Asian Games 2026 – सुजीत कलकलचे ऐतिहासिक सुवर्ण; 2-9 वरून 10-9 असा विजय

६५ किलो फ्रीस्टाइलच्या अंतिम फेरीत ताजिकिस्तानच्या कुडियेववर मात; २०१८ नंतर भारताला कुस्तीत पहिले सुवर्ण

ऐची-नागोया : Asian Games 2026 : भारतीय कुस्तीपटू सुजीत कलकलने आशियाई क्रीडा स्पर्धा २०२६ मध्ये पुरुषांच्या ६५ किलो फ्रीस्टाइल गटात थरारक कमबॅक करत सुवर्णपदक पटकावले. अंतिम लढतीत ताजिकिस्तानच्या अब्दुलमजीद कुडियेवविरुद्ध सुजीत एका टप्प्यावर २-९ असा पिछाडीवर होता. मात्र, अखेरच्या क्षणी सलग गुण मिळवत त्याने १०-९ असा विजय मिळवला.

सुजीतचे हे सुवर्ण भारतासाठी विशेष महत्त्वाचे ठरले आहे. २०१८ च्या जकार्ता-पालेमबांग आशियाई क्रीडा स्पर्धेनंतर भारताला कुस्तीमध्ये प्रथमच सुवर्णपदक मिळाले आहे. ६५ किलो वजनी गटातही भारताचे हे सुवर्णपदक दीर्घ प्रतीक्षेनंतर आले आहे.

२-९ वरून थेट १०-९ विजय

अंतिम सामन्याच्या सुरुवातीला कुडियेवने आक्रमक सुरुवात केली. त्याने सुजीतला मॅटच्या बाहेर पाठवत दोन गुण मिळवले आणि त्यानंतर आणखी दोन गुण घेत ४-० अशी आघाडी घेतली. सुजीतने प्रत्युत्तर देत दोन गुण मिळवले.

यानंतर कुडियेवने पुन्हा गुण मिळवत आघाडी वाढवली. सुजीतच्या एका आक्रमक प्रयत्नादरम्यान त्याचा तोल गेल्याने प्रतिस्पर्ध्याला आणखी गुण मिळाले आणि ताजिकिस्तानच्या कुस्तीपटूने ९-२ अशी आघाडी घेतली.

मात्र, सामना संपण्यासाठी दीड मिनिटापेक्षाही कमी वेळ असताना सुजीतने सामन्याची दिशा बदलली. त्याने सलग टेकडाउन करत पिछाडी कमी केली. ९-६ अशी स्थिती झाल्यानंतरही त्याने आक्रमण कायम ठेवले आणि आणखी दोन गुणांची भर घालत सामना ९-९ असा बरोबरीत आणला. अखेर अवघे ११ सेकंद बाकी असताना मिळालेल्या निर्णायक गुणांसह सुजीतने १०-९ असा विजय मिळवला.

ऑलिम्पिक विजेत्यावरही मिळवला होता विजय

सुवर्णपदकाच्या सामन्यापूर्वी सुजीतने उपांत्य फेरीत जपानच्या विद्यमान ऑलिम्पिक विजेत्या कोटारो कियोओकाचा सामना केला होता. ही लढत ३-३ अशी बरोबरीत संपली; मात्र निकषांच्या आधारे सुजीतला विजेता घोषित करण्यात आले. कियोओकाने पहिल्या कालखंडात २-० अशी आघाडी घेतली होती, पण सुजीतने दुसऱ्या कालखंडात पुनरागमन करत तीन गुण मिळवले.

या सामन्यात निर्णायक ठरलेल्या मोठ्या गुणांच्या डावामुळे बरोबरी असूनही सुजीतच्या बाजूने निकाल लागला. त्यानंतर अंतिम फेरीत त्याने कुडियेववरही मात करत सुवर्णपदक निश्चित केले.

उपउपांत्यपूर्व फेरीपासून दमदार वाटचाल

सुजीतने स्पर्धेची सुरुवात अफगाणिस्तानच्या सय्यद उमर झाझईविरुद्ध केली. या सामन्यात त्याने १३-३ अशी तांत्रिक श्रेष्ठता मिळवत विजय नोंदवला. त्यानंतर इराणच्या अब्बास इब्राहिमझादेहसवादकुहीवर मात करत त्याने उपांत्य फेरी गाठली.

यानंतर ऑलिम्पिक विजेत्या कियोओकाला हरवून अंतिम फेरी गाठली आणि अखेर कुडियेववर १०-९ अशी मात करत सुजीतने भारताला कुस्तीतील ऐतिहासिक सुवर्ण मिळवून दिले.

Read About : Asian Games 2026 – प्रवीण हुड्डाला बॉक्सिंगमध्ये सुवर्ण; भारताची पदकसंख्या 73 वर
E-Paper: Punyanagari E-Paper