiconductors – भारताच्या औद्योगिक विकासाला येत्या काही वर्षांत मोठी गती मिळण्याची शक्यता आहे. कृत्रिम बुद्धिमत्ता (एआय), सेमीकंडक्टर, संरक्षण उत्पादन, ग्रीन हायड्रोजन आणि बॅटरी स्टोरेज यांसारख्या आधुनिक क्षेत्रांत लाखो कोटी रुपयांची गुंतवणूक अपेक्षित आहे. त्यामुळे देशातील बँकांसमोरही कर्जपुरवठ्याच्या नव्या संधी निर्माण होणार आहेत. युनियन बँक ऑफ इंडियाच्या संशोधन अहवालातून हे महत्त्वपूर्ण संकेत मिळाले आहेत.

तीन क्षेत्रांत १६ लाख कोटींची गुंतवणूक

अहवालानुसार, पुढील तीन ते पाच वर्षांत एआय, सेमीकंडक्टर आणि संरक्षण क्षेत्र गुंतवणुकीत आघाडीवर राहतील. यामध्ये एआय क्षेत्रात ५.९ लाख कोटी, सेमीकंडक्टरमध्ये ५.२७ लाख कोटी, तर संरक्षण क्षेत्रात ५.०७ लाख कोटी रुपयांची सार्वजनिक व खासगी गुंतवणूक अपेक्षित आहे. बॅटरी रिसायकलिंग, सेमीकंडक्टर पॅकेजिंग, ग्रीन हायड्रोजन आणि संरक्षण साहित्याचे सुटे भाग तयार करणाऱ्या कंपन्यांनाही मोठ्या प्रमाणावर भांडवलाची गरज भासणार आहे.

इलेक्ट्रिक वाहनांच्या बाजारपेठेला वेग

इलेक्ट्रिक वाहन आणि बॅटरी स्टोरेजची बाजारपेठ २०३० पर्यंत ३४ अब्ज डॉलरवरून तब्बल ११३ अब्ज डॉलरपर्यंत पोहोचण्याचा अंदाज आहे. त्यामुळे ऊर्जा साठवणूक, बॅटरी उत्पादन आणि संबंधित उद्योगांमध्ये गुंतवणुकीच्या नव्या संधी निर्माण होतील.

संधी मोठी पण धोकाही तितकाच

या क्षेत्रांना कर्ज देताना बँकांसमोर काही आव्हानेही असतील. सेमीकंडक्टर प्रकल्पांतील गुंतवणुकीचा परतावा मिळण्यासाठी पाच ते आठ वर्षे, तर अवकाश क्षेत्रात सात ते दहा वर्षे लागू शकतात. शिवाय, क्षेत्रातील तंत्रज्ञान वेगाने बदलत असल्याने जीपीयू क्लस्टर्स दर १८ ते २४ महिन्यांत अद्ययावत करावे लागू शकतात. अभ्यासातील १२ पैकी दहा उदयोन्मुख क्षेत्रांत कर्जपुरवठ्याचे स्पष्ट मार्ग उपलब्ध आहेत. मात्र, एआय आणि अवकाश क्षेत्राला अद्याप भागभांडवली गुंतवणुकीवर अधिक अवलंबून राहावे लागत आहे.

या पार्श्वभूमीवर बँकांनी प्रकल्पाच्या टप्प्यांनुसार कर्ज वितरण, उपकरणांसाठी वित्तपुरवठा आणि हरित कर्जासारख्या विशेष योजना विकसित कराव्यात, अशी शिफारस अहवालात करण्यात आली आहे. उद्याच्या भारताची आर्थिक ताकद केवळ पारंपरिक उद्योगांत नव्हे, तर अत्याधुनिक तंत्रज्ञानातही दडलेली आहे. आता या लाखो कोटींच्या संधींचे प्रत्यक्ष विकासात रूपांतर करण्यासाठी उद्योगांची कल्पकता आणि बँकांचा विश्वास किती उपयोगी ठरतो, हे पाहणे महत्त्वाचे ठरणार आहे.

Read About: Gauthala Wildlife Sanctuary wildlife study गौताळा अभयारण्यातील तृणभक्षी वन्यप्राण्यांच्या अधिवासाचा अभ्यास; आंतरराष्ट्रीय स्तरावर मान्यता

E-Paper: Punyanagari E-Paper