Knee Pain Treatment : शस्त्रक्रियेशिवाय गुडघेदुखीवर उपचार; १९४ रुग्णांवरील चाचणीत सकारात्मक निष्कर्ष

गुडघ्याच्या संधिवातावरील Genicular Artery Embolization या विना-शस्त्रक्रिया उपचार पद्धतीमुळे वेदना आणि सूज कमी करण्यास मदत होऊ शकते

न्यूयॉर्क : Knee Pain Treatment गुडघ्याच्या तीव्र संधिवाताने ग्रस्त असलेल्या आणि शस्त्रक्रिया नको वाटणाऱ्या रुग्णांसाठी शास्त्रज्ञांनी गुडघेदुखीवर मात करण्यासाठी एक नवीन आणि प्रभावी विना-शस्त्रक्रिया उपचार पद्धती शोधून काढली आहे. या नव्या तंत्रज्ञानामध्ये सांध्यांमध्ये सूज आणि वेदना निर्माण करणाऱ्या विशिष्ट रक्तवाहिन्यांना विरघळणाऱ्या सूक्ष्म कणांच्या साहाय्याने ब्लॉक केले जाते. सध्या एका महत्त्वपूर्ण क्लिनिकल ट्रायलमध्ये या उपचार पद्धतीचे आश्चर्यकारक आणि सकारात्मक परिणाम समोर आले आहेत. हे प्रयोग युरोप आणि अमेरिकेतील अनेक प्रमुख वैद्यकीय संशोधन केंद्रांमध्ये संयुक्तपणे करण्यात आले आहे.

१९४ रुग्णांवर यशस्वी चाचणी; ८० टक्के लोकांना मिळाला आराम

या नवीन उपचार पद्धतीची १९४ रुग्णांवर प्रायोगिक तत्त्वावर चाचणी घेण्यात आली. या प्रयोगाचे निष्कर्ष अत्यंत उत्साहवर्धक असून, तब्बल ८० टक्के रुग्णांना कोणत्याही प्रकारच्या शस्त्रक्रियेविना गुडघेदुखी आणि आजाराच्या त्रासापासून महत्त्वपूर्ण आराम मिळाला आहे. विशेष म्हणजे, या रुग्णांना मिळालेला आराम पुढील १२ महिन्यांपेक्षा जास्त काळ टिकून राहिल्याचे अभ्यासात दिसून आले आहे. ज्या रुग्णांना नेहमीची औषधे, इंजेक्शन्स किंवा फिजिओथेरपी करूनही गुण आलेला नाही, अशा लाखो लोकांसाठी ही नवीन एम्बोलॉयझेशन थेरपी भविष्यात एक अत्यंत प्रभावी आणि वरदान ठरवणारा पर्याय असू शकते.

काय आहे ही उपचार पद्धती आणि ती कशी काम करते?

संधिवातामुळे गुडघ्याच्या सांध्याभोवती असामान्य रक्तवाहिन्यांची वाढ होते, ज्यामुळे तिथे तीव्र सूज आणि वेदना वाढतात. या पद्धतीत एका अतिशय बारीक नळीद्वारे गुडघ्यापर्यंत पोहोचून जिलेटिनपासून बनवलेले सूक्ष्म मणी सोडले जातात. हे मणी सूज आणणाऱ्या अतिरिक्त रक्तवाहिन्यांचा रक्तपुरवठा तात्पुरता खंडित करतात. आपले काम पूर्ण झाल्यानंतर हे सूक्ष्म कण शरीरात काही तासांतच आपोआप विरघळून नष्ट होतात, ज्यामुळे मूळ सांध्याला किंवा इतर भागाला कोणतीही हानी पोहोचत नाही.

या नवीन उपचाराचे असे आहेत फायदे

रुग्णांना गुडघा बदलण्याच्या मोठ्या आणि खर्चिक शस्त्रक्रियेचा त्रास सहन करावा लागत नाही. या प्रक्रियेमध्ये रुग्णाला कोणतीही मोठी जखम होत नाही. वेदना आणि सूज दोन्ही एकाच वेळी कमी होऊन रुग्णाची हालचाल सुधारते. ही पद्धती पूर्णपणे सुरक्षित मानली गेली असून, याचे कोणतेही गंभीर दुष्परिणाम आढळलेले नाहीत.

Read About: 137 cancer drugs price reduction कर्करोगाची १३७ औषधे ७० टक्केस्वस्त होणार

E-Paper: Punyanagari E-Paper