Lalit Prabhakar as Ajmal Kasab 26/11 – ‘प्रहार’च्या ट्रेलरने वाढवली उत्सुकता

पडद्यावर कसाबच्या भूमिकेत दिसला मराठी अभिनेता

मुंबई : Lalit Prabhakar as Ajmal Kasab – चेहरा तोच, पण रूप पूर्णपणे वेगळे, प्रहार : द उज्ज्वल निकम स्टोरीच्या ट्रेलरमधील एका दृश्याने सध्या प्रेक्षकांचे लक्ष वेधून घेतले आहे. ट्रेलरच्या शेवटी दिसणारा अभिनेता दुसरा-तिसरा कोणी नसून मराठी चित्रपटसृष्टीतील लोकप्रिय अभिनेता ललित प्रभाकर आहे. ललित या चित्रपटात २६/११ मुंबई दहशतवादी हल्ल्यात पकडला गेलेला दहशतवादी अजमल कसाब याची भूमिका साकारत आहे.
चित्रपटाचा ट्रेलर २९ सप्टेंबर रोजी मुंबईतील छत्रपती शिवाजी महाराज टर्मिनस येथे प्रदर्शित करण्यात आला. २६/११ च्या हल्ल्यातील महत्त्वाच्या ठिकाणांपैकी एक असलेल्या या स्थानकावर ट्रेलर लाँच झाल्याने या कार्यक्रमाकडे विशेष लक्ष लागले होते.

कसाबच्या भूमिकेसाठी ललितचा विशेष अभ्यास

ललित प्रभाकरची या भूमिकेसाठी ऑडिशननंतर निवड करण्यात आली. कसाबची भूमिका साकारताना त्याने केवळ मेकअप आणि लूकवर भर दिला नाही. त्याने व्यक्तिरेखेची भाषा, देहबोली आणि वागण्याची पद्धत समजून घेण्याचा प्रयत्न केला. ललितसाठी ही भूमिका त्याच्या आतापर्यंतच्या कारकिर्दीपेक्षा वेगळी आहे. त्यामुळे ट्रेलर प्रदर्शित झाल्यानंतर त्याच्या या रूपाची सोशल मीडियावरही चर्चा सुरू झाली आहे.

‘जुळून येती रेशीमगाठी’मुळे मिळाली ओळख

ललित प्रभाकरने आपल्या अभिनयाची सुरुवात रंगभूमीपासून केली. त्यानंतर ‘जुळून येती रेशीमगाठी’ या झी मराठी मालिकेने त्याला घराघरांत लोकप्रिय केले. या मालिकेतील अभिनयासाठी त्याला सर्वोत्कृष्ट अभिनेत्याचा पुरस्कार मिळाला. २०१७ मध्ये परेश मोकाशी यांच्या ‘चि. व चि. सौ. का.’ या चित्रपटातून त्याने मराठी चित्रपटसृष्टीत पदार्पण केले. या भूमिकेसाठी त्याला महाराष्ट्र राज्य चित्रपट पुरस्कार मिळाला.

‘आनंदी गोपाळ’ने मिळवून दिली वेगळी ओळख

२०१९ मधील आनंदी गोपाळ हा ललितच्या कारकिर्दीतील महत्त्वाचा चित्रपट ठरला. या चित्रपटात त्याने गोपाळराव जोशी यांची भूमिका साकारली. या भूमिकेचे मोठ्या प्रमाणावर कौतुक झाले.

त्याला फिल्मफेअर मराठीचा समीक्षकांचा सर्वोत्कृष्ट अभिनेता पुरस्कार, पुणे आंतरराष्ट्रीय चित्रपट महोत्सवातील सर्वोत्कृष्ट अभिनेता पुरस्कार आणि झी चित्र गौरव पुरस्कार मिळाला.

२०२६ मध्ये तो ती आणि फुजी या भारत-जपान प्रेमकथेतील अभिनयासाठी त्याला पुणे आंतरराष्ट्रीय चित्रपट महोत्सवात ज्युरी विशेष उल्लेख मिळाला.

वेगवेगळ्या भूमिकांमधून स्वत:ला सिद्ध केले

ललित प्रभाकरने आजवर एका प्रकारच्या भूमिकेत अडकून न राहता विविध व्यक्तिरेखा साकारल्या आहेत. हंपीमध्ये रोमँटिक भूमिका, झोंबिवलीमध्ये दुहेरी भूमिका, तर मीडियम स्पायसी आणि सनीमध्ये वेगळ्या प्रकारच्या व्यक्तिरेखा त्याने साकारल्या. ओटीटीवरही त्याने आपली छाप पाडली आहे. ‘शांतीत क्रांती’, ‘पेट पुराण’ आणि ‘द रायकर केस’ या वेबसीरिजमध्ये त्याने काम केले आहे.

कसाबनंतर नामदेव ढसाळ यांच्या भूमिकेत

ललितच्या आगामी प्रोजेक्ट्समध्ये आणखी एका महत्त्वाच्या व्यक्तिरेखेचा समावेश आहे. दलित पँथरचे सहसंस्थापक आणि प्रसिद्ध कवी नामदेव ढसाळ यांच्या जीवनावर आधारित ढसाळ या चित्रपटात ललित मुख्य भूमिका साकारत आहे.
या चित्रपटाचा पहिला लूक समोर आल्यानंतर त्याचीही चर्चा झाली होती. हा चित्रपट मराठी आणि हिंदी अशा दोन्ही भाषांमध्ये प्रदर्शित होणार आहे.

१६ ऑक्टोबरला चित्रपटगृहात ‘प्रहार’

प्रहार : द उज्ज्वल निकम स्टोरीचे दिग्दर्शन अविनाश अरुण यांनी केले आहे. दिनेश विजान यांच्या मॅडॉक फिल्म्सने या चित्रपटाची निर्मिती केली आहे. राजकुमार राव, वामिका गब्बी, जयदीप अहलावत, सिकंदर खेर, आशिष विद्यार्थी आणि ललित प्रभाकर यांच्या या चित्रपटात प्रमुख भूमिका आहेत.

एका अभिनेत्याची नवी ओळख?

गोपाळराव जोशींपासून नामदेव ढसाळांपर्यंत आणि आता अजमल कसाबपर्यंत ललित प्रभाकरने विविध व्यक्तिरेखांना पडद्यावर साकारण्याचे आव्हान स्वीकारले आहे. प्रहारच्या ट्रेलरमध्ये त्याचा बदललेला लूक पाहून प्रेक्षकांची उत्सुकता नक्कीच वाढली आहे. आता या भूमिकेत ललित आपल्या अभिनयातून काय वेगळे दाखवतो, हे १६ ऑक्टोबरनंतरच स्पष्ट होणार आहे.

Read About : Koffee With Karan Final Season – करण जोहरचा शो अखेर निरोप घेणार; 14 ऑक्टोबरपासून शेवटचा सीझन
E-Paper: Punyanagari E-Paper