१ जानेवारी २०२७ पासून नोंदणीकृत सिम कार्ड त्याच स्मार्टफोनमध्ये असणे आवश्यक
नवी दिल्ली : WhatsApp Telegram SIM Binding दूरसंचार विभागाने ऑनलाइन फसवणुकीला आळा घालण्यासाठी मोठा निर्णय घेतला आहे. नवीन सिम-बाइंडिंग नियमांनुसार, १ जानेवारी २०२७ पासून ज्या स्मार्टफोनमध्ये नोंदणीकृत सिम कार्ड नसेल, त्या डिव्हाइसवर व्हॉट्सॲप आणि टेलिग्राम यांसारख्या मेसेजिंग सेवा पूर्णपणे बंद होऊ शकतात. दूरसंचार विभागाने सर्व मेसेजिंग ॲप्सना वापरकर्त्यांची खाती त्यांच्या केवायसी प्रमाणित सिम कार्डशी लिंक करण्याचे आदेश दिले असून, यासाठी ३१ डिसेंबर २०२६ ही अंतिम मुदत निश्चित केली आहे.
वाय-फाय युजर्सना बसणार फटका
अनेक वापरकर्ते फोनमध्ये सिम कार्ड न ठेवता केवळ वाय-फाय इंटरनेटचा वापर करून व्हॉट्सॲप किंवा टेलिग्राम चालवतात. नवीन नियमांमुळे अशा युजर्सना मेसेजिंग सेवा वापरता येणार नाही. खाते चालू ठेवण्यासाठी नोंदणीकृत सिम कार्ड त्याच फोनमध्ये असणे आता अनिवार्य होणार आहे. हे नियम आयफोन आणि अँड्रॉइड अशा दोन्ही प्रकारच्या स्मार्टफोनना लागू राहतील. ॲपलने आपल्या आयओएस प्रणालीमध्ये सिम ओळखण्यासाठी आवश्यक बदल व नवीन अपडेट जारी केले आहे.
वेब लॉगआउटच्या नियमांत बदल
दूरसंचार विभागाने यापूर्वी प्रस्तावित केलेला दर ६ तासांनी व्हॉट्सॲप वेब आपोआप लॉगआउट करण्याचा नियम मागे घेतला आहे. नव्या सुधारणेनुसार, आता सामान्य वापरकर्त्यांचे वेब सेशन दर सहा तासांनी बंद होणार नाही. केवळ संशयास्पद हालचाली किंवा फसवणुकीची शक्यता आढळल्यास प्रशासन तातडीने ते खाते लॉगआउट करेल.
काही मेसेजिंग ॲप्सना दिलासा
सरकारचे हे नियम प्रामुख्याने व्हॉट्सॲप आणि टेलिग्राम या मोठ्या प्लॅटफॉर्म्सना लागू आहेत. लोकप्रिय सोशल मीडिया ॲप स्नॅपचॅटला या सिम-बाइंडिंगच्या कक्षेतून वगळण्यात आले आहे.
या नवीन सरकारी धोरणामुळे जे वापरकर्ते एकाच वेळी अनेक उपकरणांवर आपले मेसेजिंग खाते वापरतात, किंवा परदेश प्रवासादरम्यान स्थानिक सिम कार्ड बदलतात, त्यांना जानेवारी महिन्यापासून आपल्या ॲपच्या पडताळणीमध्ये अडचणींचा सामना करावा लागू शकतो. त्यामुळे युजर्सनी वेळेत आपले सिम कार्ड संबंधित डिव्हाइसमध्ये ठेवून पडताळणी पूर्ण करणे सुरक्षित राहिल.
Read About : Young-Onset Cancer : तरुणांमध्ये कर्करोगाचे प्रमाण वाढतेय; शास्त्रज्ञांसमोर नवे कोडे
E-Paper: Punyanagari E-Paper
Comments
Comments will appear here.
Comments are submitted for administrator moderation before appearing publicly.