Moderate Alcohol Consumption Health Risks – छटाक दारूही आरोग्यासाठी धोकादायक

‘थोड़ी सी जो पी ली है’ म्हणताना आता दहा वेळा विचार करावा लागेल

वॉशिंग्टन : Moderate Alcohol Consumption Health Risks – रोज एक-दोन पेग घेतले तर काही बिघडत नाही, उलट हृदयासाठी चांगलेच असते, असा समज आपल्याकडे बराच रूढ आहे. पण एका मोठ्या अभ्यासाने हा समज खोडून काढला आहे. ज्याला लोक ‘माफक’ मद्यपान म्हणतात, तेसुद्धा कर्करोग, हृदयरोग आणि अकाली मृत्यूचा धोका वाढवते, असे या अभ्यासात दिसून आले आहे.
अमेरिका आणि कॅनडातील संशोधकांनी हा अभ्यास केला. अमेरिकेतील राष्ट्रीय आरोग्य-आकडेवारीच्या आधारे त्यांनी आयुष्यभराच्या मद्यपानाचा आरोग्यावर होणारा परिणाम तपासला. माणूस ज्या प्रमाणात पितो, त्यानुसार पुढे कोणते आजार होऊ शकतात, याचे गणित त्यांनी मांडले. मद्यपानाचा संबंध २०० हून अधिक आजारांशी असल्याचे त्यांना आढळले. यात कर्करोग, हृदयरोग आणि यकृताचे आजार यांचा समावेश आहे.

जेवढे जास्त प्याल तेवढा धोका अधिक

अभ्यासातील आकडे डोळे उघडणारे आहेत. रोज दोन ड्रिंक्स घेणाऱ्या दर २५ व्यक्तींपैकी एकाचा मृत्यू आयुष्यात कधी ना कधी दारूमुळे होण्याचा धोका असतो. आठवड्याला सुमारे सात ड्रिंक्स, म्हणजे रोज साधारण एक ड्रिंक घेणाऱ्या दर हजार लोकांमागे एकाचा मृत्यू दारूशी संबंधित कारणाने होऊ शकतो. यापेक्षा जास्त प्यायल्यास धोका झपाट्याने वाढतो. रोज एकापेक्षा जास्त ड्रिंक घेतल्यास दीर्घकालीन आरोग्य-धोके लक्षणीय वाढतात, हा या अभ्यासाचा मुख्य इशारा आहे. हा अभ्यास ‘जर्नल ऑफ स्टडीज ऑन अल्कोहोल अँड ड्रग्स’ मध्ये प्रसिद्ध झाला आहे. त्यामुळे ‘थोडी घेतली तर चालते’ असे म्हणण्यापूर्वी आता दहा वेळा विचार करावा लागेल.

… तर धोका अधिक वाढतो

किती प्यायले यासोबतच कसे प्यायले हेही महत्त्वाचे आहे. एकाच बैठकीत भरपूर प्यायल्याने स्तनाचा कर्करोग, हृदयविकार आणि अपघाती इजांचा धोका आणखी वाढतो, मग आठवड्याचे एकूण प्रमाण तेवढेच असले तरी. काही जुन्या अभ्यासांत अल्प मद्यपानाचा हृदयाला थोडासा फायदा होत असल्याचे दिसले होते. पण कर्करोग आणि इतर आजारांचा धोका लक्षात घेतला की हा फायदा नाहीसा होतो. मद्यपानाची अशी कोणतीही पातळी नाही जिथे एकूण आरोग्याला फायदा होतो, असे संशोधकांनी स्पष्ट केले आहे.

Read About : Ebola Outbreak 2026 – इबोला घेऊ शकतो जागतिक महामारीचे रूप
E-Paper : Punyanagari E-Paper