Sonia Gandhi joins X- सोनिया-राजीव गांधींची लव्ह ॲट फर्स्ट साईटची कहाणी

केंब्रिजमधील एका ग्रीक रेस्टॉरंटमध्ये झाली पहिली भेट; ‘एक्स’वर पदार्पण

Sonia Gandhi joins X : नवी दिल्ली : काँग्रेस नेत्या सोनिया गांधी यांनी शनिवारी सोशल मीडिया प्लॅटफॉर्म ‘एक्स’वर अधिकृतपणे पदार्पण केले आहे. यादरम्यान त्यांनी आपले आगामी आत्मचरित्र ‘बिलाँगिंग : अ जर्नी ऑफ लव्ह’ बाबत एक खास व्हिडीओ शेअर केला आहे, ज्यामध्ये त्यांनी राजीव गांधींसोबतच्या पहिल्या भेटीच्या आणि तरुणवयातील आठवणींना उजाळा दिला आहे. १० नोव्हेंबर २०२६ रोजी हे पुस्तक प्रकाशित होणार आहे.

‘एक्स’ व ‘इन्स्टाग्राम’वर शेअर केलेल्या सुमारे दोन मिनिटांच्या व्हिडीओमध्ये सोनिया गांधींनी जुन्या फोटोंच्या माध्यमातून केंब्रिजमधील दिवसांची आठवण काढली. ‘केंब्रिजमधील एका लहान ग्रीक रेस्टॉरंटमध्ये माझ्या प्रेमाची कहाणी सुरू झाली. मी आणि राजीव यांनी प्रेम, हास्य आणि आठवणींनी भरलेले एक जग निर्माण केले. १० नोव्हेंबर रोजी मी ते जग तुमच्यासोबत शेअर करत आहे,’ असे त्यांनी आपल्या पहिल्या पोस्टमध्ये म्हटले आहे.

राजीव गांधींच्या व्यक्तिमत्त्वाबद्दल बोलताना सोनिया गांधी म्हणाल्या की, त्या काळात इंग्लंडमधील जेवण फारसे चांगले नव्हते. इटालियन खाद्यपदार्थांच्या शोधात असताना त्या ‘व्हर्सिटी रेस्टॉरंट’ नावाच्या ग्रीक उपाहारगृहात पोहोचल्या, जिथे भारतीय आणि युरोपियन विद्यार्थी यायचे. तिथेच एका कॉमन मित्राने त्यांची ओळख राजीव गांधींशी करून दिली होती.

पहिल्याच भेटीत आकर्षण

सोनिया गांधींनी सांगितले की, ‘मी त्यांना जेव्हा पहिल्यांदा भेटले, तेव्हाच मला जाणीव झाली की ते अशी व्यक्ती आहेत ज्यांच्यासोबत मला आयुष्य घालवायला आवडेल आणि पुढे मला समजले की, त्यांच्या मनातही माझ्यासाठी तसेच विचार होते. ते अतिशय देखणे तर होतेच, पण त्यांच्या चेहऱ्यावरील आणि स्वभावातील नम्रता सहज जाणवत होती. त्यांच्या याच नम्र स्वभावाने माझ्या मनाला स्पर्श केला, जी गोष्ट मी कधीही विसरू शकत नाही,’ अशा शब्दांत त्यांनी जुन्या आठवणी सांगितल्या.

सोशल मीडियावर पहिल्यांदाच सहभाग

यापूर्वी सोनिया गांधींचे ‘एक्स’, ‘इन्स्टाग्राम’ किंवा ‘फेसबुक’वर कोणतेही वैयक्तिक खाते नव्हते. त्या पक्षाच्या अधिकृत हँडलवरूनच आपले संदेश शेअर करत असत. ‘एक्स’वर खाते उघडताच काही तासांतच त्यांना लाखो फॉलोअर्स मिळाले असून, काँग्रेस नेत्यांनी त्यांचे स्वागत केले आहे.

हार्परकॉलिन्स इंडियाद्वारे १० नोव्हेंबर रोजी प्रकाशित होणाऱ्या या पुस्तकात खालील महत्त्वाचे पैलू उलगडणार आहेत

इटलीमधील बालपण आणि केंब्रिजमधील दिवस.
राजीव गांधींसोबत विवाह आणि इंदिरा गांधींची ओळख.

साडी नेसणे, हिंदी शिकणे आणि भारतीय संस्कृतीशी जुळवून घेण्याचा प्रवास.
संजय गांधींचा मृत्यू, इंदिरा गांधींची हत्या आणि राजीव गांधींच्या हत्येसारखे दुर्दैवी प्रसंग.

२००४ मधील राजकीय विजय आणि त्यानंतर पक्षाचे नेतृत्व करतानाचा सोनिया गांधींचा दोन दशकांचा कार्यकाळ.

Read About : Nanodiamonds from Plastic : शक्तिशाली लेझरने सामान्य प्लास्टिकपासून बनवले अब्जावधी हिरे

E-Paper : Punyanagari E-Paper