Omar Abdullah Marriage : जम्मू-काश्मीरचे मुख्यमंत्री उमर अब्दुल्ला यांनी निधी राजदान यांच्याशी केला विवाह; सोशल मीडियावर फोटो शेअर करत दिली माहिती

उमर अब्दुल्ला आणि निधी राजदान यांचा दिल्लीत विशेष विवाह कायद्यांतर्गत खासगी विवाह सोहळा

नवी दिल्ली – Omar Abdullah Marriage जम्मू-काश्मीरचे मुख्यमंत्री उमर अब्दुल्ला यांनी प्रसिद्ध पत्रकार निधी राजदान यांच्याशी विवाह केला आहे. शनिवारी त्यांनी सोशल मीडियाच्या माध्यमातून आपल्या या विवाहाची माहिती जाहीर केली. उमर अब्दुल्ला यांनी इन्स्टाग्राम आणि एक्स (पूर्वीचे ट्विटर) वर निधी राजदान यांच्यासोबतचे फोटो पोस्ट करत लिहिले, कालपासून एका नव्या प्रवासाची सुरुवात झाली. या पोस्टमध्ये त्यांनी निधी राजदान यांनाही टॅग केले आहे. ५६ वर्षीय उमर अब्दुल्ला आणि ४९ वर्षीय निधी राजदान या दोघांचाही हा दुसरा विवाह असून दिल्लीत विशेष विवाह कायद्यांतर्गत हा सोहळा अत्यंत खाजगी स्वरूपात पार पडला.

आयुष्यातील नव्या अध्यायाला सुरुवात

उमर अब्दुल्ला यांच्या या घोषणेनंतर त्यांच्या आयुष्यातील एक नवा अध्याय सुरू झाला आहे. त्यांनी विवाह सोहळा पार पडल्यानंतर दुसऱ्या दिवशी समर्थकांसोबत ही आनंदवार्ता शेअर केली. विशेष म्हणजे, सर्वोच्च न्यायालयाने उमर अब्दुल्ला आणि त्यांच्या पहिल्या पत्नी पायल अब्दुल्ला यांच्या घटस्फोटाला मंजुरी दिल्यानंतर जवळपास तीन महिन्यांनी हा विवाह पार पडला आहे.

३१ जुलै रोजी झाला होता घटस्फोट

३१ जुलै २०२६ रोजी सर्वोच्च न्यायालयाने उमर अब्दुल्ला आणि पायल अब्दुल्ला यांचा ३२ वर्षांचा विवाह संबंधी निर्णय दिला होता. दोन्ही पक्षांनी न्यायालयात सांगितले होते की, ते परस्पर संमतीने वैवाहिक संबंध संपवण्यास आणि सर्व प्रलंबित वाद मिटवण्यास तयार आहेत. तसेच त्यांनी एकमेकांविरुद्ध दाखल केलेले खटलेही मागे घेण्याचे मान्य केले होते.

दिल्ली उच्च न्यायालयाने उमर अब्दुल्ला यांची घटस्फोटाची याचिका फेटाळल्यानंतर त्यांनी सर्वोच्च न्यायालयात धाव घेतली होती. सर्वोच्च न्यायालयातील सुनावणीदरम्यान, या जोडप्याने संविधानाच्या कलम १४२ अंतर्गत परस्पर संमतीने विवाह विच्छेदनासाठी संयुक्त अर्ज दाखल केला होता. त्यांचे वकील कपिल सिब्बल यांनी न्यायालयाला सांगितले होते की, दोघांनीही आपले मतभेद मिटवले असून ते परस्पर संमतीने वेगळे होत आहेत.

१९९४ मध्ये झाला होता पहिला विवाह

उमर अब्दुल्ला आणि पायल अब्दुल्ला यांचा विवाह १९९४ मध्ये झाला होता. दिल्लीतील ओबेरॉय हॉटेलमध्ये काम करत असताना दोघांची भेट झाली होती. या विवाहापासून त्यांना जहीर आणि जमीर नावाचे दोन मुले आहेत. दोघेही २००९ पासून वेगळे राहत होते आणि २०११ मध्ये उमर अब्दुल्ला यांनी अधिकृतपणे विभक्त झाल्याची माहिती दिली होती.

Read About : Maharashtra Local Body Elections- जिल्हा परिषद, पंचायत समिती निवडणुका मार्गी!
E-Paper: Punyanagari E-Paper